ENCONTRO CON EVA MEJUTO NA BIBLIOTECA DO CASTRILLÓN O 19 DE NOVEMBRO

Catro centros de ensino fomos os que asistimos á Biblioteca do Castrillón para gozar dun encontro coa escritora pontevedresa: O CEIP Fernández Latorre, o CEE María Mariño, o IES Monte das Moas e o IES Monelos, unha nutrida representación do barrio e de barrios cercanos. 

Nós asistimos con alumnado dos Clubs de Lectura; alumnas de 1º ESO que leron A lavandeira de San Simón e de 3º ESO que leron Memoria do silencio; ambas as obras formaron parte do decorrer do encontro.

Logo de realizar Alicia, bibliotecaria do Castrillón, unha breve presentación; chegou a ansiada intervención da autora que partindo de obxectos elaborados pola alumnado participante a modo de reto artellou un percorrido literario que nos trasladou a pequenos e a maiores a un mundo inzado de sensibilidade, igualdade e memoria. 

O percorrido comezou con lecturas e comentarios de libros infantíns: Corre corre cabaciña, A mosca chosca, Maruxa, … que foron ledicia de pequenos e adultos. Continuou coa Lavandeira de San Simón, baseado na historia familiar de Eva Mejuto; historias descoñecidas e esquecidas que se recuperan en momentos concretos das nosas vidas. Rematou comentando a importancia de Memoria do silencio e A ladroa da Biblioteca de Meirás que recollen momentos da historia que non se deben esquecer; como dixo a autora, recollen e transmiten “A MEMORIA”

Alumnado de todas as idades, profesorado, nais e pais participamos e gozamos dunha amena sesión coa autora que nos adiantou parte do traballo que está desenvolvendo, pero iso… é un segredo que polo momento non imos desvelar!

VISITA AOS XULGADOS

O alumnado de 3º de ESO da materia de Valores Éticos realizou unha visita educativa aos Xulgados da Coruña, unha actividade pensada para achegarlles de primeira man o funcionamento do sistema xudicial. A chegada aos xulgados espertou moita expectación, xa que para a maioría era a primeira vez que entraban nun espazo deste tipo.

Durante a xornada, o grupo tivo a oportunidade de presenciar varios xuízos reais. A experiencia foi especialmente impactante porque lles permitiu observar o papel dos distintos profesionais: maxistrados, secretaría xudicial, avogadas e fiscais, e comprender como se desenvolve un procedemento xudicial desde dentro. Algunhas causas resultaron máis sinxelas e outras máis complexas, pero todas lles axudaron a tomar conciencia da importancia das normas e da administración de xustiza na vida cotiá.

Ao rematar, moitos comentaron que a visita lles abriu unha nova perspectiva sobre a responsabilidade individual, as consecuencias legais dos actos e o valor do diálogo e a mediación para evitar conflitos. A actividade converteuse nunha experiencia formativa moi enriquecedora, que probablemente quedará gravada na súa memoria escolar.

DÍA DAS BIBLIOTECAS

Como cada ano, no IES Monelos celebramos dun xeito especial o Día das Bibliotecas. Aproveitamos ese día, o 24 de outubro, para dar a benvida aos integrantes do Club de Lectura do centro e entregámoslles unha invitación “moi doce” para acudir á primeira reunión dos diferentes grupos cos seus profes de referencia, na que se repartiron os libros que compartirán e desfrutarán.

Por outra banda, todos os usuarios que acudiron ese día á nosa biblioteca e levaron un libro emprestado recibiron o agasallo dun marcador.

Ademais, todos e todas puidemos desfrutar da presentación que  Ana Barral, membro do Club de Lectura e profesora de Literatura Universal, elaborou xunto co alumnado da materia e que vos compartimos, xa que de seguro vos gustará tanto como a nós.

ENSAIOS DA OSG

BENVIDA Á BIBLIOTECA!

13 DE OUTUBRO DÍA DAS ESCRITORAS

1975: ESCRIBIDE COMPAÑEIRAS!

Este foi o lema elexido este ano 2025 para celebrar as mulleres escritoras que hai cincuenta anos abriron camiño nun contexto de transición política e social e que reivindicaron coa súa palabras a igualdade e a liberdade.

A celebración deste día reivindica o legado literario das mulleres, tantas veces relegadas a un segundo plano da historia. Quixemos, desde a nosa biblioteca, unirnos a esa reivindicación amosando, nunha pequena exposición, obras escritas por mulleres. Ademais, este 2025 cúmprense 250 anos do nacemento da escritora británica Jane Austen, novelista tamén relegada a un segundo plano na época que lle tocou vivir. 

Austen recolle nunha das súas obras máis emblemáticas un sentimento que recorre a vida das escritoras de todos os tempos: 

"...Desexo, ao igual que todos os demais, ser totalmente feliz; pero, do mesmo xeito que os demais, ten que ser á miña maneira...".

Este sentimento que aparece en Sentido e Sensibilidade e que a autora nos transmite a través da súa protagonista parece un reflexo da súa propia vida.

Na celebración dunha efeméride como esta cómpre recoñecer, é de xustiza así facelo, o valor dos Premios Nacionais que recaeron en autoras galegas nestes últimos anos e, alén diso, o seu valor normalizador por seren autoras que publican na nosa lingua: Yolanda Castaño por Materia, Olga Novo por Feliz Idade, Pilar Pallarés por Tempo fósil, Alba Cid por Atlas, Berta Dávila por Carrusel, Marilar Aleixandre por As malas mulleres, Paula Carballeira por As Alumnas. Chus Pato, por Sonora, Bea Lema por O corpo de Cristo.

GRAZAS A TODAS POR ESCRIBIRDES E ESCRIBIRNOS!

DEFRIT 25-26

A reunión anual de redactores de DEFRIT celebrouse este ano en Toledo (Palacio Cardeal Lorenzana), unha cita pensada para o intercambio de ideas e a reflexión sobre temas de actualidade europea. 

O primeiro día os nosos alumnos e alumnas percorreron a senda ecolóxica do Texo en Toledo, unha experiencia que combina natureza, cultura e inspiración para o xornalismo escolar. Os nosos rapaces e rapazas gozaron dunha mañá chea de aprendizaxe e beleza natural. 

Durante a seguinte xornada, o alumnado participou nunha actividade formativa no Paraninfo da Universidade de Castela-A Mancha (UCLM), no marco do encontro internacional deste proxecto DEFRIT. A sesión comezou cunha charla impartida por unha doutoranda do grupo Europa Direct, centrada no Estado de dereito na Unión Europea. Ao longo do relatorio, o alumnado puido reflexionar sobre os valores fundamentais que sustentan a UE, como a xustiza, a igualdade e o respecto aos dereitos humanos, e sobre os desafíos actuais para a súa preservación. Tras a exposición, os participantes traballaron en grupos internacionais para debater ideas e elaborar propostas de artigos xornalísticos relacionados co tema, que formarán parte dos próximos números do xornal escolar europeo DEFRIT.

O último día participaron nunha actividade na Escola de Tradutores de Toledo, que incluíu unha visita guiada seguida dun taller de escritura medieval.

Pasárono moi ben e así o acreditan as fotos! 

VISITA A PULL&BEAR

FINANZAS PARA MORTAIS

ABRIMOS O ARREDEMO 25-26

Comeza un novo curso escolar no noso IES Monelos e tamén comeza unha nova andaina da nosa revista Arredemo!

Esperamos que pasásedes un moi bo verán e que veñades coas pilas cargadas para afrontar os desafíos que nos deparará o novo curso escolar.

Aqueles alumnos e alumnas interesados en participar como reporteiros da revista Arredemo! podedes enviar un correo a arredemo@iesmonelos.edu.es indicando o voso nome e apelidos, curso, grupo no que estades e cales son as vosas afeccións.

Lembrámosvos en que consistirá esta actividade que se vai a desenvolver durante todo o curso:

- Escribir reseñas das visitas que faga o voso grupo fóra do centro.

- Facer entrevistas a profesores ou a compañeiros que practiquen algún deporte ou que realicen algunha actividade cultural.

- Escribir algunha reportaxe sobre algunha afección que teñades ou sobre algo que vos parece sumamente interesante e que queirades compartir cos lectores da nosa revista.

Animádevos a participar! Ao final do curso o voso traballo terá recompensa en forma de premios ás mellores reportaxes e ao mellor reporteiro ou reporteira.

PAU 2025

Moitas felicidades a todo o noso alumnado de Segundo de Bacharelato por superar a proba de acceso á universidade. 100% de aprobados moi merecidos!

A nosa alumna Cristina Paz foi a mellor nota da PAU na Coruña e terceira de Galicia cun 9,8 na parte xeral. É un premio ao esforzo, á constancia e á dedicación plena. Merécescho, Cristina.  Parabéns!

O NOSO EX-ALUMNO OLIVER LAXE TRIUNFA EN CANNES CO PREMIO DO XURADO

REPORTEIRAS E REPORTEIROS DA REVISTA ARREDEMO

Estamos á espera de reunir ao equipo de reporteiros deste curso 25-26. Agardamos que poidan crear contidos interesantes para vós e que toda a comunidade educativa do IES Monelos coñeza de primeira man o que está a acontecer no noso instituto. 

Moitas grazas por participar deste proxecto!

Os que queirades apuntarvos ainda estades a tempo, escribide un correo a: arredemo@iesmonelos.edu.es