Kjemi 1 og 2

Kva lærer du i kjemi 1?
I kjemi 1 lærer vi om å utforske, fastsette og skildre korleis stoffa er bygd opp på mikronivå. Ut frå desse opplysningane lærer du å forklare stoffa sine eigenskapar og reaksjonar.  Du lærer óg å bruke reaksjonslikningar for å påvise ulike kjemiske eigenskapar ved løysingar. Kva føresetnader som må vere oppfylte for at ein reaksjon skal skje er óg noko du lærer meir om i kjemi 1. Kort sagt byggjer vi vidare på dei grunnleggjande kjemikunnskapane frå tidlegare skulegong. Vi får ei større innsikt i kjemien sin breidde, noko som gjer faget meir interessant.

Arbeidsmåtar:
I kjemi er det fleire arbeidsmåtar. Teori og oppgåveløysing, gruppearbeid og laboratoriearbeid med mange ulike forsøk. Desse arbeidsmåtane gjer at kjemien er lettare å forstå, og samtidig får du høve til å teste ferdigheitene dine både praktisk og teoretisk.

Arbeidsmengd:
Kjemi 1 er generelt eit fag som krev jamt og godt arbeid. Vanskegrada til faget blir i stor grad avgjort ut frå om du er interessert i naturvitskap og matematikk. Derimot er det ikkje sagt at du må være særeigent interessert i desse emna frå før av for å oppnå ein god karakter i kjemi 1. Vanskegrada blir i størst grad avgjort av kor mykje arbeid du legg ned i faget, og mange elevar oppdagar si eiga interesse for kjemifaget undervegs.

Du kan bli trekt ut til munnleg-praktisk eksamen i faget. 

Kva lærer du i kjemi 2?
Kjemi 2 er eit fag som byggjer på pensumet frå kjemi 1. Faget går meir i djupna på ulike tema som er tatt opp i kjemi 1, og i tillegg er det både uorganisk og organisk analyse. Ein raud tråd i faget kan seiast å vere redoks (reduksjon og oksidasjon). Det gjeld både redoks i uorganiske- og organiske stoff.

Organisk kjemi blir knytt opp mot biologien gjennom arbeid med næringsstoff, fotosyntese og celleånding.

Arbeidsmåtar:
I kjemi er det fleire arbeidsmåtar. Teori og oppgåveløysing, arbeid i grupper og laboratoriearbeid med spennande forsøk som forklarar teorien. Desse arbeidsmåtane gjer at kjemien blir lettare å forstå, og samtidig testar du ferdigheitene dine både praktisk og teoretisk. 

Arbeidsmengd:

Faget er krevjande og inneheld eit omfattande og til tider tungt teoretisk stoff. Det er viktig å leggje eit godt grunnlag for faget gjennom jamt og trutt arbeid med kjemi 1. Er ein aktivt deltakande og spørjande i undervisninga, samt gjer ein innsats utanom undervisningstimane, er føresetnadane gode for å lære seg faget. 

Du kan bli trekt ut til skriftleg og/eller munnleg-praktisk eksamen i faget.

Visste du at kjemi kan gi deg jobb i iskremindustrien?

Mitt yrke: Kjemikar