SA KAMATAYAN, SUMILANG ANG KALAYAAN

Si Benigno “Ninoy” Aquino Jr. ay kinikilalang simbolo ng tapang at pagmamahal sa bayan. Sa kabila ng pananakot at panganib, buong puso niyang ipinaglaban ang kalayaan ng mga Pilipino. Ang kanyang sakripisyo ay nagbibigay-buhay sa demokrasya at nananatiling inspirasyon ng tunay na pag-ibig sa bayan. 

Written by: Lady Diana Savellano

Layout by: Angel Marigondon
Illustrated by: Ryza Camille Dela Cruz

August 21, 2025 | 1:13 PM

Sa panahong madilim at mapanganib,

Ninoy ay tumindig, tinig ay matatag.

Tinig ng katotohanan sa harap ng panganib,

Bawat salita’y apoy ng paglaya,

Bawat hakbang, alay sa bayang mahal.

Sa kulungan, di naglaho ang pag-asa,

Panulat at pananalita’y ginamit sa laban.

Binigyan ng tinig ang mga inaapi,

Ipinaglaban ang dangal ng Pilipino,

Hanggang ang tapang ay maging gabay ng bayan.

Nang muling bumalik sa sariling lupain,

Alam niyang buhay ang kapalit ng adhika.

Ngunit para sa bayan, handa siyang masawi,

Dugo niya’y naging binhi ng pagbabago,

At demokrasya’y muling umusbong sa lupa ng lahi.

Kamatayan niya’y hindi naging hangganan,

Kundi simula ng sigaw ng bayan.

Milyon ang nagkaisa sa iisang adhika,

Na ituloy ang kanyang ipinaglaban,

Hanggang tanikala’y tuluyang mabuwag.

Hanggang ngayon, pangalan mo’y buhay,

Sa puso ng kabataan at mamamayan.

Ninoy, huwaran ng tapang at dangal,

Paalala na ang tunay na pag-ibig sa bayan

Ay handang ialay maging ang sariling buhay.