Apalit
Apalit
Anac Ning Arenas
Ing balen Apalit bantug ya't kilala
keng industriang bakal ampon pamaglala.
Ing banuaang libad qng ilug carin ya
papuri kang Apung Iru a patron na.
Siglung labing-lima'ing keyang ketatagan
queng metung a dutung de kinua kalagyuan,
a tutubung dakal queng queyang lugalan,
"Apalit" ing aus queti Kapampangangan.
Queti de atagmuan kabud ding Castila
ing mangawang kanyun a y Panday Pira,
mipundar pandayan keng bakal pangawa
a pegumpisan ning negosyung mialiwa.
Ding tau Apalit miagnan deng pagsayan
ing kapiestan na ning parocya da't balian
a-beinti-otsu at a-treinta ing bulan
pangaras ning Junio, queng cada banuaan.
Ing balen Apalit carin ya'ing puestu na
bandang aslagan ning probinsiyang Pampanga.
Ing Balen Baliuag queng yang aslagan na
San Simon't, Minalin queng norti na banda
queng lalam na Pulilan at Calumpit la
at ing Macabebe quen king albugan na.
Ing balen laut yang onse kilometru
'bat qng capitolyu Ciudad San Fernando.
Lapad yang sisenta kil'metru codradu
queng kaleparan na patag yang intieru.
Ing Ilug Pampanga lalabas yang sactu
queng calibudtan na 'mula sepu't-sepu.
Bista man manawa ya keng pamaglala
at pandayang metal nang pang-industria,
ing peka-primerang pagcabie ding masa
mabilug a balen ya ing pamagsaca,
pamanasan, ampong kalakal at tinda.
Dose lang baryu na, Tabuyuc cabilang
Balucluc, Calantipe, at Capalangan,
Colgante, Paligui, Cansinala, San Juan,
Sucad, San Vicente, Sampaloc, Sulipan.
»pakiramdaman ye ing audio file