Chascha Allqucha

Huk runas muntipi allquchantin tiyasqa. Runaqa purun uywakunata chakuspa, aychanta, millwanta, qaranta rantikuspas kawsasqa. Allquchapa sutinqa Chascha kasqa, paysi runanwan pampakunapi purisqa purun uywakunata qatikachaspa. Chay punchawkunaqa sumaqsi kasqa, hawa pampakunapi intiwan, wayrawan pawaspa, chuya yakuta upyaspa, sachasikipi samaspa kusisqallañas Chaschaqa tiyasqa.

Aswansi, punchawpiqa chayllachu ruwana kasqa, uywata chakuspas Chaschaqa pampakunapi muskispa taripasqa. Rinrinsi imakunatapas karupi kaqtapas uyarisqa. Chaynas runanta chakuy punchawkunapi alquchaqa yanapasqa. Runanñataq kusisqa allqunta saminchasqa, manas pay hina huk allqukunaqa kasqachu.

Watakuna pasaptinsi Chaschaqa machuyarusqa, manañas allintaqa uyarisqachu, chuñunpas musyasqañachu, kallpanpas pisirusqaña. Manataq runantaqa kacharisqachu, pampakunaman hinalla paywan risqa. Chaysi, huk punchaw Chaschaqa huk munti kuchita rikurusqa, utqayllamanñas qatikachasqa, aswansi, munti kuchiqa lluptirqusqa, allquchañataq pisipasqa nanaywan qaparispa. Huk hatun mallkiman asuykuspas, chaypi samarisqa, mana imata ruwayta atispa. Runanñataq piñasqallañas maskasqa. Tariykuspansi, mana allinta allqullanta qawaykuspas, kayna hinata nisqa:

• Manañam imatapas hapiyta atinkiñachu, mawlayarunkiñam, imatañataq qamwan ruwayman.

Llakisqa Chaschaqa runanta qawaspa kutichisqa:

• Runallay, ñuqaqa hinallam kuyapay allqu kachkani, manapunim saqiykimanchu, sunquyqa hinallam qamwan kanqa. Manataq, kallpallay kapuwanñachu, machuyaruniñam. Llapa kawsayniytam qanman quykuyki. Amayá chaynataqa kamiwaychu. Manachu yuyanki ima ruwasqanchikta kay pachapi? qampas ñuqa hinam karqunki.

Runanqa pinqarikuspas, allqunman asuykusqa, wiqi ñawintinsi, marqarirukuspa wasiman apasqa. Chaypis, Chaschataqa allinta amachasqa, allin kanampaq. Chisiykuqkunatas allquchanwan allillamanta pampakunapi puririsqa.

Yachaykunapaq: Amam uywaykikunata usuchiychu, paykunaqa, llapa kawsayninta qanman qusunki. Allquchakunaqa yanapasunkim, mana pipas kaptinpas, payqa qanwan kanqa. Yuyariy, qampas machuyaymanqa chayankim.

Kay tapukuykunata kutichiy

1. Imakunatataq Chascha Allqucha pampakunapi ruwasqa?

2. Imanasqataq chascha allquchaqa manaña runanta yanapayta atisqachu?

3. Qam willarikuy, imakunatataq ruwawaq machuyaq uywakunata, machuyaq runakunata yanapanaykipaq?