Aya Mallki

Huk purun sachasapa chawpipis huk mallkicha wiñasqa. Sumaqllañas, huk rapin pañay paña wiñarusqa, sinqa niraq rikukusqa. Llapan uywakuna, sachakunapas kusirikuywan mallkichataqa qawasqaku. Chaynas, hinalla wiñarusqa, sinqa hna rapinpas hatunña kachkasqa. Chaysi masichankuna Sinqamallkicha nispas sutichasqaku.

Huk punchawsi llapa uywakuna chayaramusqa Sinqamallkipa tiyasanman. Paykunas willakuyta qallaykusqaku, achka runakunas kuchunakunawan llapa sachakunata, llapa mallkikunata mutusqaku. Chaysi paykunaqa manaya chaypi allinta kawsakusqakuchu, mikunakunapas kasqañachu, llapa ima kawsaykunas chinkasqa. Chay raykus kaykunaman qamusqaku.

Sinqamallkiqa llapa masinkunawan, hamuq uywakunata sumaq sunquwan chaskisqaku. Chaypi paykunaqa hawkalla musuq wasinpi tiyakusqaku. Aswantaq yachasqaku chay runakunamanta, ichapas may qunqasqa punchawpi chay tiyasqankuman chayaramunmanku.

Chayna kaptinsi utqayllaman, allinta umanchaspa, ima kasqanta allinchana kasqa. Chaysi Sinqamallki masinkunawan yuyarisqaku, runakunaqa ayakunatas manchakunku. Chayta yachaspankus allinta plan nisqanta ruwasqaku.

Chayman hinas, runakunaqa Sinqamallkipa tiyasqanman chayasqaku. Hinaspansi, wasinkunata ruwaspankus puñuq pasaykusqaku.

Hinaptinsi, llapa yuraq urpikunas Sinqamallkitas lliw ch'uwiykusqaku, hatun yuraq lliklla hinawansi rikurikusqa. Chaymantas llapa nina uruchakunas huñu ruyrupi tiyasqaku, iskay kanchiq ñawikuna hina, allinsi hatun sinqan rikukusqa. Kusillukunañataq runakunapa karpa wasinman yaykuruspas llapa ruraq kuchunakunawan chinkarachisqa. Wiqrukunañataq, qapariyta qallaykusqaku: aya! aya! nispas.

Runakunas mancharikuspa utqayllaman karpa wasinmantas lluptikusqaku. Chaysi Sinqamallkita qawaspankus sinchita macharirukusqaku. Chaypis hatun aya kachkasqa, ñawinpas kanchiy kanchiy, hatun sinqayuq.

Hinaspas qaparistin llaqtaman ripukusqaku, pawaspa pawaspa chayanankukama. Chaypis huk runakunata willakusqa, wak purun muntipis hatun millay aya tiyan.

Willakusqanman hinas, runakuna manchakuspakus chay purun muntimanqa asuykusqakuñachu. Sinqamallkiqa hatun yanapaq nispas uywakuna anchata riqsikusqa. Chay punchwamantas, uywachakuna, sachakunapas kusisqalla tiyakusqaku. Allin kawsaykunapas paqarimusqa, sumaqllañas chay muntiqa kasqa.

Chaynam kay willakuychaqa tukurqun.

Kay tapukuykunata kutichiy

• Imaraykutaq uywakunaqa llakisqa kasqaku

• Imatataq runakunaqa sacha muntikunapi rurasqaku?

• Ima nispataq runakunaqa llaqtaman mancharisqallaña chayaruspaku willakusqa?