History

പഴയിടം വിശുദ്ധ മിഖായേൽ മാലാഖയുടെ പള്ളി – ചരിത്രം

ഒരു പള്ളിയുടെ ആവശ്യകതയിലേക്ക്

പഴയിടത്തെ ആദ്യ കുടിയേറ്റക്കാരിൽ ബഹുഭൂരിപക്ഷവും ക്രൈസ്തവ കത്തോലിക്കാ വിശ്വാസികളായിരുന്നു. ആഴ്ചതോറും മതകർമ്മങ്ങളിൽ പങ്കെടുക്കുന്നതിനായി മണിമല, ചെറുവള്ളി, ചിറക്കടവ് എന്നിവിടങ്ങളിലെ പള്ളികളിലേക്കായിരുന്നു അവർ പോകേണ്ടിയിരുന്നത്. നദി കടക്കേണ്ടതും ദൂരവും അവർക്കു വലിയ ക്ലേശമായിരുന്നു.

അക്കാലത്ത് പഴയിടം പ്രദേശം ചിറക്കടവ് പള്ളിയുടെയും ചെറുവള്ളി പള്ളിയുടെയും അതിർത്തിക്കുള്ളിലായിരുന്നു. ഇന്ന് പഴയിടം പള്ളി സ്ഥിതി ചെയ്യുന്ന ഭാഗവും “മീൻമുട്ടി” തോടിന്റെ കിഴക്കുവശത്തുള്ള പ്രദേശവും ചിറക്കടവ് പള്ളി ഇടവകയിലും, തോടിന്റെ പടിഞ്ഞാറുവശത്തുള്ള പ്രദേശം ചെറുവള്ളി പള്ളി ഇടവകയിലും ഉൾപ്പെട്ടിരുന്നു. കുടുംബത്തിലെ ആരെങ്കിലും മരിച്ചാൽ മൃതദേഹം സംസ്കരിക്കുന്നതിനായി മൈലുകൾ ചുമന്ന് ബന്ധപ്പെട്ട പള്ളികളോടനുബന്ധിച്ചുള്ള സെമിത്തേരികളിൽ എത്തിക്കേണ്ടി വന്നു. മഴക്കാലത്ത് വാളക്കയം കടത്തുകടവ് കടന്നുവേണം പോകുവാൻ. ഈ സാഹചര്യത്തിൽ പഴയിടത്ത് ഒരു പള്ളി സ്ഥാപിക്കുക എന്നത് അടിയന്തര ആവശ്യമായി മാറി.

പഴയിടം പള്ളി സ്ഥാപിക്കാനുള്ള ശ്രമങ്ങൾക്ക് തുടക്കം – 1921

പഴയിടം പള്ളിയുടെയും സ്കൂളിന്റെയും ചരിത്രം ആരംഭിക്കുന്ന കാലത്ത് ചിറക്കടവ് (താമരക്കുന്ന്) പള്ളിയുടെ വികാരി പാലാ ളാലം പുത്തൻപള്ളി ഇടവകയിലെ കുരിശുംമൂട്ടിൽ ബഹുമാനപ്പെട്ട ചാണ്ടിയച്ചനായിരുന്നു. അക്കാലത്തെ ഇവിടുത്തെ നാട്ടുകാർ ചേർന്ന് പുതിയ കുടിയേറ്റപ്രദേശമായ പഴയിടത്ത് ഒരു പള്ളി സ്ഥാപിക്കുന്നതിനുള്ള ശ്രമങ്ങൾ 1921-ൽ ആരംഭിച്ചു.

പ്രദേശത്തിന്റെ വിവിധ ഭാഗങ്ങളിൽ താമസിച്ചിരുന്ന കത്തോലിക്കാ കുടിയേറ്റക്കാർ നേരത്തേ തന്നെ കൂട്ടനേർച്ചകൾ നടത്തിയിരുന്നു. ഏതാനും വീടുകൾ ചേർന്ന് ഒരു സംഘടനയിലെ അംഗങ്ങളെന്ന നിലയിൽ മാസത്തിൽ ഒരിക്കൽ ഓരോ വീടുകളിലും മാറിമാറി സമ്മേളിക്കുകയും പ്രാർത്ഥനയ്ക്കുശേഷം ലഘുഭക്ഷണം കഴിച്ച് പൊതുതാൽപര്യമുള്ള വിഷയങ്ങൾ ചർച്ച ചെയ്യുകയും സംഘടനയുടെ ഫണ്ടിലേക്ക് ചെറിയൊരു തുക സംഭാവന നൽകുകയും ചെയ്തിരുന്നു.

ഭാവിയിൽ ഈ പ്രദേശത്ത് നിർമ്മിക്കുന്ന പള്ളിയുടെ ആവശ്യങ്ങൾക്കും അത്യാവശ്യ കാര്യങ്ങൾക്കുമായി ഉപയോഗിക്കേണ്ട ഫണ്ടായിട്ടായിരുന്നു കൂട്ടനേർച്ചയുടെ ഫണ്ട് ഉദ്ദേശിച്ചിരുന്നത്. ചെറുവള്ളിപ്പുരയിടം, കുറിഞ്ഞിപ്പുരയിടം, ചൊലവള്ളി തുടങ്ങിയ പ്രദേശങ്ങളിലും പഴയിടം, ആനക്കല്ല്, ചരൽ എന്നിവിടങ്ങളിലും വാളക്കയത്തും കൂട്ടനേർച്ചകൾ നടത്തിയിരുന്നു.

1921-ൽ പടത്തറമാവു ചേരിക്കലിൽ ഓലമേഞ്ഞ ഒരു താൽക്കാലിക ചാപ്പലും സ്ഥാപിച്ചു.

പഴയിടം പള്ളിക്ക് സ്ഥലം വാങ്ങുന്നു – 1922

പഴയിടം പള്ളിക്കായി സ്ഥലം വാങ്ങുന്നതിനായി കുരിശുംമൂട്ടിൽ ചാണ്ടിയച്ചൻ പഴയിടത്ത് എത്തി സ്ഥലവാസികളുമായി കൂടിയാലോചിച്ചു. ചെറുവള്ളി വില്ലേജിൽ വടക്കേടത്ത് കൃഷ്ണൻ നായരുടെ വക ചേനൽകരയിലുള്ള സ്ഥലം വാങ്ങാൻ തീരുമാനിച്ചു. സർവേ 339/1-ൽപ്പെട്ട സ്ഥലം പഴയിടം പള്ളിക്കായി വാങ്ങി.

685 രൂപയായിരുന്നു ആധാരത്തിലെ വില. അതിൽ 185 രൂപ പണമായും 500 രൂപ നോട്ടിൻപടിയായും നൽകി. 1922 ഓഗസ്റ്റ് 1-ാം തീയതി കാഞ്ഞിരപ്പള്ളി സബ് രജിസ്റ്റർ ഓഫീസിൽ 3391-ാം നമ്പരായി ആധാരം രജിസ്റ്റർ ചെയ്ത് സ്ഥലം വാങ്ങി.

പഴയിടം, വാളക്കയം എന്നിവിടങ്ങളിൽ നടന്നുവന്നിരുന്ന കൂട്ടനേർച്ചകളിൽ നിന്നുള്ള തുകയും നെല്ലായും പണമായും സ്ഥലവാസികളിൽ നിന്ന് പിരിച്ചെടുത്ത തുകയും ചേർന്നതാണ് പണം കണ്ടെത്തിയത്. ആധാരച്ചെലവിനും ഈ തുക വിനിയോഗിച്ചു.

ഈ സ്ഥലത്ത് പള്ളി സ്ഥാപിക്കുന്നതിനാൽ അന്നുമുതൽ വർഷം രണ്ട് രൂപ വീതം വടക്കേടത്ത് കുടുംബത്തിലെ അതാതുകാലത്തെ കുടുംബക്കാരണവർക്ക് നൽകി രസീത് വാങ്ങണമെന്ന വ്യവസ്ഥയും ആധാരത്തിൽ ഉൾപ്പെടുത്തിയിരുന്നു. ആദികാലം മുതൽ അടുത്തകാലംവരെ ഈ തുക നൽകിക്കൊണ്ടിരുന്നു.

പള്ളിപ്പണിക്കുള്ള ആലോചന – 1922 ഓഗസ്റ്റ് 6

ഇപ്പോഴത്തെ പള്ളി സ്ഥിതി ചെയ്യുന്ന സ്ഥലത്തിന് സമീപം, 1922 ഓഗസ്റ്റ് 6-ാം തീയതി ഞായറാഴ്ച കുരിശുംമൂട്ടിൽ ചാണ്ടിയച്ചന്റെ അധ്യക്ഷതയിൽ ദേശവാസികളുടെ യോഗം ചേർന്നു.

ആളുകൾ ഒത്തൊരുമിച്ച് പ്രവർത്തിച്ചാൽ ഏതു വലിയ കാര്യവും സാധിക്കാമെന്ന് ചാണ്ടിയച്ചൻ ആമുഖമായി പറഞ്ഞു. ജനങ്ങളുടെ സംഘടനാശക്തിയും കർമ്മശേഷിയും ഉണർത്തുന്ന രീതിയിൽ അദ്ദേഹം പ്രസംഗിച്ചു. തുടർന്ന് നടന്ന ആലോചനയിൽ പണമായും ആൾപ്പണിയായും നല്ലൊരു തുക വാഗ്ദാനം ലഭിച്ചു.

പള്ളിക്കെട്ടിടത്തിന്റെ നിർമ്മാണം – 1922 ഓഗസ്റ്റ് 22

1922 ഓഗസ്റ്റ് 22-ാം തീയതി പഴയിടം പള്ളിക്കെട്ടിടത്തിന്റെ പണി ആരംഭിച്ചു. ഇപ്പോൾ പഴയിടം പള്ളി മൈതാനം സ്ഥിതി ചെയ്യുന്ന സ്ഥലത്ത് കിഴക്ക്–പടിഞ്ഞാറ് 90 അടി നീളത്തിലും 18 അടി വീതിയിലുമുള്ള കെട്ടിടമാണ് നിർമ്മിച്ചത്.

കട്ടിളകളും ജനലുകളും ഉൾപ്പെടുത്തി കരിങ്കല്ലും കാട്ടുകല്ലും മൺകുമ്മായവും ചേർത്താണ് ഭിത്തികൾ നിർമ്മിച്ചത്. തുടർന്ന് കുമ്മായം കൊണ്ട് വെള്ള തേച്ചു. കിഴക്കേ കുറിയവശത്ത് ഒരു ചാർത്തും നിർമ്മിച്ചു. മേൽക്കൂരയും കട്ടിളകളും ജനലുകളും തേക്ക് ഉരുപ്പടികൾ ഉപയോഗിച്ച് നിർമ്മിച്ച് ഓട് മേഞ്ഞു.

പള്ളിയുടെ നിർമ്മാണത്തിനായി വാഗ്ദാനം ചെയ്ത തുകകൾക്കു പുറമേ തെങ്ങ്, തേങ്ങ, കുരുമുളക് തുടങ്ങിയവയുടെ ഉൽപ്പന്നങ്ങളിൽ നിന്ന് പത്തിലൊന്ന് വീതം പിരിച്ച് ലേലം ചെയ്ത് പള്ളിയുടെ നിർമ്മാണത്തിനും പിന്നീട് പള്ളിയുടെ നടത്തിപ്പിനും സ്കൂൾ നിർമ്മാണത്തിനും ഉപയോഗിച്ചിരുന്നു. ക്ലാസ് തിരിച്ചുള്ള പിടിയരി പിരിവും നടത്തിയിരുന്നു.

പഴയിടം പള്ളിക്ക് “സെന്റ് മൈക്കിൾസ് പള്ളി” എന്ന പേര്

പഴയിടം പള്ളിക്ക് സെന്റ് മൈക്കിൾസ് പള്ളി എന്ന പേര് നൽകാൻ തീരുമാനിച്ചു. കുരിശുംമൂട്ടിൽ ചാണ്ടിയച്ചൻ വികാരിയായിരിക്കുമ്പോൾ അദ്ദേഹത്തിന്റെ ശ്രമഫലമായി ഒരു സെന്റ് മൈക്കിളിന്റെ നാമത്തിലുള്ള കുരിശുപള്ളി സ്ഥാപിച്ചിരുന്നു. അവിടെ പല അത്ഭുതങ്ങളും നടന്നുവന്നിരുന്നു. അതിനാൽ ഇവിടുത്തെ പള്ളിക്കും സെന്റ് മൈക്കിളിന്റെ നാമധേയം നൽകുന്നത് നന്നായിരിക്കുമെന്ന് കുരിശുംമൂട്ടിൽ അച്ചൻ നിർദേശിച്ചതനുസരിച്ചാണ് പള്ളിക്ക് ഈ പേര് നൽകാൻ തീരുമാനിച്ചത്.

കുരിശുപള്ളിയുടെ വെഞ്ചിരിപ്പ് – 1923

കെട്ടിടത്തിന്റെ പണി പൂർത്തിയായതിനെത്തുടർന്ന് പള്ളിക്ക് അനുമതി നേടുന്നതിനുള്ള ശ്രമം ആരംഭിച്ചു. ചിറക്കടവ് (താമരക്കുന്ന്) പള്ളിയുടെ കുരിശുപള്ളിയായിട്ടാണ് ആദ്യ അനുമതി ലഭിച്ചത്. പള്ളി ആദ്യം “പടത്തറമാക്കൽ” കുരിശുപള്ളി എന്നും പിന്നീട് “ആനക്കല്ല്” കുരിശുപള്ളി എന്നും അറിയപ്പെട്ടിരുന്നു.

ഇത് കുരിശുപള്ളിയായി തന്നെ തുടരണോ അതോ ഇടവകപ്പള്ളിയായി ഉയർത്തണമോ എന്നതിനെക്കുറിച്ച് ആദ്യം മുതലേ ചർച്ചയും തർക്കവും ഉണ്ടായിരുന്നു.

1923 ഫെബ്രുവരി 2-ന് താമരക്കുന്ന് പള്ളിയുടെ കുരിശുപള്ളിയായി ചാപ്പൽ വെഞ്ചരിക്കുകയും ആദ്യമായി വിശുദ്ധ കുർബാന അർപ്പിക്കുകയും ചെയ്തു. പ്രഥമ തിരുനാളും ആഘോഷിച്ചു. വിശുദ്ധ മിഖായേൽ മാലാഖയുടെ നാമത്തിലാണ് കുരിശുപള്ളി സ്ഥാപിക്കപ്പെട്ടത്.

ആദ്യ തിരുനാൾ ആഘോഷങ്ങളിൽ റാസ, കച്ചേരി, വിളക്കുമാടം, വെടിക്കെട്ട്, ഞാണിന്മേൽ കളി, നാദസ്വരം, ബാൻഡ്മേളം തുടങ്ങിയ പരിപാടികൾ ഉണ്ടായിരുന്നു.

ഇടവകപ്പള്ളിയായി ഉയർത്തപ്പെടുന്നു – 1924 ഒക്ടോബർ 15

1924 ഒക്ടോബർ 15-ന് ചങ്ങനാശേരി രൂപതാധ്യക്ഷൻ അഭിവന്ദ്യ മാർ തോമസ് കുര്യാളശേരി സെന്റ് മൈക്കിൾസ് കുരിശുപള്ളിയെ ഇടവകയായി ഉയർത്തി.

പിന്നീട് ആനക്കല്ല് പള്ളി, ചേനപ്പാടി പള്ളി എന്നീ പേരുകളിലും പള്ളി അറിയപ്പെട്ടു. 1969-ൽ “പഴയിടം പള്ളി” എന്ന പേരിൽ രേഖപ്പെടുത്തപ്പെട്ടു.

1923-ൽ തന്നെ സെമിത്തേരിയുടെ നിർമ്മാണവും നടന്നു.

ആദ്യകാല വൈദികസേവനം

കുരിശുപള്ളിയുടെ ആരംഭകാലത്ത് ചിറക്കടവ് പള്ളിമുറിയിൽ താമസിച്ചുകൊണ്ട് ചങ്ങനാശേരി പള്ളി ഇടവകയിലെ പുതിയവീട്ടിൽ ബഹുമാനപ്പെട്ട യൗസേപ്പച്ചൻ കുരിശുപള്ളിയുടെ ചുമതല വഹിച്ചു. 01.02.1923 മുതൽ 15.03.1923 വരെയായിരുന്നു അദ്ദേഹത്തിന്റെ സേവനം.

തുടർന്ന് പാലാ ളാലം പുത്തൻപള്ളി ഇടവകയിലെ മുഞ്ഞനാട്ട് ബഹുമാനപ്പെട്ട യൗസേപ്പച്ചൻ കുരിശുപള്ളിയുടെ ചുമതലയേറ്റു. 15.03.1923 മുതൽ 15.02.1924 വരെ അദ്ദേഹം സേവനം ചെയ്തു. പള്ളിയുടെ ചാർത്തുമുറിയിൽ താമസിച്ചുകൊണ്ടായിരുന്നു സേവനം. “അരിച്ചെങ്ങാലി” പക്ഷിയെ വലവെച്ച് പിടിക്കുക അദ്ദേഹത്തിന്റെ ഒരു വിനോദമായിരുന്നു. പിന്നീട് അനാരോഗ്യം കാരണം അദ്ദേഹം സ്ഥലം മാറി.

1924-ൽ അഭിവന്ദ്യ മെത്രാൻ തിരുമേനി കുരിശുപള്ളിയെ പ്രത്യേക അതിരുകളോടുകൂടി “ചേനപ്പാടി സെന്റ് മൈക്കിൾസ് പള്ളി” എന്ന പേരിൽ ഇടവകപ്പള്ളിയായി ഉയർത്തി.

ആദ്യ വികാരി – 1924

കടുത്തുരുത്തി അറുന്നൂറ്റിമംഗലം പള്ളി ഇടവകയിലെ ചേമ്പാലയിൽ ബഹുമാനപ്പെട്ട മത്തായി അച്ചനെ പള്ളിയുടെ ആദ്യത്തെ വികാരിയായി നിയമിച്ചു. 07.04.1924 മുതൽ 14.03.1926 വരെ അദ്ദേഹം സേവനം ചെയ്തു.

അദ്ദേഹം അപസ്മാരം, ഭ്രാന്ത് തുടങ്ങിയ രോഗങ്ങൾ ചികിത്സിച്ച് സുഖപ്പെടുത്തിയിരുന്നു. കൂടാതെ നല്ലൊരു കായികാഭ്യാസിയുമായിരുന്നു.

അദ്ദേഹത്തിനു ശേഷം ഈ പള്ളിയുടെ സ്ഥാപകനായിരുന്ന പാലാ ളാലം പുത്തൻപള്ളി ഇടവകയിലെ കുരിശുംമൂട്ടിൽ ബഹുമാനപ്പെട്ട ചാണ്ടിയച്ചൻ വികാരിയായി ചാർജെടുത്തു. അദ്ദേഹത്തിന്റെ കാലത്താണ് ഗവൺമെന്റ് അംഗീകാരമുള്ള ഒരു എൽ.പി. സ്കൂൾ ഇവിടെ സ്ഥാപിതമായത്.

പള്ളിയോടൊപ്പം വളർന്ന വിദ്യാഭ്യാസ-സാമൂഹിക പ്രവർത്തനങ്ങൾ

പള്ളിയുടെ പ്രവർത്തനങ്ങളോടൊപ്പം സ്കൂളിന്റെയും പ്രദേശത്തിന്റെയും വളർച്ചയും നടന്നു. പള്ളിയുടെ നടത്തിപ്പിനും സ്കൂൾ നിർമ്മാണത്തിനുമായി വിവിധ പിരിവുകൾ തുടർന്നു.

• 1926 – സെന്റ് മൈക്കിൾസ് എൽ.പി. സ്കൂൾ സ്ഥാപിച്ചു.

• 1931 – കരിക്കാട്ടൂർ സെന്റ് ആന്റണീസ് കുരിശുപള്ളി സ്ഥാപിച്ചു.

• 1943 മുതൽ 1946 വരെ – ആദ്യ പള്ളിക്ക് സമീപം ഇപ്പോഴുള്ള പള്ളിയുടെയും പള്ളിമുറിയുടെയും നിർമ്മാണം നടന്നു.

• 1948 – എൽ.പി. സ്കൂൾ നവീകരിച്ചു.

• 1964 – കരിക്കാട്ടൂർ കുരിശുപള്ളി നവീകരിച്ചു.

• 1964-ൽ റവ. ഫാ. മാത്യു ഓണയാത്തുംകുഴി ഇടവകയിൽ ആദ്യമായി മലയാളത്തിൽ വിശുദ്ധ കുർബാന അർപ്പിച്ചു.

• 1966-ൽ സെന്റ് മൈക്കിൾസ് എൽ.പി. സ്കൂൾ യു.പി. സ്കൂളായി ഉയർത്തുകയും പുതിയ കെട്ടിടം നിർമ്മിക്കുകയും ചെയ്തു.

• ഇടവകയുടെ വളർച്ച – 1968 മുതൽ

• 1968 – കോസ്‌വേ നിർമ്മിച്ചു.

• 1969 – പോസ്റ്റ് ഓഫീസ് സ്ഥാപിതമായി. വൈദ്യുതീകരണത്തിന്റെ ഒന്നാം ഘട്ടവും നടന്നു.

• 1971 – പള്ളിയും പള്ളിമുറിയും വൈദ്യുതീകരിച്ചു. അതേ വർഷം തിരുഹൃദയ മഠവും എകെഎം ആശുപത്രിയും ആരംഭിച്ചു.

• 1975 – ഹോളി ഏഞ്ചൽസ് നഴ്സറി സ്കൂൾ ആരംഭിച്ചു.

• 1976 – സെന്റ് മൈക്കിൾസ് സ്കൂളിന്റെ സുവർണജൂബിലി ആഘോഷിച്ചു. അതേ വർഷം പള്ളിക്കു സമീപം കുരിശടിയും സ്ഥാപിച്ചു.

• 1978 – മോണ്ടളം നിർമ്മിച്ചു.

• 1986 – ചേനപ്പാടി സെന്റ് മൈക്കിൾസ് സ്കൂൾ എന്ന പേര് മാറ്റി “പഴയിടം സെന്റ് മൈക്കിൾസ് സ്കൂൾ” എന്നാക്കി.

• 1993 – ദൈവാലയ സപ്തതി ആഘോഷിച്ചു.

• 1995 – പുതിയ വൈദികമന്ദിരം നിർമ്മിച്ചു.

• 1996 – മരോട്ടിച്ചുവട് കുരിശടി സ്ഥാപിച്ചു.

• 2000 – സെന്റ് മൈക്കിൾസ് സ്കൂളിന്റെ പ്ലാറ്റിനം ജൂബിലി ആഘോഷിച്ചു.

• 2001 – മദ്ബഹ നവീകരിച്ചു.

• 2005 – സെന്റ് മൈക്കിൾസ് സ്കൂളിന്റെയും ഓഫീസിന്റെയും നവീകരണം നടത്തി.

• 2009 – സെന്റ് മൈക്കിൾസ് കുരിശടി സ്ഥാപിച്ചു.

• ദൈവാലയ നവീകരണങ്ങളും പുതിയ സൗകര്യങ്ങളും

• 2013-ൽ പുതിയ കൊടിമരം സ്ഥാപിക്കുകയും ദൈവാലയ നവീകരണം നടത്തുകയും ചെയ്തു. പാരീഷ് ഹാൾ, കൽക്കുരിശ്, വിശുദ്ധ മിഖായേലിന്റെ മുഖം, കൽവിളക്ക്, കവാടങ്ങൾ, തിരുസ്വരൂപങ്ങളുടെ കൂടാരം എന്നിവയും ഈ കാലയളവിൽ ഒരുക്കി.

• 2014-ൽ ഗ്രോട്ടോ, കൽവിളക്ക്, കവാടങ്ങൾ, തിരുസ്വരൂപങ്ങൾ എന്നിവ ഒരുക്കി.

• 2019-ൽ പൈതങ്ങളുടെ കൂടാരം ഒരുക്കി.

• 2023-ൽ ഇടവക ശതാബ്ദിയാഘോഷം നടത്തി.

ഇടവകയിൽ സേവനം ചെയ്ത വൈദികർ

ആദ്യകാല കുരിശുപള്ളി ചുമതലക്കാർ ആയിരുന്ന ബഹുമാനപ്പെട്ട അച്ചന്മാർ

1. ബഹുമാനപ്പെട്ട യൗസേപ്പച്ചൻ – പുതിയവീട്ടിൽ
01/02/1923 – 15/03/1923

2. ബഹുമാനപ്പെട്ട യൗസേപ്പച്ചൻ – മുഞ്ഞനാട്ട്
15/03/1923 – 15/02/1924

ഇടവകയിലെ വികാരിമാർ

1. റവ. ഫാ. മത്തായി — ചേമ്പാലയിൽ
1924 ഏപ്രിൽ – 1926 മാർച്ച്

2. റവ. ഫാ. ചാണ്ടി — കുരിശുംമൂട്ടിൽ
1926 മാർച്ച് – 1931 ഫെബ്രുവരി

3. റവ. ഫാ. മത്തായി — തെക്കേക്കര
1931 ഫെബ്രുവരി – 1933 മാർച്ച്

4. റവ. ഫാ. മത്തായി — കോടിക്കുളം
1933 മാർച്ച് – 1937 മെയ്

5. റവ. ഫാ. അലക്സാണ്ടർ — ചെറുകരക്കുന്നേൽ
1937 മെയ് – 1940 മാർച്ച്

6. റവ. ഫാ. മത്തായി — നടുവിലേക്കുറ്റ്
1940 മാർച്ച് – 1941 ഡിസംബർ

7. റവ. ഫാ. തോമസ് — ആയിത്തമറ്റം
1941 ഡിസംബർ – 1947 സെപ്റ്റംബർ

8. റവ. ഫാ. ജേക്കബ് — പൊട്ടനാനിക്കൽ
1947 സെപ്റ്റംബർ – 1951 ജൂൺ

9. റവ. ഫാ. സഖറിയാസ് — കരിങ്ങോഴയ്ക്കൽ
1951 ജൂൺ – 1952 ഡിസംബർ

10. റവ. ഫാ. യാക്കോബ് — കൈമള്ളേട്ട്
1952 ഡിസംബർ – 1954 ജനുവരി

11. റവ. ഫാ. യാക്കോബ് — കാവാലം
1954 ജനുവരി – 1958 മെയ്

12. റവ. ഫാ. മത്തായി — പടവുപുരയ്ക്കൽ
1958 മെയ് – 1964 മെയ്

13. റവ. ഫാ. തോമസ് — നടുവിലേശറമ്പിൽ
1964 മെയ് – 1970 മാർച്ച്

14. റവ. ഫാ. സെബാസ്റ്റ്യൻ — ഒഴുകയിൽ
1970 മാർച്ച് – 1971 സെപ്റ്റംബർ

15. റവ. ഫാ. സഖറിയാസ് — പുതുപ്പറമ്പിൽ
1971 സെപ്റ്റംബർ – 1974 ഏപ്രിൽ

16. റവ. ഫാ. മാത്യു — ഏറത്തേടത്ത്
1974 ഏപ്രിൽ – 1977 ഫെബ്രുവരി

17. റവ. ഫാ. ജേക്കബ് — മുയ്യക്കള്ളി
1977 ഫെബ്രുവരി – 1979 മാർച്ച്

18. റവ. ഫാ. കുര്യാക്കോസ് — ഏണേക്കാട്ട്
1979 മാർച്ച് – 1980 നവംബർ

19. റവ. ഫാ. മാത്യു — പിണമറുകിൽ
1980 നവംബർ – 1981 ഫെബ്രുവരി

20. റവ. ഫാ. എബ്രാഹം — കുന്നക്കാട്ട്
1981 ഫെബ്രുവരി – 1982 മെയ്

21. റവ. ഫാ. കത്ബർട്ട്
1982 മെയ് – 1983 മെയ്

22. റവ. ഫാ. എഫ്രേം — പൊട്ടൻപ്ലാക്കൽ
1983 മെയ് – 1984 ഏപ്രിൽ

23. റവ. ഫാ. ജോസഫ് — തോട്ടുപുറം
1984 ഏപ്രിൽ – 1990 ഫെബ്രുവരി

24. റവ. ഫാ. തോമസ് — ആര്യമണ്ണിൽ
1990 ഫെബ്രുവരി – 1997 ഫെബ്രുവരി

25. റവ. ഫാ. സെബാസ്റ്റ്യൻ — ചിറ്റഷനാട്ട്
1997 ഫെബ്രുവരി – 2001 മെയ്

26. റവ. ഫാ. തോമസ് — പുത്തൻപുരയ്ക്കൽ
2001 മെയ് – 2004 ഫെബ്രുവരി

27. റവ. ഫാ. ജോണി — ചെരിപുറം
2004 ഫെബ്രുവരി – 2006 ഫെബ്രുവരി

28. റവ. ഫാ. ഡോമിനിക് — വെട്ടിക്കാട്ട്
2006 ഫെബ്രുവരി – 2009 ഫെബ്രുവരി

29. റവ. ഫാ. സെബാസ്റ്റ്യൻ — ഉള്ളാട്ട്
2009 ഫെബ്രുവരി – 2012 ഫെബ്രുവരി

30. റവ. ഫാ. സെബാസ്റ്റ്യൻ — കരിപ്പാക്കൽ
2012 ഫെബ്രുവരി – 2017 മെയ്

31. റവ. ഫാ. തോമസ് — പാലയ്ക്കൽ
2017 മെയ് – 2020 ജൂലൈ

32. റവ. ഫാ. ജോസഫ് പാലത്തിങ്കൽ
2020 ജൂലൈ – 2023 മെയ്

33. റവ. ഫാ. സെബാസ്റ്റ്യൻ ജോസ് കൊല്ലംകുന്നേൽ
2023 മെയ് – 2025 മെയ്

34. റവ. ഫാ. ജോസ് മാത്യു പറപ്പള്ളിൽ
2025 മെയ് – തുടരുന്നു

പാരമ്പര്യത്തിൽ നിന്ന് ശതാബ്ദിയിലേക്ക്

1921-ൽ ഒരു ചെറിയ താൽക്കാലിക ചാപ്പലിലൂടെ ആരംഭിച്ച പള്ളി സ്ഥാപിക്കാനുള്ള ആഗ്രഹം, പ്രദേശവാസികളുടെ കൂട്ടായ പ്രവർത്തനത്തിലൂടെയും വിശ്വാസത്തിലൂടെയും 1922-ലെ സ്ഥലവാങ്ങലിലേക്കും പള്ളിനിർമ്മാണത്തിലേക്കും വളർന്നു. 1923-ൽ വിശുദ്ധ മിഖായേൽ മാലാഖയുടെ നാമത്തിൽ കുരിശുപള്ളി സ്ഥാപിക്കപ്പെടുകയും തുടർന്ന് ഇടവകപ്പള്ളിയായി ഉയർത്തപ്പെടുകയും ചെയ്തു.

കാലക്രമേണ സെമിത്തേരി, സ്കൂൾ, കുരിശുപള്ളികൾ, പള്ളിമുറി, വൈദികമന്ദിരം, പാരീഷ് ഹാൾ, വിവിധ കുരിശടികൾ തുടങ്ങിയ സൗകര്യങ്ങളും സ്ഥാപനങ്ങളും സ്ഥാപിതമായതോടെ പഴയിടം ഇടവക കൂടുതൽ വളർന്നു. വിവിധ തലമുറകളിലെ വൈദികരുടെയും ഇടവകജനങ്ങളുടെയും കൂട്ടായ പരിശ്രമത്തിലൂടെ ദൈവാലയത്തിന്റെ ഭൗതിക സൗകര്യങ്ങൾക്കൊപ്പം വിദ്യാഭ്യാസ, സാമൂഹിക, ആത്മീയ പ്രവർത്തനങ്ങളും വിപുലമായി.

1926-ൽ സെന്റ് മൈക്കിൾസ് എൽ.പി. സ്കൂൾ ആരംഭിക്കുകയും പിന്നീട് യു.പി. സ്കൂളായി ഉയർത്തപ്പെടുകയും ചെയ്തു. 1975-ൽ ഹോളി ഏഞ്ചൽസ് നഴ്സറി സ്കൂൾ ആരംഭിച്ചു. വിവിധ കാലഘട്ടങ്ങളിൽ കുരിശുപള്ളികൾ, പള്ളിമുറി, വൈദികമന്ദിരം, പാരീഷ് ഹാൾ തുടങ്ങിയവ സ്ഥാപിക്കുകയും ദൈവാലയത്തിൽ ആവശ്യമായ വിവിധ നവീകരണ പ്രവർത്തനങ്ങൾ നടത്തുകയും ചെയ്തു.

ഇന്ന് 18 കുടുംബകൂട്ടായ്മകളും 314 കുടുംബങ്ങളും 1,434 ഇടവകാംഗങ്ങളും ഉൾക്കൊള്ളുന്ന സജീവ ഇടവകയാണ് പഴയിടം പള്ളി. വിശ്വാസജീവിതത്തോടൊപ്പം വിദ്യാഭ്യാസം, സാമൂഹിക സേവനം, യുവജന പ്രവർത്തനം, മതബോധനം, കാരുണ്യ പ്രവർത്തനങ്ങൾ തുടങ്ങിയ മേഖലകൾക്കും ഇടവക പ്രത്യേക പ്രാധാന്യം നൽകുന്നു. ഇടവകയുടെ കീഴിൽ സെന്റ് മൈക്കിൾസ് യു.പി. സ്കൂൾ, ഹോളി ഏഞ്ചൽസ് നഴ്സറി സ്കൂൾ, എ.കെ.എം. പാലിയേറ്റീവ് കെയർ സെന്റർ എന്നിവയും വിവിധ കുരിശടികളും പ്രവർത്തിക്കുന്നു.

2023-ൽ ഇടവക ശതാബ്ദിയാഘോഷം നടത്തി. ഒരു നൂറ്റാണ്ടിലേറെ നീണ്ട വിശ്വാസപാരമ്പര്യവും സേവനസന്നദ്ധതയും കാത്തുസൂക്ഷിച്ച്, കാലത്തിനനുസരിച്ച് പുതുമകളെ സ്വീകരിച്ചുകൊണ്ട് മുന്നേറുന്ന ഒരു സജീവ ക്രൈസ്തവ സമൂഹമായി പഴയിടം പള്ളി ഇന്ന് നിലകൊള്ളുന്നു.

നിലവിൽ റവ. ഫാ. ജോസ് മാത്യു പറപ്പള്ളിൽ ഇടവകയുടെ വികാരിയായി സേവനം ചെയ്യുന്നു. 2025 മെയ് മുതൽ അദ്ദേഹം ഈ ശുശ്രൂഷയിൽ തുടരുന്നു.