Yakumanta Willakuy

Ichapascha huk p’unchaw yakuqa chinkarqapunqa, ripunqa mana hayk’aq kutimuq imaraykuchus mana ñuqanchik allintachu ruwanchik. Mayukunata qhillichanchik, quchakunata qhillichanchik hinallataq ancha sasan kanqa waqmanta ch’uya yaku kutimuynin.

May unaymantas Pachamamanchikwan kuchka tiyakunchik, Pachamamanchikmi tukuy ima atiyniyuq kay pachapiqa. Pachamamanchik patapiqa imaymana ayllukunan kawsayniyuq kachkanku, chaypin kachkan apunchikkuna, qurakuna, halaq p’isqukuna, runakuna hinallataq yaku ayllukuna.

Unaysi Tayta Chikchiqa, Yakupa taytansi kaq kasqa, mamantaqsi Para. Kay pachapiqa kay ayllus ancha atiyniyuq kanku, Chikchiwan, Parawanqa Yakutas paqarichinku. Ñuqanchikpaqqa yakuqa kawsaymi, miraymi, lliw kawsaqkunapaq hinallataq uywakunapaq, runakunapaq utaq qurakunapaqpis. Mana Yaku kanmanchu hinaqa manan pipas kawsayta atinmanchu. Hinan Pachamamapi kaq qurakunapis Yakuwan phuturimuspa wiñan. Kay yaku aylluqa tiyan tukuy chiqanpi, chaymi Tayta Chikchi tiyan hanaq pachapi hatunchaq phuyukunapi, Parantaqsi tiyan kay pachapi, mayupi, quchapi tantayukuspa. Kikin Yakutaq tiyan ukhu pachapi lluqsimuntaqmi puhukunanta ch’uyay ch’uyallaña, larqhakuna kananpaq, mayukuna purinanpaq, quchakuna kananpaq, yakuqa lluqsimun Pachamamapa ñawinmanta.

Chayraykun runakuna mana chanin ruwaqtinqa yaku chinkarakapun, ch’akirqapun hinaspas yakuqa phiñakunmanmi. Ñuqanchik, mana qunqananchikchu Tayta Chikchiqa kay pachapi Yaku wawanta churaykun, tukuy karu ayllukunapi, karu patakunapi, Karu huchk’ukunapi, hinallataq tukuy kawsaqkuna wiñananpaq.

Tayta Chikchiqa chayamun ayllukunaman sichus ima sasachakuypas kaptin. Paysi ñak’arichin sulluq warmikunata, manukuna mana kutichiqkunata, maqanakuqkunata, llullanakuqkunata, q’utunakuqkunata, chiqninakuqkunata. Yachakunsi llaqtapi chikchi wichiptin chaypis ima hucha kan. Chayraykus, runakunaqa Tayta Chikchita manchakunku, hinaspas allin kawsayllapi tiyakunku.

Tayta Chikchiqa uyarikuqmi paywanqa rimaykuchwanmi, hinaspa mañakuchwanmi ama chikchi hamunanpaq. Payqa ñanninllanta purikun,hinaspas ayllu runakuna yachankuña maynin purisqanta. Chaysi, utqhayllaman kutichinku, aqhachawan phukuspa, yana p’achakunawan waqtaspa, yana pullirakunawan chharpispa. Tayta Chikchiqas tukuy kay pachapi chaninchasqa kan, hina runakunapaq, hina uywakunapaq, hina kawsaykunapaqpas.

Tayta Chikchiqa mama Parawan kuskas paqarichimusqa Yaku churiwawanta. Manas payqa sapakutichu hamun, yachasqa mitakunallapi hamun. Yakuqa saphikuna, pastukuna ch’aqchuykun wiñarinanpaq. Ichaqa ch’akiriy wata kaptinsi manas Yaku hamunchu. Hinaqa, ayllu runakunas yaku mañakunampaq; apu ñawinman, mamaquchaman siqanku.

Chaymantas huk yachaq paqu añanchaykun. Hinallataqsi mañarikun yaku hamunanpaq, chayman hinas sichus yaku chayamunqa runakunaqa tusuyta qallaykunqa hinallataq kawsaykunapas ruruykamun. Aswantaq mana Yaku chayamuptin ima kawsaykunapaqpas llakirikun.

Ichapascha huk p’unchaw yakuqa mana hayk’aq kutimuyniyuq chinkarqapunqa, mana allin chaninchasqanchikmanta, amachasqanchikmanta. Chayraykus sasan kanqa ch’uya yaku kutimuynin kawsayninchik purichinanchikpaq.

Kay tapukuykunata kutichiy

¿Imaynan tiyakunanchik ayllunchikunapi mana Tayta Chikchi ñak’arichiwananchikpaq?

¿Imaniraqtaq Yakupa Taytan karqa?

¿Imaynataq llaqtaykipi yakuta amachanku?