جمهور الإتحاد السكندرى

ياسر أمين منذ أكثر من 15 سنه وقبل ظهور الفيس بوك كتبت انا مرات عديده عن حقيقة وسبب إطلاق اللقب على مشجعى سيد البلد فهو أن أرض النادى الشاطبى كان يديرها بولاناكى رئيس الاتحاد المختلط للألعاب وكان هو ووالده يملكون مصانع خمور فى اماكن أخرى بعيده وليس فى الشاطبى ولكن ارتبط اسم بولاناكى بهذه الملاعب لطول فترة إدارته لها ولشهرته فى المجتمع فكان الناس يقولون الملاعب بتاعت الراجل بتاع السبرتو

ياسر أمين والله يا أخى الغالى هذا التفسير كتبته مرات عديده فى المواقع القديمه ولكن للاسف من كانوا معنا فى الانترنت أعدادهم قليله ... والتفسير سمعته من كبار السن من الاتحادويه منهم المرحوم الحاج على حسن غنيم من كبار مشجعى سيد البلد قديما بمنطقة كامب شيزار الشاطبى... أما عن شرب السبرتو والحشيش فكانت موجوده لدى قلة قليلة جدا من كل جماهير كل الانديه ... وأرض نادى الاتحاد السكندري ثابت فى كل الكتب والمراجع القديمه أنها ملاعب منذ قديم الازل ولم تكن ابدا سوى ملاعب اميريه مملوكة للدوله وليس لأى شخص

George Nadra نعم ياخ محمد يوسف تفسير كلمة سبرتو على الاتحاد صح وال قالها لى الوحش مدرب الاتحاد القديم ايام الديبه فى سنة 50 كان والدى عضو بالاتحاد كان يصطحبنى انا واختي للنادى والكلام ده كان عمرى 6 سنوات سألت الوحش قال نفس تفسيرك سبرتو سبرتو بس يرجع هذا الزمن كان الاتحاد يمتاز بلاعبين عندهم من المهاره يشبعوك كوره حلوه غير اخلاقهم وحبهم للنادى ياه كانت حياه حلوه وجمهور الاتحاد جميل ومهذب مكنش فيه الشتيمه والالفاظ البذيئة حتى بعد ما هبط النادى صعد بعد موسم لان لا أحد شتم لاعبين ولا هاجموا النادى بل بالعكس شجعنا النادى أكثر واتلفينا حواليهم وفعلا سعدنا بعد موسم واحد ربنا ما يعيدها

الاهلى يا اتحاد

مباراة الاهلى والاتحاد السكندرى بالقاهرة بتاريخ 16-10-1980 موسم 1980-1981 فى حضور 120 الف متفرج منهم 15 الف متفرج اتحداوى فى مبارة غير مذاعة تليفزيونيا

هانى سرور حارس مرمى نادى الاتحاد نجم هذه المبارة الاول حيث تألق فى ذلك اليوم تألق غير عادى حتى اثنى محمود الخطيب على هانى سرور بعد تلك المباراة حيث انه تصدي لألعاب فى منتهى الخطورة للخطيب فى ذلك اليوم و فى الوقت بدل الضائع من الشوط الثانى يفاجأ عادل البابلى نجم نادى الاتحاد الجميع بتسديدة قوية سكنت شباك ثابت البطل والاهلى مسجلا هدف المبارة الوحيد فيقوم الحكم محمود عثمان بأضافة 8 دقائق كاملة وقت بدل ضائع اكثر من المفروض بكثير ورغم ذلك يفوز نادى الاتحاد 1 – صفر وتستقبل جماهير الاسكندرية فريقها المنتصر استقبالا ليس له مثيل من بداية الطريق الصحراوى حتى مقر النادى بالشاطبى

مثل نادى الاتحاد فى تلك المباراة

هانى سرور – محمد عمر – بوبو – يسرى بسيونى – محمد نور – خطورة – صلاح عرفة – عادل البابلى – خميس حسن - عيد أحمد – الجارم

وكان تشكيل النادى الاهلى ثابت البطل – فتحى مبروك – ماهر همام – مصطفى يونس – أحمد عبد الباقى – صفوت عبد الحليم – زكريا ناصف – مجدى عبد الغنى – مصطفى عبده – محمود الخطيب – محمد عباس – فوزى سكوتى – ولعب شريف عبد المنعم فى الشوط الثانى

مصرى حر‏ إلى جماهير الاتحاد السكندرى سيد البلد اون لاين

٧ نوفمبر ٢٠١٧

رساله الي اعضاء نادي الاتحاد السكندري

اعـــداء نادي الاتحاد السكندري

كان ياما كان ياسعد يا اكرام زمان علي ايامي في السبعينات كان في نادي عظيم وفريق جبار جمهوره يهز الجبال فريق يشرف كل البلد وكل الفرق بتعمل له الف مليون حساب فريق فيه عرابي وهاني وبنايوتي لحراسه المرمي محي عثمان وبوبو والكيلاني وبكر واحمد خليل زهره ويسري والسيد كروان واشرف يحي ويسري بسيوني للدفاع وفي نص الملعب كان في شحته ووفكري مرسي وطلعت وحيد حسن وفي الهجوم بابلي وجارم ورزق نصار وسمير مخيمر وعصام شعبان واسف لو نسيت حد معلش السن له احكام كان جمهور النادي هو صاحب النادي كان الاعضاء ميزيدوش علي الف عضو كان نادي له ملعب بمدرجات بيتمرنو فيه ويلعبو الماتشات الرسميه وتدريب الاشبال وماتشات الناشئين والاشبال الرسميه

كان اي فريق في مصر يعمل لنا الف حساب بسببنا اخترعو حاجه اسمها معسكرات يعني يعسكرو عشان هيلاعبو الاتحاد يعني ايه معسكر ده ياعمو اللي الاهلي عاملو لنا سمعنا الاهلي عامل معسكر للاتحاد يعني ايه ؟ يعني هيعملولنا عمل عند شيخ ولا ايه المعسكر ده لا يابني دول بيعسكرولنا يعني تدريب ومحدش يروح بينهم لحد يوم الماتش واللعيبه تبات في النادي ياكلو ويشربو وينامو ويقومو يتدربو بيستعدو للاتحاد والاتحاد بيتدرب يوم التلات والتقسيمه الاربع والمتش يوم الجمعه وبرضو الاتحاد يكسب والي ياخد نقطه مننا في اسكندريه يسجد ويشكر ربه

كانت اياموتلف وتدور الايام هدو الملعب عشان يعملو مكان للاعداء قصدي للاعضاء ماشاء الله وكمان عملو حمام سباحه للاعداء قصدي للاعضاء عشان يتسبحو ويستحمو فيه ماهم مش بيتسبحو في بيوتهم بيستحمو بره بيوتهم ماشي ياعم ومالو قومنا صعبنا عالدوله ياعيني عشان التاريخوالجمهور اتنبح صوت امو عشان يدونا ارض والجمهور يعمل وقفات عاوزين ارض عشان الاتحاد يتدرب نعملو ملعب بدل ماحنا متشحطتين كده من ابو قير لبرج العرب والجمهور ينادي ملعب لله يابلادي الدوله سمعت صوت الجمهور وعشان تاريخ الابطال شحته وبو والجارم والبابلي وعرابي وعمر وطلعت ادونا ارض مش بس كده كمان بنو الارض وعملو ملعبين مش ملعب واحد يلا ياعم هيصو مين الي يهيص ياعم فين مكاني مكانك مين انا الجمهور هقعد فين ياعم اشوف فرقتي ولاعيبتي زي زمان اجي اشوف التمرين واشجع الفرقه لو كسبت والومهم لو خسرو زي زمان لا ملكش مكان خليك قدام التلفزيون احنا عملنا ملعبين وجنينه ومبني اجتماعي

اها طيب نشوف الاعداء الي نازلين انتخابات ونقولهم يمكن في برنامجهم يعملو مدرجات عشان الجماهير الي شبهي بصيت وشوفت ولا مرشح من الاعداء بيتكلم علي فريق الكورة والبطولات ولا عالجماهير الي صنعو الانتصارات اللي عملو التاريخ من قبل ميكون في اعداء ده لولانا احنا الاجيال من الجمهور وابطالنا العظماء من ولادنا اللعيبه الابطال ورب الكعبه مكونتو هتعرفو هو فين نادي الاتحاد

كل اهتمامات المرشجين والاعداء النشاط الاجتماعي ده هيطور المطعم والتاني هيعمل نشاط نسائي وده هيهتم بالاطفال ويعمل مراجيح وده هيطلع رحلات مش رحلات تشجيع للفرقه ياعم بتاعه عم احمد شحته الله يرحمه اما كان بيعمل رحلات للجمهور غشان يشجعو الاتحاد هههههه لا دي رحلات ترفيهيه عشان الاعداء يترفهو ومرشح هيجيب شاشه كبيييييييييييييرة اوي عشان الاعداء يتفرجو علي متش الاهلي والاتحاد واما الاهلي يجيب جول يقومو يهيصوووووو هييييييه وولادهم يدخلو النادي بتيشرت الاهلي والزمالك كمان

وكمان مرشحه افريقيا يازمالك عشان تحسين العلاقات مع الاشقاء اومال ايه

بصراحه وخلاصه الكلام انا خلاص مش بحب الاتحاد الجديد

مبروك ليكم يا اعداء انا دقه قديمه انا بعشق الاتحاد القديم انا بموت في الاتحاد القديم انا ببوس التراب بتاع ملعب الشاطبي القديم الي داس عليه بوبو وشحته وعرابي ومحي وبكر والبابلي والجارم اعزروني عشان انا دقه قديمه مش مع التطور مش مع التقدم انا من الزمن اللي فات مش عاوز زمنكم يا اعداء الاتحاد ويامرشحين الاتحاد ويالاعبين الاتحاد الجديد

انا مع زكرياتي مع كبريائي ومع احبائي الاتحاد القديم شحته وبوبو مهندسين يا ...

جماهير الاتحاد السكندري

جماهير الاتحاد من اعظم واروع جماهير العالم بدون مبالغه جماهير بتعشق الكيان بجد مش فارق معاها بطوله او فوز او هزيمه كل اللي فارق معاها انها تشوف فريقها في مكانه كويسه جمهور مختلف اذا تحدث ينصت له الاخرون لالمامه بفنون وقوانين الرياضه عامه والقدم والسله خاصه وكذلك لحلو كلامه اذ انه اذا تحدث عن ناديه تحس انه عاشق ولاهان بيناجي حبيبه بيسمع عن حبيبه من الكبير والصغير المثقف والغير بشغف عجيب ده الجمهور القديم اما شباب اليوم من الجماهير فتلاقيه تملي مستعجل تملي مشتاق لفوز وراء فوز مشتاق لبطوله حراء في تشجيعه وده اللي عامل الفرق مابين القديم والجديد ولكن في النهايه هي توليفه جميله من جماهير عظيمه لذلك ارجو من هذه الجماهير الواعيه المتحضره ان تعي ان احنا معانا مدرب كبير كان ولازال مرشح لتدريب منتخب مصر واختار لاعبين مزيج من الخبره والشباب من لعيبه الممتاز والدرجه الثانيه ممكن من اول مباراه يكتسح من امامه وممكن لاقدر الله ان ينتكس من اول مباراه او ثلاثه فيجب علينا ان نكون مستعدون لكل ذلك حتي لا نكون اداه ضغط علي المدرب واللاعبين وفي كل الاحوال الكابتن طلعت بيبني فريق سيستمر معانا طويلا فصبرا جميلا حتي يتحقق المراد والله الموفق والمستعان

صور من منشور ‏‎Gamal Abdelhamid‎‏ في ‏نجوم ورموز الكرة المصرية ذكريات الزمن الجميل‏

Gamal Abdelhamid‏نجوم ورموز الكرة المصرية ذكريات الزمن الجميل

٣١ أغسطس ٢٠١٨ ·

اشهر المشجعين فى الملاعب المصرية

عادل شكل ...... زعيم مشجعى سيد البلد

---------------------------------------------------------

يقال ان ابناء الاسكندرية يولدون من بطون امهاتهم وهم يشجعون سيد البلد وزعيم الثغر نادى الاتحاد السكندرى احد اعرق اندية كرة القدم المصرية وعادل محمود علي عبدالحليم، الشهير بـ عادل شكل هو واحد من ابناء عروس البحر المتوسط العاشقين لكرة القدم السكندرية فهو كبير مشجعى نادى الاتحاد السكندري والذى يجلس في مدرجات الدرجة الثالثة، وسط مشجعي سيد البلد ملوحًا بعلمه الأخضرالشهير وعندما يطرق علي الطبلة يهتف هتافاتة الشهيرة ليردد المشجعون وراءه ( مدد مدد مدد الاتحاد سيد البلد ) ، ( لما نقول الاتحاد كله هس ستوب سكوت)

عادل شكل من مواليد عام 1967ورث عشق وحب نادى الاتحاد من والدة حيث كان يذهب معة وهو فى التاسعة من عمرة لمشاهدة مباريات سيدالبلد فى الاستاد وبين الجماهير العاشقة لنادى الاتحاد وعندما التحق عادل شكل بمدرسة عباس العقاد الابتدائيه بالحضرة كان يهرب ( يزوغ ) من المدرسة ليذهب لمشاهدة تدريبات ومباريات الفريق السكندرى وشاء القدر ان يدخل مدرسه الشاطبى الاعداديه بجانب النادى ولم يكن يدخل المدرسه فى يوم يوجد لزعيم الثغر وسيد البلد تدريب او مباراة ليصبح عادل واحد من عشاق نادى الاتحاد السكندرى والذى طبع حبة فى قلبة ومن فرط حبة وعشقة لزعيم الثغر اصرعادل شكل عند ولادة ابنة الاول فى ان يتم لفة فى ملابس خضراء حتى ينشئ على حب سيد البلد و يتربى على عشق زعيم الثغر

وكان رئيس نادي الاتحاد السكندرى فى ثمانينيات القرن الماضى عبد الله علي حسن هو اول من اطلق لقب شكل على عادل محمود علي عبدالحليم لحبه الشديد لناديه، الذي جعله لا يخشى لوم اللاعبين إذا ما حققوا نتائج سلبية في مباراة ما حتى انة شتم وسب لاعبى الفريق السكندرى عندما لعبوا بشكل سيئ فى احدى المباريات

لم يغيب عادل شكل منذ سنوات طويلة عن مباريات نادى الاتحاد السكندرى حيث كان يتواجد بصفة مستمرة فى كل اللقاءات فى الصفوف الاول للمشجعين يقود الهتاف والتشجيع حتى في وقت إقامة جميع مباريات الدوري المصري وغيرها بدون جمهور، كان عادل شكل باخذ طبلتىة وبتصل بمجموعة من المشجعين ويجلسون على احد الكافيهات يهتفون ويشجعون وكانهم فى الملعب

ولم يكن عادل شكل مشجعا عاديا يهتف ويشجع فقط فريقة بل انة كان فى بعض الاوقات منظم للجماهير فى المدرجات والتى كان ايضا يقوم بتامينها كما أطلق شكل حملة : (إن لم تكن اتحادويًا.. فالإسكندرية بريئة منك)، في محاولة منه لجعل الشباب السكندري يظلوا اوفياء لناديهم الكبير وكان ايضا من المؤسسين لمجموعه ( أولتراس أحفاد الإسكندر) وكان ايضا يتدخل لانهاء بعض ازمات الفريق السكندرى ففى عام 2013 نجح عادل شكل فى إنهاء الأزمة التى نشبت حين رفض لاعبو الاتحاد السكندرى النزول لأرض الملعب، وإجراء التدريب اليومى، بسبب عدم الحصول على مستحقاتهم المالية المتأخرة حيث فوجئ اللاعبون بدخول عادل شكل، إلى غرفة خلع الملابس وكادت تحدث أزمة بين الجهاز الفنى، وبين كبير المشجعين، بعد ان هددهم برد فعل قوى من جماهير زعيم الثغر حال إصرارهم على الاعتصام، وعدم خوض التدريبات لينصاع افراد الفريق الى كلمات شكل الذى نجح فى حل الأزمة لينزل اللاعبون لأرض الملعب لاجراء تدريباتهم

وعلاقة عادل شكل بمعظم الاعلاميين والرياضين كانت متارجحة بين الرفض والقبول بسبب بعض تصرفاتة الغريبة ففى احدى البرامج هاجمه خالد الغندور عندما عرض فيديو يظهر فيه "عادل شكل" وسط اللاعبين بعد إحراز هدف: قائلا (يعنى ايه واحد ينزل يهيص مع اللعيبة والماتش لسه شغال )، ليرد شكل على هذا الهجوم : ( بيحبوني ياغندور وأنا شغال في النادي )

ولعل متابعي الاعلامي مدحت شلبى يتذكرون الفقرة الأسبوعية التي كان يقدمها من خلال برنامجة الشهير مساء الانوار على فضائية مودرن سبورت لسماع جمهور الاتحاد بقيادة ( شكل ) يهتف: ( يا صباح الخير يا صباح النصر.. مدحت شلبي ومحمد نصر) فى اشارة الى مقدم ومخرج البرنامج كما ظهر شكل فى العديد من البرامج التليفزيونية اشهرها لقائة واشهر مشجعى الاندية المصرية مع اسعاد يونس فى برمامج صاحبة السعادة

وظهر شكل فى العديد من الفيديوهات ومن اشهرها ذلك الفيديو الذى رقص فية شكل بطريقة هستيريا، أمام كاميرا قناة النهار، بعد تأهل فريق الاتحاد السكندرى إلى دور الـ 8 من مسابقة كأس مصر على حساب بتروجيت عام 2016، أثناء اللقاء التى أجرته القناة مع اثنين من لاعبى فريق سيد البلد وفيديو اخر وهو يقبل كابتن محمود الخطيب ( بيبو ) فعندما كان يظهر الخطيب فى المستطيل الاخضر كان شكل يقوم بتسلق الحواجز الحديدية للوصول إليه، قائلا ( أقسم بالله حبيبي يابيبو ) حيث كان شكل من عشاق فن محمود الخطيب

لكن علاقة عادل شكل الذي كان موظفًا بزعيم الثغر، لم تخلو من المشاكل والازمات ففى عام 2010 القت قوات الأمن بالأأسكندرية القبض على شكل وتوجيه تهمة إثارة الشغب له فى الأحداث المؤسفة التي وقعت في مباراة الزمالك والاتحاد في مباراة كرة السلة والتي انتهت بفوز زعيم الثغر وتدخل محمد مصيلحي رئيس الاتحاد السكندري فى ذلك الوقت بنفسه للتوسط لدى الأمن من أجل الإفراج عن شكل

في عام2011،تم حبس شكل لتورطه في شجار بين عائلتي ( السكس والطنطاوي ) لكن تم إخلاء سبيله، وفصل من النادي إثر هجومه على لاعبي الفريق في التدريبات، ومنع من حضور المباريات التي كان يدخلها بصفته موظفًا بالنادي، ورغم الهجوم الشديد عليه من قبل مقدمي برامج الرياضة، لقي (عادل شكل) استحسانًا من مشجعي الاتحاد وتحول إلي بطل في نظرهم، وتداولوا ( بوستاته وصوره ) وفى عام 2016 احتفل عدد كبير من مشجعى زعيم الثغر بعيد ميلاد كبير مشجعى الاتحاد السكندرى عادل شكل والذى حضرة ايضا مديرعام النادى جاسر منير وبعض من الاعلامين وبعض قيادات وايت نايتس فى الاسكندرية واشعل بعض من الجماهير الشماريخ والاغانى التشجيعية الممتعة احتفالا بعيد ميلاد كبير و زعيم مشجعى سيد البلد

1. Mohamed Mandor
2. ٧ يناير ٢٠١٩
3. مافيش نادي في اوروبا مالوش جمهور، حتى اندية الدرجة الرابعة والخامسة لها محبين ومشجعين.
4. وأنا مقيم في برشلونة من كام سنة حضرت مباراة في كاس الملك وقتها برشلونة كان بيلاعب فريق درجة تالتة من الجنوب الأسباني وحتى مش فاكر اسمه، الفريق كان خسران على ملعبه ومع ذلك سافر وراه جماهير من المقاطعة اللي هما منها معاهم كوفيات بإسم الفريق وحضروا وشجعوا فريقهم رغم انهم موقنين انهم حيخسروا بسكور كبير، مشفتش حد من جماهير برشلونة انتقدهم او اتريق عليهم او استكتر عليهم محاولاتهم للفوز او الاداء المشرف اللي حاولوا يعملوه، وكذلك عمرك ما حتلاقي مشجع اوروبي بينتقد ان فيه جماهير لأندية بتلعب في القسم الرابع والتالت في انجلترا وده بيظهر جدا في مباريات كاس انجلترا وبنلاقي الملاعب مليانة والجماهير متحمسة للفوز على حد من الفرق الكبيرة.
5. اسكندرية مدينة كبيرة من حيث المساحة، وهى التانية بعد القاهرة من حيث عدد السكان، لا هى اسماعيلية ولا بورسعيد الأصغر من اسكندرية كتير في المساحة وعدد السكان والمقفولين الى حد ما على اهلهم، هجرة الريف والصعيد لاسكندرية بحثاً عن لقمة العيش خلت فيه تنوع في كل حاجة،
6. التنوع ده كان طبيعي يكون ادامه تنوع رياضي، ناس منتمية لإسكندرية وبتحبها وبتعشق ترابها وكل ما بتمثله اسكندرية لهم من عظمة وانتماء وسحر وبالتالي بتحب ناديها الرئيسي والرسمي، وناس تانية بتشجع الأهلي او الزمالك بحكم انها من مدن تانية، وناس تالتة اسكندرانية برضة بس بتحب وبتشجع اندية تانية، ممكن تكون بتحب الاتحاد تعاطفاً، لكن مش بتشجعه وبتعتبر تشجيعه مسألة تضييع وقت مع عدم الاخلال بإنتماءهم للمدينة وحبهم ليها
7. جمهور الاتحاد السكندري جمهور كبير جدا والاسكندرانية عارفين ان اغلبية اهالي كوم الدكة والحضرة ومحرم بك وبحري وكرموز وغربال وغيط العنب اتحاداوية، وان نسبة الاهلاوية والزملكاوية في المناطق دي اقل، كلنا كإتحاداوية بنحب النادي على قدر حبنا للبلد وبنشجعه وبنجري وراه، بنتمنى فوزه بالبطولات بس اتعودنا اننا منكسبهاش ومبنزعلش، بنعرف بعضنا بالشبه، لينا قهاوي بإسمنا ومطاعم بإسمنا، مميزين ومعروفين بالإسم، رجالة وجدعان اوي مع بعض ومع غيرنا، شعبيين وعشوائيين وموظفين ومديرين ومدرسين وطلبة وصنايعية واصحاب شركات، نادي شعبي وجمهوره ٩٠٪ منه شعبي، أيامنا مع بعض وسفرياتنا ورا الفريق خارج اسكندرية ومغامراتنا وشقاوتنا وخناقتنا وقعدتنا في الجنينة اللي ادام الاستاد وانتظارنا بالساعات قبل متشات الباسكت في صالة استاد اسكندرية من احلى الأيام اللي عدت علينا في عمرنا، لازم بعد كل متش الفريق يتغلب فيه تلاقي اتنين صحاب بيتخانقوا مع بعض وواحد يقول للتاني منك لله انت جبتني ليه يا عم متجيليش البيت تاني وتتحايل عليا دي فرقة وسخة، هما نفسهم الاتنين في المتش اللي بعده تلاقيهم داخلين الملعب سوا ومبسوطين وفرحانين بكوباية شاى من أم على في الجنينة او ساندوتش طحال من عز ابو طارق الله يرحمه أو كوباية خروب من العربية اللي ادام مستشفى الرمد، وبنفرح اوي لما نلاقي عيل صغير يقولك والنبي يا عمو خدني دخلني معاك عشان بتقول في نفسك اهو اتحاداوي جديد، مدمن البودرة والقمار ممكن يخف بس مدمن الإتحاد مبيخفش أبدًا، كون اننا فريق مبياخدش بطولات دة مش مسبب أزمة نفسية لينا او محسسنا بالنقص او تاعبنا او عاملنا ازعاج زى ما غيرنا بيقول ومعتقد في ده، بالعكس، الاسكندراني بطبعه بيحس انه مميز كونه سكندري، فما بالك لما بيكون اتحاداوي كمان
8. الاتحاد السكندري نادي عظيم، عظمته مستمدة من عظمة جماهيره وطيبتها وعفويتها، جنانها وضحكها وهزارها، خفة دمها، عظمة جمهور الاتحاد في وفاؤه بجد، تشجيع الكورة زيه زى أهلك كدة مفهوش إختيار، ناديك بيخطفك خطف وياخدك من نفسك فتلاقي روحك بتحبه وتشجعه ومتعاطف معاه ومستمر معاه في كل الأحوال، القضية مش قضية خسارة ومكسب دي قضية تعلق، قلبك بيتجه ناحية نادي معين وحبه وتفاعل معاه وانسجم بيه رغم ان اغلب جماهير الاتحاد حاليًا وانا منهم مشافتش بطولة لكنهم لسه على العهد، جماهيره معتبرين الإتحاد ده نصيبهم من الدنيا وراضيين بالنصيب دة وسعداء بيه، ناس بتقول على نفسها ستظل اوفياء رغم انهم بياخدوا بطولة تقريبا كل كام سنة او احيانا كل سنة، عاوز تعرف ايه هو الوفاء الحقيقي اسأل عن جمهور الاتحاد اللي فريقه من سنة ١٩٧٦ مأخدش بطولة ومستمر ومستمتع بتشجيع الإتحاد وبيعلم ولاده يشجعوه وبيحببهم فيه وبياخدهم معاه الاستاد ويعلمهم ينتموا لنادي كان ومازال وسيظل فخر لمشجعيه ومحبيه

Hany Elhon نشيد الاتحاد .... by * elhon

انا اصلى اسكندرانى والرجوله عنوانى

لو حد بيتحدانى يبقى على نفسه جانى

من صغرى ومن زمان وانا بعشق الكيان

فى الفرح لو كسبان اكون اسعد انسان

فى الحزن لو خسران اصبر ولو زعلان

دلوقتى بتسألونى وعايزين تعرفوا كمان

مين اللى افديه بعيونى وايه هو الكيان

طبعا ومهما اقول ولا يكفيه كلام

لو شغلتوا العقول كنتوا عرفتوا اوام

كلامى ع الاتحاد يا ساده يا كرام

اوووووه الاتحاد سيد البلد

اووووووه عشق من جد لولد

كلمات hany elhon