EUROSCOLAS

Vinte e dous estudantes do noso instituto participaron do 6 ao 10 de outubro nunha viaxe a Estrasburgo que combinou o descubrimento do patrimonio cultural europeo cunha experiencia única de participación democrática no Parlamento Europeo, no marco do programa Euroscola.

Durante as xornadas previas á actividade parlamentaria, o alumnado percorreu algúns dos lugares máis emblemáticos da cidade alsaciana. A catedral de Notre-Dame, coa súa impresionante arquitectura gótica e o seu célebre reloxo astronómico, foi unha das visitas destacadas. As rúas e canles da Petite France, as pontes cubertas e os recunchos da Grande Île permitiron descubrir a riqueza histórica dunha cidade marcada polo encontro entre as culturas francesa e alemá. O percorrido cultural completouse cunha visita ao Museo de Artes Decorativas e ao Museo Histórico de Estrasburgo, que achegaron o alumnado á evolución artística, social e política da cidade.

O momento central da viaxe chegou o venres 9 de outubro, cando os nosos rapaces e rapazas se converteron en eurodeputados por un día no Parlamento Europeo. Xunto con mozos e mozas doutros países, participaron nunha xornada de intercambio de ideas, reflexión e debate sobre os retos que afronta a Unión Europea. A actividade incluíu unha sesión de preguntas e respostas cun vicepresidente do Parlamento, unha simulación do traballo parlamentario e un debate sobre a desinformación, que permitiu coñecer de primeira man os mecanismos de participación e toma de decisións nunha institución fundamental para a democracia europea.

O alumnado do IES Monelos tamén tivo ocasión de facer escoitar a súa voz. Carolina Barbeito interveu para reclamar unha revisión da atención que se presta á saúde mental da mocidade, poñendo sobre a mesa unha cuestión que preocupa especialmente ás novas xeracións. Pola súa banda, Xián Bendaña defendeu a necesidade de preservar os valores que deben definir Europa: a democracia, os dereitos e as liberdades, nun contexto internacional cada vez máis complexo. Tamén Noa Vázquez interviu no debate de igualdade de xénero. Catalina Bago tivo a oportunidade de conversar directamente co Eurodiputado Lukas Sieper e Martín Jaspe con Sara Ahnborg, da unidade de Integridade da Información da Dirección General de Comunicación do Parlamento Europeo.

A experiencia en Estrasburgo foi moito máis ca unha viaxe cultural. Supuxo unha oportunidade para comprender mellor o funcionamento das institucións europeas, contrastar puntos de vista con estudantes doutros países e comprobar que a cidadanía europea tamén se constrúe coa participación, o diálogo e o compromiso das novas xeracións.

Para o IES Monelos, esta participación en Euroscola constitúe un recoñecemento ao traballo desenvolvido no marco da súa Escola Embaixadora do Parlamento Europeo e, sobre todo, unha experiencia educativa difícil de esquecer. Os nosos 22 alumnos e alumnas regresaron cunha visión máis próxima de Europa, novas aprendizaxes e a lembranza duns días nos que puideron sentirse, de verdade, parte do proxecto europeo.

FINANZAS PARA MORTAIS

MASTERCLASS DE FÍSICA DE PARTÍCULAS NO IGFAE 

Sirva a presente publicación, que tiñamos esquecida do curso pasado,  para abrir o Arredemo 2026-2027. Mil desculpas ás participantes!

 O pasado 11 de febreiro para celebrar o Día Internacional da Muller e a Nena na Ciencia, dúas alumnas de 1ºBacharelato B asistiron a unha xornada moi especial:

"Masterclass de Física de Partículas no IGFAE".

Alí, Claudia Juiz e Claudia Sanhueza, xunto con rapazas procedentes de 30 institutos de toda Galicia, descubriron as partículas que existen a partir dos datos dos detectores e participaron nunha videoconferencia internacional.

Dende o IGFAE enviaronnos os seguientes enlaces:

Aquí podedes ver a reportaxe no Telexornal da Televisión de Galicia: https://www.g24.gal/-/estudantes-do-igfae-sublinan-o-peso-das-mulleres-na-investigacion-subatomica

E preparamos tamén un pequeno vídeo que vos animamos a compartir nas canles de Instagram dos vosos centros, se as tendes: https://www.instagram.com/p/DUoUT4pjHLN/ 

FÍSICA DE PARTÍCULAS COAS MANS

ESCOLA MENTORA

FALAMOS DE LIBROS

QUEDADA PÚBLICA DE LECTURA

GRADUACIÓN PROMOCIÓN 2024-2026

UN MERECIDO "GRAZAS" PARA OS NOSOS VOLUNTARIOS

SAÍDA CLUB DE LECTURA

RUTA POLO EMBALSE DE CECEBRE

OS DEPORTIVISTAS DE MONELOS TAMÉN SON DE PRIMEIRA!

LEMOS A BEGOÑA CAAMAÑO. 

LETRAS GALEGAS 2026

VISITA DE ESTÍBALIZ ESPINOSA

O pasado día 20 de maio, o alumnado de 4º ESO B e de 3º e 4º PDC tivo o privilexio de recibir a visita da escritora e astrónoma afeccionada, Estíbaliz Espinosa, autora de obras como Orama, Zommm: textos biónicos ou O libro das abellas. Esta actividade, organizada con motivo do Día das Letras Galegas 2026, tivo como obxectivo fomentar o gusto pola poesía e achegar o alumnado ao proceso creativo da autora.

Durante o encontro, a poeta explicoulle ao alumnado a súa experiencia persoal como escritora, enormemente influenciada polo seu gusto pola astronomía, explicando cales son os elementos que emprega como inspiración, como a misión Artemis II ou a próxima eclipse solar da que poderemos gozar este verán, e cales son os pasos que segue no seu labor creativo ata chegar a ter un texto consolidado.

O alumnado participou activamente, tanto con intervencións espontáneas como na rolda de preguntas e finalmente na actividade de creación literaria proposta por Espinosa, da que xurdiron interesantes composicións.

A visita concluíu cunha sinatura dos exemplares que posúe a biblioteca da obra da autora,  que servirán como recordo desta proveitosa visita.

A CORUÑA: IMAXES DO PASADO II

Coincidindo coa Semana das Letras Galegas volveron visitarnos as bibliotecarias do Castrillón: Belén, Luísa e María. 

Seguro que lembrades que hai un tempo publicamos a primeira parte desta actividade proposta pola biblioteca do Castrillón: participar nun concurso literario que tiña por estímulo fotografías antigas da nosa cidade; pois ben, a segunda parte da actividade realizouse o pasado día 14 no noso instituto e, por suposto, viñeron outra vez Belén, Luísa e María.

Agardabamos con ilusión a súa visita porque nos ían desvelar o nome das gañadoras do concurso de relatos que nos propuxeron no mes de febreiro. A expectación foi elevada posto que nos comentaron que calquera dos participantes podería ser gañador ou gañadora porque o nivel de expresión e redacción era merecedor de recibir un premio. 

Logo de realizar unha breve introdución sobre o significado da escrita nunha semana de celebración como esta e despois de departir co alumnado, chegou o momento de coñecer as premiadas e Belén, María e Luísa foron abrindo os sobres e revelando os nomes das gañadores:

Nerea Pérez Guerra (3º ESO A). Carla López Canosa (3º ESO A) e Tatiana López Pena (3º ESO B).

Lemos os textos gañadores: póeticos os de Nerea e Carla, narrativo o de Tatiana.

O agasallo que recibiron Nerea, Carla e Tatiana foi unha bolsa que contiña material escolar.

Agardamos que o curso que vén se repita o concurso e que o alumnado desfrute tanto como o fixo este curso.

PARABÉNS A TODOS E TODAS!

VISITA DO ESCRITOR NANDO LÓPEZ

O pasado martes 12 de maio comezamos as clases coa agradable visita de Nando López, o autor de libros como El reino de las Tres Lunas, Malditos 16 ou Hasta nunca, Peter Pan. E viunos de perlas, pois o mércores en 1º ESO seica tiñan a proba de lectura da primeira das obras mencionadas. Desmenuzou o libro que traballamos explicándonos as causas que o levaron a situalo na época medieval e contounos que o feito de que tratase o tema dos abusos non foi unha casualidade. Falamos ao redor del de todo: de ditaduras, de maxia...

Tamén explicou un pouquiño as razóns que o levaron a deixar as aulas como profesor para adicarse por enteiro ao oficio da escritura. Contounos o afortunado que se sinte de que lle paguen por algo co que disfruta tanto e animounos a ler outros títulos seus dos que avanzou un pouquiño o contido: Teníamos 15 años, Inventando a Lope y Nadie nos oye.  E claro, acabamos con sesión de sinaturas adicadas e fotos. Xa é o segundo ano que nos visita e esperamos poder contar con el para o ano con novos títulos.

I OLIMPÍADA BIOLOXÍA ESO

Un grupo de alumnos e alumnas de 4º da ESO do noso centro participou recentemente na I Olimpíada de Bioloxía para a ESO, unha iniciativa educativa que busca fomentar o interese pola ciencia e polo coñecemento do mundo natural entre o alumnado máis novo.

A experiencia resultou moi enriquecedora, xa que lles permitiu poñer en práctica os coñecementos adquiridos na aula, enfrontarse a novos retos e compartir unha xornada de aprendizaxe con estudantes doutros centros. Ademais, a participación nesta actividade contribuíu a potenciar valores como o esforzo, a curiosidade científica e o traballo constante.

Desde o centro queremos felicitar ao alumnado participante pola súa implicación, entusiasmo e excelente actitude, así como agradecer ao profesorado de Bioloxía o seu apoio e acompañamento durante a preparación da olimpíada. Sen dúbida, esta primeira edición converteuse nunha oportunidade moi positiva para seguir promovendo vocacións científicas entre a nosa mocidade.

DÍA DO LIBRO 23 DE ABRIL

LECTURA CONTINUADA DE EL QUIJOTE

PROXECTO TELÉMACO 

O IES Monelos desenvolveu ao longo do curso o Proxecto Telémaco, un programa orientado á atención do alumnado con altas capacidades e alto rendemento, co obxectivo de acompañalo no seu desenvolvemento persoal, emocional e vocacional.

Dentro deste proxecto leváronse a cabo diferentes actuacións complementarias. En primeiro lugar, o alumnado realizou un test de orientación vocacional, unha ferramenta que lles permitiu coñecer mellor os seus intereses profesionais e abrir novas perspectivas de futuro.

Así mesmo, participaron nun taller centrado no autocoñecemento, as emocións e a resiliencia, no que puideron reflexionar sobre a súa identidade, aprender a identificar e xestionar emocións e adquirir estratexias para afrontar dificultades con maior seguridade.

O programa completouse cun taller de orientación vocacional, enfocado a analizar as opcións académicas e profesionais tras o Bacharelato, comprender a relación entre estudos e profesións, e traballar a toma de decisións a través da elaboración dun plan persoal de futuro.

Finalmente, o encontro con mentores e mentoras, antigos alumnos e alumnas do centro, permitiu achegar ao alumnado experiencias reais tanto da etapa formativa como do mundo laboral, ofrecendo unha visión práctica e próxima dos distintos camiños posibles.

O Proxecto Telémaco supón unha aposta por unha educación máis personalizada, que atende non só ao rendemento académico, senón tamén ás necesidades emocionais e ás inquedanzas vocacionais do alumnado, acompañándoo nun momento clave da súa vida.

EXPOSICIÓN PARLAMENTO EUROPEO

O pasado día 21 de abril tivo lugar no Parque de Oza unha actividade moi especial organizada polo noso centro: a exposición sobre o Parlamento Europeo, elaborada polo alumnado dentro do programa de escolas embaixadoras.

A iniciativa permitiu achegar á cidadanía o traballo realizado nas aulas, sendo as alumnas embaixadoras junior de 4º de ESO —Noa, Lara, Vera, Eva, Paula e Inés— as encargadas de explicar os contidos da exposición, resolver dúbidas e dialogar co público asistente.

O acto contou coa presenza de representantes dos distintos partidos políticos do Concello da Coruña: polo PSOE, o concelleiro de Educación Juan Ignacio Borrego Vázquez; polo PP, Miguel Lorenzo Torres e Carlos San Claudio; e polo BNG, Francisco Jorquera. Durante a xornada, tiveron a oportunidade de conversar co noso alumnado, xerando un espazo de intercambio de ideas e reflexión arredor do funcionamento das institucións europeas e a súa influencia na vida cotiá.

A actividade desenvolveuse nun ambiente participativo e enriquecedor, no que se puxo en valor o compromiso do alumnado coa educación cívica e europea, así como a importancia de levar a aprendizaxe máis alá das aulas e compartila coa contorna.

A continuación, recóllense as reseñas publicadas na prensa sobre este evento.

METEOESCOLAS E ESCOLAS VERDES EXCELENTES

ALUMNADO GAÑADOR CONGRESO CIENTÍFICO INKRUSTADO

VISITA AO XORNAL "LA VOZ DE GALICIA"

VISITA AO CASTRO DE ELVIÑA

PERIODISMO vs FAKE NEWS

O alumnado do xornal escolar DEFRIT e do proxecto Telémaco asistiu recentemente a unha charla moi enriquecedora sobre o xornalismo e a súa relación co fenómeno das fake news, impartida por un xornalista de La Voz de Galicia chamado César Rodríguez.

Durante a sesión abordáronse cuestións de gran actualidade, como a desinformación e a facilidade coa que, en ocasións, somos capaces de crer calquera contido que circula por internet. O relator fixo fincapé en como cambiaron os hábitos informativos da mocidade, que hoxe en día se informa maioritariamente a través das redes sociais, convertidas xa máis en plataformas de consumo de contido que en espazos de interacción social.

Outro dos aspectos máis interesantes da charla foi a reflexión sobre a necesidade de desenvolver un espírito crítico ante as noticias que recibimos. O xornalista explicou diferentes estratexias para detectar información falsa, como analizar con atención os titulares, comprobar as fontes ou desconfiar de contidos excesivamente impactantes. Tamén se abordou o tema dos deepfakes, unha das formas máis sofisticadas de manipulación dixital, que require unha maior formación mediática para ser identificada.

Tratouse dunha actividade moi útil e necesaria que permitiu ao alumnado tomar conciencia dos perigos da desinformación e da importancia dun consumo responsable e crítico da información no mundo actual.

CONCERTO FINAL DE TRIMESTRE

DÍA DAS ARTES GALEGAS 2026

Para conmemorar o Día das Artes Galegas 2026, Xurxo Lobato, fotógrafo e exalumno do IES Monelos, ofreceu unha charla sobre o fotógrafo José Suárez  a quen homenaxea este ano a Real Academia Galega de Belas Artes.

EDUCACIÓN CÍVICO-TRIBUTARIA

TALLER BANCO DE ESPAÑA

OLIMPÍADA DE ENXEÑERÍA DE CAMIÑOS

A CORUÑA: IMAXES DO PASADO

REIMAGINA LA CIENCIA

O día 12 de febreiro o alumnado de 3º ESO participou no programa "Reimagina la Ciencia", que este ano tivo como contido relevante os ensaios clínicos.

O grupo Big Van Ciencia ofreceu una serie de Monólogos científicos nos que se trataron temas como o cancro, as dianas terapéuticas e os radioligandos, facendo reflexionar ao alumnado sobre o papel dos ensaios clínicos na loita de enfermidades relacionadas coa oncoloxía.

Foi un espectáculo motivador e divertido onde apareceron heroes moi coñecidos  e  no que tamén houbo tempo para a participación  do alumnado, destacando neste punto o alumnado do noso centro que se mostrou moi aberto e activo á hora de participar, especial mención a  Loreto pola súa gran representación dun  "ligando".

DÍA DE ROSALÍA 2026

A METADE INVISIBLE DA CIENCIA

O día 11 de febreiro de cada ano celébrase o día internacional da muller e a nena na ciencia. No marco da conmemoración desta data, o alumnado da materia de Bioloxía e xeoloxía de 4º de ESO acudiu a unha actividade no Teatro Colón.

Trátase da experiencia titulada: "A metade invisible da ciencia", desenvolvida dentro do evento de comunicación científica Coruña Comunica Ciencia.

Os científicos e divulgadores Iria Ollero e David Ballesteros foron expoñendo un relato cronolóxico de mulleres que fixeron ciencia ao longo da historia, e a escaso ou nulo recoñecemento ás súas aportacións, así como as duras condicións nas que se tiveron que desenvolver.

Ao mesmo tempo, íase transmitindo a idea da necesidade de contar coa totalidade da sociedade para facer ciencia, contando con ambos sexos tanto como investigadores como tamén á hora de levar a cabo ensaios clínicos.

Constatouse que estamos avanzando cada vez máis nesa senda, pero que é importante seguir dando a coñecer e concienciando.

Intercalando ese tema, cuestionáronse "crenzas" científicas e realizáronse algúns experimentos, nos que tiveron a ocasión de participar os alumnos e alumnas asistentes.

VISITA AO MUSEO DE BELAS ARTES

CORUÑA COMUNICACIENCIA

FEIRA DAS UNIVERSIDADES

A Feira das Universidades celebrouse no noso instituto cun grande éxito de participación e interese por parte do alumnado. Durante a xornada, estudantes de diferentes cursos tiveron a oportunidade de coñecer de primeira man a oferta académica de diversas universidades e centros de educación superior, así como resolver dúbidas sobre graos, saídas profesionais, bolsas e requisitos de acceso.

Os postos informativos, atendidos por profesorado universitario e persoal orientador, ofreceron asesoramento personalizado e materiais divulgativos que facilitaron unha visión clara das opcións formativas tras o Bacharelato e a FP. 

Desde o instituto valoramos moi positivamente esta iniciativa, que se consolida como unha actividade clave dentro do noso plan de orientación académica e profesional. Agradecemos a colaboración das universidades participantes e o interese mostrado polo alumnado, verdadeiro protagonista dunha xornada enriquecedora e inspiradora.

CAMPEONATO RUGBY CINTA

OLIMPÍADA INFORMÁTICA GALEGA 2026

ANNIE LEIBOVITZ

VISITA Á BIBLIOTECA GONZÁLEZ-GARCÉS

VOLUNTARIOS NA BIBLIOTECA

FARSAS FINANCEIRAS NAS RRSS

HEROÍNAS E HEROES DA LITERATURA

PECHE DO CALENDARIO DE ADVIENTO LECTOR

Coa apertura das últimas caixas, o Calendario de Advento de Recomendacións Lectoras chega ao seu fin no IES de Monelos, deixando tras de si semanas cheas de libros, ilusión e encontros arredor da lectura.

Ao longo de todo o mes de decembro, o alumnado do club de lectura converteuse no verdadeiro motor da actividade: cada día abrían a caixa correspondente e percorrían as aulas da ESO para presentar o libro do día, compartir a súa experiencia lectora e deixar fragmentos das obras para seren lidos durante a hora de lectura. Grazas a este xesto, moitos rapaces e rapazas tiveron o seu primeiro contacto con títulos que, nalgúns casos, xa están a buscar na biblioteca.

O calendario non só serviu para recomendar libros, senón tamén para crear rutinas lectoras, fomentar o diálogo literario e facer visible o papel do alumnado como mediador cultural. Os corredores enchéronse de expectación diaria e as aulas de novas historias por descubrir.

Pechamos este calendario coa satisfacción de comprobar que a lectura segue a ser un punto de encontro no noso centro e coa esperanza de que moitos destes libros continúen acompañándonos máis alá do Nadal.

A NOSA COCIÑA ESTÁ CHEA DE QUÍMICA E É SÁ

CONCERTO DE NADAL 2025

VISITA Á EXPOSICIÓN DE PINTURA ÁLVAREZ DE SOTOMAYOR

XOSÉ DÍAZ NO IES MONELOS

Xosé Díaz estivo no noso centro falando sobre a vida e a obra do seu pai, Isaac Díaz Pardo, a quen este ano a Real Academia Galega de Belas Artes adicou o día das Artes Galegas 2025. 

Moitas grazas Xosé por compartir a túa pasión e o teu coñecemento. 

CONMEMORAMOS O ANO CASTELAO 

Coa inestimable axuda das alumnas que participan no voluntariado da biblioteca, realizamos na unha actividade coa alumnado de 1º da ESO. 

Logo dunha breve presentación sobre a figura do insigne escritor, debuxante e político, comezamos co “Reto CASTELAO”, idea orixinal de Rebe Lemat do IES Chan do Monte de Marín e a quen agradecemos que o compartise.

O obxectivo do xogo é descubrir a frase agochada ao remate da viaxe proposta seguindo os pasos das seis etapas en que se artella o reto. Foron habilidosos e habilidosas e axiña atoparon a solución: SE AÍNDA SOMOS GALEGOS É POR OBRA E GRAZA DO IDIOMA. 

Agradecemos a colaboración de Ane, Carolina, Eugenia, Paula, Rosalía e Zeltia que guiaron aos compañeiros e compañeiras de 1º ESO na súa propia viaxe de descoberta e a quen lles explicaron o significado da tan coñecida sentenza do autor.