Bakit Dalit Cu Pa?
BAKIT DALIT CU PA?
Diwa neng Almario C. de Jesus (Ing aguila ning Apalit)
Bakit caya dalit cupa, ala na yata keng usu...
Ala cung apapansingan buri dapa ing amanu...
Detang cacung caluguran a mesabing capampangan
Ing tagalog saca Inglis ya nang buri dang gamitan.
Bakit caya dalit cu pa, Nanung masanting a sangcan?
Nung deta nang manungculan, alang keber papansingan,
Potang susulatan mula, o magsadyang pakisabyan
Ing gamitan dang salita, aliwa ing Capampangan.
Bakit rugu dalit cu pa? nung caretang cayanacan
bawal ya ing Capampangan a iturung pagaralan?
Anya ngeni deng magaral, era naca pin aintindyan
Nung magpilit capang dalit, ketang amanu tang sisuan.
Anya ngeni dalit cu pa? Pabusten cu ing milabas?
ing bilungan ning istorya nitang lahing capampangan?
Kelingwan cu't e ganacan ing gelingan da't cagiwan
Ding pantas a talasulat at licwan dang cawatasan?
At ing cutang dalit cu pa? WA dapat mung dalit cu pa,
Uling emu ayalilan, dayang mamagos catawan
menibat nunu't matwa mu, yang keca mimie sicanan
Itang dayang Mahadlica, daya yaping Capampangan.
Bakit dalit cu pa ngara? Ba… Dapat mung dalit cu pa...
eco dapat pacyapusan detang bisang mangalingwan
at dapat cung makiabe calupang manalupsupan
ketang mebating a SINGSING, iba't cang Indung Ibatan.
Anya naman dalit cu pin, Wa dalit cung alang tucnang...
Uling banal ya't sagradu ini nang Amanung Siswan.;..
Keng keraclan ding Salita bignus Na babu ning yatu,
Ing Amanung Capampangan, yang mitutuc kecatamu.
NGENI, talagang dalit cu ... Wa... cailang pin dalit cu...
Uling eke buring matda, itang paralum a Sulu...
A mantabe kecatamu, nucarin ca man painturu...
Angga keta king catasan, potang marap ca king Guinu.
Angga carin nung dalit cu, gamitan keng amanu cu
Uling balu cung balu na, yang pigcalub na canacu
Amanung sacdal king lambis, sunis a alang caparis
Wa, dalit cu angga banwa, cayabe da ding Angeles.
acdj
OBAT DALIT CU PA
neng Almario C de Jesus -
*
Obat dalit cu pa? Ala na yata keng usu...
Ala kung apapansingan buri de pa ing Amanu...
Detang kakung kaluguran a mesabing Capampangan. ..
Ing Tagalug saka Inglish ya nang buri dang gamitan.
**
Obat dalit cu pa? Nanung masanting a sangkan?
Nung deng manungkulan Balen, ala nung "Keber" nanu man..
Potang susulatan mula O magsadyang pakisabyan
Ing gamitan dang Salita, aliwa ing Capampangan. .
***
Obat dalit cu pa? Nung karetang kayanakan
Pamanuru da eskwela, bawal ya ing Capampangan.
Anya ngeni ding magaral, magkasakit da kang aintindyan
Nung magpilit ka pang dalit, ketang Amanu tang Sisuan.
****
Obat dalit cu pa? Pabusten cu ing milabas?
Ing bilungan ning Istorya nitang lahing Capampangan?
Kalingwan ku't e ganakan ing gelingan da't kagiwan..
Detang Pantas at talasulat at likwan dang kawatasan?
*****
Obat dalit cu pa? Wa, dapat mung dalit cu pa.
Uling emu ayalilan, dayang mamagos keng kekang katawan.
Menibat karing Nunu't matwa mu, yang keka minye sikanan
Ytang dayang mahadlika, daya yaping Capampangan.
******
Obat dalit cu pa? Wa, dalit cu pa,
Eku dapat pakyapusan detang bisang mangalingwan
Eku tuknang makiabe kalupang manalupsupan
Ketang mebating tang Singsing ibat king Indung ibatan.
*******
Obat dalit cu pa? Wa, dalit cu pa...
Uling banal ya't sagradu ini nang Amanu tamu...
Keng keraklan ding Salitang bignus Na babu ning yatu
Ing Amanung Capampangan, yang mitutuk kekatamu.
*******
Ngeni, dalit cu pa. Wa, kailangan dalit cu
Uling eke buring matda, itang paralum a Sulu,
A mantabe keka tamu, nukarin kaman painturu
Angga keta king katasan, potang marap na ka king Guinu.
acdj
(Metung careng minuna cung belangcas a poema, e ke tiki keg metro o sucad)
”Rosa at Andi, Pengari nang Amor de Jesus"