เรื่อง ข้าวรวงเอียด

          มีครอบครัวอยู่ครอบครัวหนึ่ง สามคนพ่อแม่ลูก ทำนาปีนั้นนแล้งแหละ แล้งปีนี้ บังเกิดพอข้าวสุกข้าวรวงเอียด ที่นี้พอข้าวสุกแล้วไปเก็บข้าวสามพ่อลูกแม่ เก็บถึงเมียนั้นขี้คร้านว่าข้าวรวงเอียด เลยบอกผัวว่า "กูหลบไปปั่นผ้ายดีหวา กูไม่เก็บแล้วข้าวรวงเอียดฮึ" ผัวว่า เออ หมึงไปแหละกูเก็บ พอว่าผัวเก็บๆ เสร็จแล้ว นวดไปตากแล้ว ตากแล้วเอาปลาหมอมาแกง แกงเสร็จแล้วกะกินข้าว กินข้าวสองคนพ่อลูก กินแล้วว่า "ข้าวรวงเอียดนี่หินหรอยลูกนะ แกงกับปลาหมอมัน" นั่งซดบ่นพลางอยู่พันนั้นแหละ นั้นเมียได้ยินเข้ากะน้ำลายไหลแหละ รู้สึกอยากข้าวขึ้นมั่งแล้วแหละ พอผัวกินเสร็จแล้วกะไปนอนหลับเสีย ลูกกะไปเล่นเสีย เมียไปถึงกะแลหม้อข้าว เข้าไปถึงเปิดแล้วกะล้วงกิน ล้วงกินไปพอแยงหัวไปในหม้อ ที่นี้หม้อมันติดหัวกะไม่รู้อิทำพรื่อ กะออกไปฟัดกับหัวนอ นี่ตรงหัวนอไม่ตรงไปตรงเอาหัวผัวมัน รู้สึกขึ้นมารบกัน รบกัน ตีเมียหนีไปพลางพ้น.

แหล่งที่มา : นางเยื้อน สุวรรณมลิงวงศ์ อายุ 59 ปี บ้านเลขที่ 24 หมู่ที่ 2 ตำบลทุ่งพลา อำเภอโคกโพธิ์ จังหวัดปัตตานี 

ต้นฉบับ