Er du interessert i kultur? Eller kva som eigentleg skjer når vi kommuniserer med kvarandre? Korleis blir kommunikasjonen vår påverka av kultur, verdiar og vårt syn på verda?

I faget kommunikasjon og kultur 1 jobbar vi med desse spørsmåla gjennom ulike teoriar og tekstar. Kjerneelementa i faget er: Kulturell identitet, kommunikasjon, tekst og verkelegheit, og teori og metode.

Kommunikasjon er eit tverrfagleg fag, som blandar teoriar frå blant anna sosiologi og sosialantropologi, medievitskap, kommunikasjonsfag og psykologi for å forstå samanhengar mellom dei. Faget passar for deg som er interessert i menneske, kulturar, samfunnet og korleis vi kommuniserer saman. Det er òg mogleg å ta bachelor i kommunikasjon og kultur.

Korleis er faget lagt opp?

Vi deler faget inn i tre hovuddeler: Kommunikasjon, med ulike kommunikasjonsteorier, kultur og kulturell identitet, og til slutt: Korleis ein kan sjå kommunikasjon og kultur i samanheng med kvarandre.

Når vi seier tekst, så arbeider vi med eit utvida tekstomgrep. Det betyr at tekst er meir enn det du les. Tekst kan vere film, klede, musikk, dataspel, kroppsspråk med meir. Alt dette er noko vi skal lære meir om, og du skal sjølv produsere både saklege og kreative tekstar.

Vi lærer om ulike kulturar og kulturuttrykk. Vi ser óg på kulturell identitet og utforskar korleis menneske og kultur gjensidig påverkar og formar kvarandre. Korleis kan interkulturell kommunikasjon vere? Vi arbeider òg praktisk med å tolke verbal og ikkje-verbal kommunikasjon i ulike kommunikasjonssituasjonar.

Korleis blir du vurdert?

Fordi undervisninga og faget er så variert, vert også vurderingsformane varierte. I hausthalvåret har vi som regel starta med ei tradisjonell prøve og ei meir kreativ innlevering i form av videoproduksjon, i tillegg til ei munnleg vurdering. I vårhalvåret vert det lagt meir vekt på munnlege innleveringar og ein prøveeksamen. Dette kan variere og kan til dømes vere ein fagsamtale, ei framføring, ein podkast, ein videoproduksjon og/eller ein munnleg prøveeksamen.

Korleis blir eksamen?

I programfaget kommunikasjon og kultur 1 kan du bli trekt ut til ein munnleg eksamen.