Na 1ª sesión entregáronse os libros ao alumnado xunto a uns marcadores que utilizarían durante a lectura para sinalar aquelas ideas que lles resultasen significativas e quixesen comentar na seguinte sesión.
Para adentrarnos na obra, propúxose ó alumnado comezar a ler o libro, de modo que cada un deles leu, en voz alta, algunhas páxinas. Para acompañar a lectura proxectouse a lista de reprodución que o autor reflexa nun código QR nas primeiras páxinas. A banda sonora de Diferente recolle unha listaxe de cancións que soaron mentres o autor escribía a novela.

De cara á vindeira sesión pediuse ó alumnado que avanzase na lectura ata a metade do libro aproximadamente.

Tamén se lle deu entrega dunha plantilla coa silueta dun sombreiro como o que utilizaba a protagonista e pediuse que foran pensando sobre as seguintes cuestións, ao igual que se describen os personaxes da obra: cor, cheiro e sabor preferidos, “encántame...”, “non me gusta...”, “non podo evitar...”.

A silueta do sombreiro tamén levaba unha pregunta sobre a que debían de pensar: “que che gustaría que che sucedese dentro do teu sombreiro?”. Tal e como lle sucedía a Luna, a protagonista, a todos nos gusta imaxinar o noso mundo ideal, no que suceden cousas desexables e boas que, ás veces, distan moito da realidade.

“- ¿Qué hacías dentro del sombrero?

- Bueno, este sombrero me sirve para muchas cosas. A veces es un escudo, a veces es un lugar donde desaparezco y a veces se convierte en mi hogar, en mi casa”.

Na 2ª sesión as profesoras colocaron uns parágrafos, extraídos do libro, pegados por debaixo das cadeiras do alumnado, que se dispuxo sentado en forma de círculo.

Cada quen despegou o seu texto e doulle lectura, tratando de reflexionar sobre o aspecto que alí se recollía.

As interpretacións foron interesantes e a maioría do alumnado conseguía empatizar co sufrimento da protagonista e coa súa capacidade para interpretar o mundo, buscando sempre o lado positivo incluso do que máis a facía sufrir.

“Siempre habrá personas diferentes que necesitarán ayuda […]. Siempre habrá dianas fáciles a las que atacar. Pero de aquí a unos años, quizás siglos, todo esto ya no ocurrirá, porque al atacar a otro nos estaremos atacando a nosotros mismos, todos estaremos conectados”.

O alumnado relataba, neste punto da lectura, o inquietante da obra, e como esta invita ó lector a non desconectarse para pescudar sobre a relación que gardan as vidas das protagonistas.

Na 3ª e última sesión comentouse a opinión xeral da novela, extraendo un balance positivo, aínda que tamén houbo alumnado que sentiu que era demasiado negativo e triste.

Retomamos os sombreiros entregados na primeira sesión e como non todo o alumnado escribira sobre as preguntas plantexadas fíxose na mesma sesión.

Unha vez que todos remataron de escribir pegáronse os sombreiros nun papel continuo coa finalidade de dar un último paso: conectalos entre si.

Ao igual que pensaba Luna, existe unha lenda oriental que sostén que as persoas destinadas a coñecerse están conectadas por un fío vermello invisible.

Dun xeito máis concreto, con esta actividade pretendíase que o alumnado buscase puntos en común dentro do pequeno grupo que conformaba este clube de lectura.

En seguida se mostraron entusiasmados coa idea de buscar semellanzas entre eles e non lles custou nada atopalas. Parece que coñecerse algo máis é a mellor forma de facer que o normal sexa ser diferente.

De xeito breve pola premura do tempo, o alumnado expresou o que lle gustaría que lle sucedese dentro do seu sombreiro.