Om leseplanen
Arbeidet med leseplanen tok til i 2020, som eit ledd i desentralisert kompetanseutvikling (dekomp). Desentralisert kompetanseutvikling, er ein del av den nye modellen for kompetanseutvikling i skulen, og vert omtalt i Stortingsmelding 21 (2016-2017) Lærelyst - Tidlig innsats og kvalitet i skolen, nærare bestemt i Kapittel 8 Kompetanseutvikling i skulen.
Ordninga legg til rette for at val av utviklingsområder skal være desentralisert og gir rom for lokal tolking. Dette gjer at ordninga vil bli tolka på ulike måtar rundt om i landet. Viss du ynskjer å lese mer om bakgrunnen og grunntanken for denne ordninga, kan du lese meir på Utdanningsdirektoratet sine sider.
Eit sentralt element i den desentraliserte ordninga er likeverdig og gjensidig forpliktande partnerskap mellom skular, skuleeigarar og høgskular/universitet. Det primære formålet er skuleutvikling, og partnerskapet skal bidra til gjensidig læring og vidareutvikling av lærarutdanningane. Dette blir gjerne omtalt som det «doble formålet» (NOU 2022:13, s. 120-21).
Samarbeidet mellom kommunane i Sjustjerna vart fordelt etter behov. Kommunane Sande, Ulstein og Herøy hadde lesing som sitt primære val for utvikling. Det vart etablert ei arbeidsgruppe som bestod av ein leiar frå oppvekstkontoret i kvar av dei tre kommunane. Desse har utgjort ei arbeidsgruppe som saman med representantar for lærarutdanninga ved høgskulen i Volda har samarbeidd i ei utvida arbeidsgruppe. Gruppa har vore leia av ein koordinator.
Bakgrunnen for utviklingsvalet er i hovudsak knytt til negativ utvikling i leseresultat på nasjonale prøver – i hovudsak for 5. trinn. Saman med andre observasjonar og kartleggingar, såg vi eit behov for å utvikle ein tydeleg struktur og progressiv oppbygging over begynnaropplæring, lesing som grunnleggande dugleik og lesing i alle fag frå 1. – 10. trinn.
Som grunnleggande førebuingar har vi hatt åtte møter i nettverk. Den første tida måtte møta finne stad i eigen kommune og på eigen skule grunna pandemien covid 19. I august og november 2022 fekk vi endeleg halde samling i nettverk på tvers av dei tre kommunane. I dei åtte nettverksmøta har vi hatt desse tema:
1. Sikre språkutvikling i barnehage og begynnaropplæringa i skulen. Trygge overgangen mellom barnehagen og skulen.
2. Kjenneteikn på den gode leselæraren.
3. Den engasjerte lesaren.
4. Tidleg innsats i leseopplæringa.
5. Når vanskar oppstår.
6. Ulike type lesarar.
7. Analyse av resultat og heilskapleg leseopplæring.
8. Frå god praksis til god, felles praksis.
Det vart oppretta ei ressursgruppe av 7 lærarar frå dei tre kommunane som dekte kompetansebehovet for 1.-4. trinn, 5.-7. trinn og 8.-10. trinn. Ressursgruppa har saman med den utvida arbeidsgruppa, hatt fem dagsamlingar der dei har arbeidd med å systematisere tilbakemeldingar frå gruppearbeida i nettverkssamlingane. Det vart bestemt å utarbeide ein digital leseplan beståande av to delar:
1. Trinnvise plakater med fokus på forventa kompetanse.
2. Ein digital del med utfyllande informasjon og hjelpemiddel for å nå kompetansemåla.
Den utarbeidde leseplanen omfattar lesing i alle fag i skulen. Målet med planen er å få eit betre og meir felles arbeid med språkstimulering og leseopplæring i skulane i Sande, Ulstein og Herøy. Læraren /pedagogen si rolle som modell vert vektlagt: Den vaksne er modell i alle situasjonar, gjennom innlæring av ulike metodar og læringsstrategiar og gjennom å motivere til lesing.
«Størst i verda er alfabetet, då all visdom finst i det, utanom dugleiken å setje det saman.»
- Lewis Carroll-
Alle rektorar og lærarar har ansvar for å ta planen i bruk på eigen skule.
Det skal arbeidast bevisst med språk og lesing i alle fag og læringssituasjonar.