Un Nadal máis, visitamos aos nosos maiores nas residencias de Marín. Con moita ilusión preparamos panxoliñas, xogos e manualidades e recibimos algún que outro agasallo pero, sobre todo, desfrutamos de momentos cheos de agarimo e aprendizaxe CONECTANDO XERACIÓNS.

Grazas a Saraiva, Afapo, Residencia do maior e Centro de día por facelo posible. 

Esta actividade enmárcase no programa de Centros Referentes na modalidade de Proxectos de Inclusión Educativa (PIE) - CONVIVENCIA da Consellería de Educación. 

Entre sustos e risas, o SAMAÍN trouxo á Laxe uns obradoiros emocionantes, cheos de contos arrepiantes, experimentos misteriosos, maquillaxe terrorífica, decoración de cabazas e ata unha sala sensorial.

Foi unha xornada chea de imaxinación, creatividade e diversión, na que o cole se encheu de cores, luces e sons que fixeron desta xornada unha auténtica festa do outono.

Grazas ás familias e á ANPA pola vosa colaboración e implicación, sempre dispostas a participar. 

Esta semana abrimos as portas a un novo curso. Iniciamos un novo camiño que traerá ilusións, retos e aprendizaxes compartidas. E con el chega tamén a pregunta que acompañará aos nosos "SENTINELAS DO LEGADO" durante todo o curso: E ti, de quen vés sendo?

O reencontro veu acompañado pola música de Fentos e frouma, unha banda sonora que nos fala do que fomos… e do que queremos seguir sendo. 

Foron días de acollida, de presentacións, de dinámicas de grupo e de pequenas actividades que nos axudaron a coñecernos mellor e a poñer en marcha esta viaxe común que agora comeza e da que daremos boa conta a través desta xanela. Benvidas/os!