Atlung Tanaman A Dutung
ATLUNG TANAMAN A DUTUNG
neng Almario C. de Jesus, K of C, Dist. 7749
(8 x 8 ing talata, 6 ing parapo)
Calwat na na ning panaun, dacal nang banwang melagas
Ketang metung mal a bunduc, keng lugal peca matas
Ating tutubung tanaman, atlung tanaman a dutung
A madalas misasabi, nung nanu ing paninapan
Potang mitas at dagul na, tumibe ing carelang pun
Ing buri ning balang metung, ing malayari sa macanyan. . .
Itang Mumunang Tanaman, telangan nu retang tala
At saca ya mengamanu, anti canining buri na
Canacu sa at gawa la, Caban a misna king legwan
Pilulanan da ping yaman, perlas, alahas ginintuan
At nung ackit me ing Caban, yti ala yang keliwan
Pagmulalan yang talaga, king aske na at cayarian.
Cadwang Tanaman a Dutung, linawe ne ytang sapa
Malumeme ing agus na, ketang dagat ing ulian na
Paninap cu ing maglayag, mag lacbe king dayat malat
At deng pili cung sasake, Ari mangayap a dapat
O pecamatas a Pari, ala lang tacut sasake
At ytang barcung gawan da, tutu ya ping misnang tibe.
Catlung Tanaman a Dutung, dindungan na ytang lalam
Ikit na la detang tau, alang patugut tatanam
E na buri ing ykit na, inya linub king isip na
Keni na cu babu bunduc, e na cu macu pin ngana
Bisa cung mitas a mitas, a dutung sari king tibe
At ing Dios ing aisip da, detang sablang maglalawe.
Melagas na ing panaun, dacal na ing digpang uran
At ing aslag na ning Aldo, meragul no reng tanaman
Ketang catas at tibe ra, dapat na la ping pupupwan,
At e linwat, minucyat la, Atlung Mangutud tanaman
Bang mamili la ping dutung, at ibaba king balayan
At detang atlung tanaman, agad da lang apansingan.
Yng Mangutud a Mununa, cararagli sinabi na
Casanting na ning Tanaman, ustung ustu ya pin ngana
Ginamit ne ing Palacul, ytang dutung mitomba ya,
Gawan da nacu pung Caban, cayamanan pisinupan
Macanyan ing king isip na, nitang Mumunang Tanaman
At mamasang miswerti ya, yti caya nang asaan.
Ing Mangutud a tutuki, king Cadwang Tanaman naman
Ini ing matibe't ustu, ketang cayang buring gawan
Anya e ne micacunu, pelacul neng misnang sican
At magawa na cung barcu, yang linub king caisipan
Sasaken ding mapiang Ari, dayat malat babaltangan
Alang tacut agyang bagyu, macasadya cung saganan.
Lepitan de ing Pangatlu, melungcut yang e mu nanu
Maski nanung dutung ngana, yang cwanan at itumba yu
At agad deng pemalacul, ketang gabun ne mipase
Cararagli deng pisanan, binwat da caretang tacde,
Beba da ne ketang bunduc, ing dutung a misnang tamle
Ketang metung a tabliria, mitambac n'ya mut milele.
Mumunang Tanaman naman, kinwa ne ning Carpinteru
Gawan da na cu ping Caban, ing marapat ing buri cu
Dapot anyang mayari ne, ot metung a Lalabangan ya
A meging pipanganan da, tupa, baca't aliwa pa
At e ya mibalutan pin, king gintu, pilac at yaman
Kinatmu yang Are't dicut, a megawang pipanganan.
Ing Cadwang Tanaman naman, miras keta king pantalan
Dutung a tictac king tibe, sana barcu na ing gawan
Gewa reng metung a banca , saken deng mapilang tau
Ketang dagat a ma-alon, e ya malyaring "idaretsu"
Gamitan de mung panasan, pandalakit lipat ilug
Paninap saken deng Ari, dela ning agus at limbug.
Ytang Catlung Dutung naman. ketang tablirya mipadpad
Miyaliwang poste't sucad, pengutud deng mangacuyad
Ot macanyan ing milyari, e metupad ing paninap
A keta cu mu king bunduc, lalon da retang magdulap
Maca turu banuang matas, tangalan keng Dios a wagas
At detang mumuciat bunduc, Lalawen da cu keng catas.
(6 x 6 x 6 ing talata careng tutuking parapo):
Ing aldo at bengi, malagwang linabas, dela ning panaun
Detang Atlung Dutang, ketang cabilyan da, anti lang melaun
Carelang paninap, ketang t'yu la bunduc, tutubung tananman
At misan a bengi, mumunang tanaman, biglang mipacde ya
"Mica gintung sala, bat metung a batwin, masalang sinlag ya
Ketang Lalabangan, ning metung a Anac, a bayung bait pa."
At yta nang Tata, ngana king asawa, gawa cu sang cuna
E sana macanyan, ing pipagkeran na, ning Mal a Bunsu ta
At telan ne gamat, nita nang asawa, ketang sinabi na
Cabang ytang aslag, tala ning catasan, tatanglawan na la
Cacu masanting ya, ining lalabangan a ke'yang pagkeran
"Canita mebalu, ytang macalulan, Mal yang diling Yaman".
Sisilim canita, metung a Maglacbe, ing banca seken ne
Detang caluguran, caya la tinuki, canatba la ume
Uli na ning pagal, keta nang sumanga, ot mipatudtud ya
Dinatang ing duldul, kildap at sigwada, mengatacutan la,
"Anya migising ya, tinas nu ring gamat at pepatucnang na
At canita lintu, Ari banwa't sulip, ya palang sake da".
Biernes na ning abac, ing Catlung Tanaman, cabud mengasdan ya
Ding masyas a poste a menibat caya, cabud na kinwa ra
Yla ring megamit at megawang Cruz, ketang bitayan da
"Asna na casakit ytang panandaman, inyang pemacu re
Gamat ampun bitis, cabang detang tau, gugulisacan de
Ytang Catlung Dutung, lintu yang matsura, mabagsic yang tune".
Aldu ning Dominggo, sinlag ya ing aldo, at lalam ning dutung,
Metula ing sabla keti king masala, at ing panandaman
Nitang Catlung Dutung ngeni menaliwa, lalu yang metibe
king lugud na ning Dios, sabla mibayu ngan, king lugud a tune
Tanaman a dutung e man peca matas keti king Sicluban
""Ngeni abalu na, ytang Crus a dutung, anti yang CaADIOSAN".
(Mica diwa cu ketang "Word4Life" a articulung a abasa cu)
acj, apr 17, 2012, California, USA