Renato B. Alzadon, Aldo Nang Kebaitan
RENATO B. ALZADON, Aldo nang Kebaitan
Neng Almario "amor" C. de Jesus
R - retang bisang magregalu, keng aldo mung kebaitan,
E - era balu a nung nanu, pecamasanting dang yampang,
N - nanu caya ing buri na, a masaya nang tanggapan,
A - agamit nang masalese, O isinup pacamalan,
T - tabalu at macanian pin, ugali tang acagisnan,
O - obat ing mamye regalu, mengari yang catungculan.
B - BIRTHDAY nang RENE ALZADON, matenacan a Poeta.
A - ari ya ping mituringan, ning Parnasung Capampangan,
L - lacan ne wari ning Capaz, lugal a cayang beitan,
Z - zona da reng Capampangan, labwad ding biasa at lacan.
A - anac a tiru ning Tatang, pamanyulat at gagale,
D - Dayrit, Galang at Gallardo, ilang minunang cayabe,
O - Ocampo king tawling sabi, "Rene keca lilipat ke"
N - nuan ya ing Amanu tamung, lingapan meng masalese.
A - anya ngeni ing Regalu, a dapat ming idaun keca,
R - eng malucang cawatasan, detang poesya at tumaila,
I - ila ngening pangacu ming ibalangcas alang sawa.
N - nu ke man danggut ning yatu, amanu dapat yang dalan,
I - ing amanu ta mung siswan, eya maliaring calingwan,
N - ningning na nitang sala na, e culimlim bitasa man,
G - gambulan yang alang binit, paragulan, palabungan.
P - parnasung meging santungan, pisanmetung yang sicapan,
A - at iwale ing catasan, ing macasnuc at inggitan,
R - regalu tamu king Ari, e alaas, mal a imalan,
N - nune ing pamisanmetung king Parnasung Capampangan,
A - abe abe tang talacad, ibwat taya king calucan...
S - salita tamung beitan, a binie na ning Miglalang,
U - uling iti yang cailangan, bang e mate't macalinguan,
S - saup na ning balang metung, panaian ning ca horasan.
(Poemang regalu cu cang Ca Rene, Ari Ning Parnasung Capampangan, keng aldo nang kebaitan)
Artesia, California, 11/11/11