సంస్కృత సంధులు
సంస్కృత సంధులు
సవర్ణదీర్ఘ సంధి :
అ ఇ ఉ ఋ లకు సవర్ణములైన అచ్చులు పరమగునపుడు వానికి దీర్ఘములు ఆదేశమగును
ఉదా :
రామ + ఆలయము = రామాలయము
ధరణి + ఈశుడు = ధరణీశుడు
భాను + ఉదయము = భానూదయము
పితృ + ఋణము = పితృూణము
గుణసంధి :
అకారమునకు ఇ ఉ ఋ లు పరమగునపుడు క్రమముగా ఏ ఓ అర్ లు ఏకాదేశమగును.
ఉదా :
నర + ఇంద్రుడు = నరేంద్రుడు
పరమ + ఈశ్వరుడు = పరమేశ్వరుడు
గుణ + ఉన్నతుడు = గుణోన్నతుడు
దేవ + ఋషి = దేవర్షి
వృద్ధిసంధి :
అకారమునకు ఏ ఐ లు పరమగునపుడు ఐ కారము, ఓ ఔ లు పరమగునపుడు ఔ కారము ఆదేశమగును.
ఏక + ఏక = ఏకైక
దేశ + ఐక్యత = దేశైక్యత
సకల + ఐశ్వర్యములు = సకలైశ్వర్యములు
గంగా + ఓఘము = గంగౌఘము
వన + ఓషధి = వనౌషధి
దివ్య + ఔషధము = దివ్యౌషధము
యణాదేశసంధి :
ఇ ఉ ఋ లకు అసవర్ణములైన ( ఇతర ) అచ్చులు పరమగునపుడు వానికి య- వ- ర- లు ఆదేశమగును.
ఉదా :
అతి + అద్భుతము = అత్యద్భుతము ( ఇ కి ‘య‘ వచ్చినది )
ప్రతి + అక్షము = ప్రత్యక్షము
గురు + ఆజ్ఞ = గుర్వాజ్ఞ. ( ఉ కు ‘వ’ వచ్చినది )
పితృ + ఆర్జితము = పిత్రార్జితము ( ృ కు ‘ర’ కారము వచ్చినది )
జశ్త్వసంధి :
ఈ సం ధిని నేను సంస్కృత సరళాదేశసంధి గా గుర్తు పెట్టుకొంటాను.
క చ ట త ప లకు వర్గ తృతీయ, చతుర్థ, పంచమాక్షరాలు , అచ్చులు, హయవరలు పరమగునపుడు వాటికి గ జ డ ద బ లు ఆదేశమగును.
ఉదా :
దిక్ + అంతము = దిగంతము
దిక్ + గజము = దిగ్గజము
వాక్ + అనుశాసనుడు = వాగనుశాసనుడు
అచ్ + అంతము = అజంతము
రాట్ + గణము = రాడ్గణము
జగత్ + ఈశ్వర = జగదీశ్వర
చిత్ + రూపము = చిద్రూపము
కకుప్ + అంతము = కకుబంతము
పూర్వసవర్ణసంధి :
క చ ట త ప లకు హ కారము పరమైనపుడు ఘ ఝ ఢ ధ భ లు వైకల్పికముగా వచ్చును
ఉదా :
వాక్ + హరి = వాగ్ఘరి , వాగ్హరి ( జశ్త్వసంధి )
జగత్ + హితము = జగద్ధితము, జగద్హితము ( జశ్త్వసంధి )
శ్చుత్వసంధి :
స కార త వర్గములకు శ కార చ వర్గములతో యోగము ( కలయిక ) కలిగినపుడు శ కార చవర్గములు ఆదేశమగును.
ఉదా:
మనస్ + శాంతి = మనశ్శాంతి
తపస్ + శక్తి = తపశ్శక్తి
మనస్ + చలనము = మనశ్చలనము
సత్ + జనులు = సజ్జనులు
సత్ + చరిత్రుడు = సచ్చరిత్రుడు
ఛత్వసంధి :
క చ ట త ప లకు శ వర్ణము పరమగునపుడు ఛ కారము వికల్పముగా వచ్చును
ఉదా:
వాక్ + శరము = వాక్ఛరము , వాక్శరము
రాట్ + శాసనము = రాట్ఛాసనము , రాట్శాసనము
త్వక్ + శోభ = త్వక్ఛోభ , త్వక్శోభ
విద్యుత్ + శక్తి = విద్యుత్ + ఛక్తి ( ఛత్వసంధి )
విద్యుత్ + ఛక్తి = విద్యుచ్ఛక్తి ( శ్చుత్వసంధి )
ష్టుత్వసంధి :
స కార త వర్గములకు ష కార ట వర్గములతో యోగము కలిగినపుడు ష కార ట వర్గములు ఆదేశమగును
ఉదా:
చతుస్ + షష్టి = చతుష్షష్టి
ధనుస్ + టంకారము = ధనుష్టంకారము
తత్ + టీకా = తట్టీకా
పరసవర్ణసంధి ( లా దేశసంధి ) :
త కారమునకు ల కారము పరమగునపుడు ల కారము ఆదేశమగును
ఉదా :
సుహృత్ + లాభము = సుహృల్లాభము
తత్ + లయము = తల్లయము
విద్యుత్ + లత = విద్యుల్లత
సత్ + లాపము = సల్లాపము
అనునాసికసంధి :
క చ ట త ప లకు అనునాసికములు ( ఙ , ఞ, ణ, న, మ లు )లు పరమగునపుడు ఆ వర్గపు అనునాసికములు వికల్పికముగా వచ్చును.
ఉదా:
వాక్ + మయము = వాఙ్మయము
రాట్ + మయము = రాణ్మయము
జగత్ + మాత = జగన్మాత
చిత్ + మయము = చిన్మయము
తుగాగమసంధి :
పదాంతములో హ్రస్వాచ్చునకు ఛ కారము పరమయిన తుగామము నిత్యము గాను, దీర్ఘాచ్చునకు ఛ కారము పరమగునపుడు తుగామము వికల్పికముగాను వచ్చును.
ఆపై శ్చుత్వసంధి జరుగుతుంది.
ఉదా:
వృక్ష + ఛాయ = వృక్షత్ + ఛాయ ( తుగాగమ సంధి )
వృక్షత్ + ఛాయ = వృక్షచ్ఛాయ ( శ్చుత్వసంధి )
తరు + ఛాయ = తరుత్ + ఛాయ ( తుగాగమ సంధి )
తరుత్ + ఛాయ = తరుచ్ఛాయ ( శ్చుత్వసంధి )
లక్షీ + ఛాయ = లక్ష్మీచ్ఛాయ , లక్ష్మీఛాయ
విసర్గసంధులు :
1. విసర్గలకు క ఖ ప ఫ లు పరమగునపుడు విసర్గలకు లోపము రాదు.
ఉదా:
తపః + ఫలము = తపఃఫలము
మనః + కమలము = మనఃకమలము
అంతః + పురము = అంతఃపురము
తేజః + కీర్తి = తేజఃకర్తి
2. విసర్గలకు చ ఛ లు పరమగునపుడు శ కారము, ట ఠ లు పరమగునపుడు ష కారము, త థ లు పరమగునపుడు స కారము వచ్చును.
ఉదా:
తపః + చర్య = తపశ్చర్య
తపః + చరణ = తపశ్చరణ
ధనుః + టంకారము = ధనుష్టంకారము
మనః + తాపము + మనస్తాపము
3. విసర్గలకు స శ ష లు పరమగునపుడు స శ ష లు వచ్చును.
ఉదా :
మనః + సాక్షి = మనస్సాక్షి
తపః + సాధనము = తపస్సాధనము
మనః + శాంతి = మనశ్శాంతి
చతుః + షష్టి = చతుష్షష్టి
4. విసర్గాంత శబ్దములకు అచ్చులు, వర్గ తృతీయ చతుర్థ పంచమాక్షరములు, హయవరలు పరమగునపుడు రేఫము ఆదేశమగును.
ఉదా :
అంతః + ఆత్మ = అంతరాత్మ
చతుః + భుజుడు = చతుర్భుజుడు
చతుః + వేదములు = చతుర్వేదములు
ధనుః + విద్య = ధనుర్విద్య
ధనుః + బాణములు = ధనుర్బాణములు
పునః + దర్శనము = పునర్దర్శనము
హ్రస్వ అకారము మీద విసర్గకు వర్గ తృతీయ చతుర్థ, పంచమాక్షరములు, హయవరలు పరమగునపుడు ఓకారము ఆదేశముగా వచ్చును.
ఉదా:
తపః + వనము = తపోవనము
మనః + రథము = మనోరథము
శిరః + రత్నము = శిరోరత్నము
వచః + లావణ్యము = వచోలావణ్యము
మనోవేగము, తపోధనము, మనోనేత్రము మొదలగునవి ఇట్టి పదములే.
సకారాంతసంధులు :
1. సకారాంత పదములకు క ఖ ప ఫ లు పరమగునపుడు సకారమునకు విసర్గము వచ్చును.
మనస్ + కంజము = మనఃకంజము
తపస్ + ఫలము = తపఃఫలము
ఉరస్ + ఖేదము = ఉరఃఖేదము
2. సకారాంత పదములకు ట ఠ లు పరమగునపుడు విసర్గకు ష కారము వచ్చును.
ధనుస్ + టంకారము = ధనుష్టంకారము
3 సకారాంతపదములకు త థ లు పరమగునపుడు సకారమునకు మార్పు రాదు
మనస్ + తిమిరము = మనస్తిమిరము
4. సకారాంత పదములకు శ ష లు పరమగునపుడు శ ష లు గాని విసర్గ గాని వచ్చును
మనస్ + శాంతి = మనశ్శాంతి ; మనఃశాంతి
చతుస్ + షష్టి = చతుష్షష్టి; చతుఃషష్టి
5. అస్ అంతము గల పదములకు వర్గ ప్రథమ , ద్వితీయాక్షరాలు, శ ష స లు కాక మిగిలిన హల్లులు పరమగునపుడు ఓ కారము వచ్చును.
మనస్ + నేత్రము = మనోనేత్రము
తపస్ + ధనము = తపోధనము
6. అస్ అంతము గల పదములకు అకారము పరమగునపుడు ఆ రెంటికి ఓ కారము వచ్చును.
మనస్ + అబ్జము = మనోబ్జము
అప్సరస్ + అంగన = అప్సరోంగన
యశస్ + అబ్ధి = యశోబ్ధి
7. ఇస్, ఉస్ అంతము గల పదములకు క ఖ ప ఫ లు పరమగునపుడు షకారము వచ్చును.
నిస్ + కారణము = నిష్కారణము
నిస్ + ఫలము = నిష్ఫలము
చతుస్ + పదము = చతుష్పదము
8. కొన్ని సకారాంత పదములకు అచ్చులు, వర్గ తృతీయ చతుర్థ, పంచమాక్షరములు, హయవరలు పరమగునపుడు రేఫము ఆదేశమగును.
దుస్ + అంతము = దురంతము
అయ్ అవ్ ఆయ్ ఆవ్ ల ఆదేశసంధి :
ఏ ఓ ఐ ఔ లకు అచ్చులు పరమగునపుడు అయ్, అవ్, ఆయ్, ఆవ్ లు క్రమముగా ఆదేశమగును.
హరే + ఏ = హరయే
విష్ణో + ఏ = విష్ణవే
నై + అకః = నాయకః
పౌ+ అకః = పావకః
గో శబ్దములో ఓ కారమునకు అచ్చులు పరమగునపుడు అవ శబ్దము ఆదేశమగును.
గో + అధ్యక్షుడు = గవాధ్యక్షుడు
గో + అక్షము= గవాక్షము
గో + ఇంద్రుడు = గవేంద్రుడు