Mae addysgeg wrth wraidd cwricwlwm. Wrth gynllunio ein cwricwlwm, byddwn yn ystyried y dulliau addysgegol y bydd angen i ni eu defnyddio i gefnogi dysgwyr i wireddu'r pedwar diben. Yr ydym fel rhan o'n gweledigaeth am sicrhau sylfaen gref o ddysgu ac addysgu sy'n ystyried 'pam' a 'sut' yn ogystal â 'beth'.

Yr ydym am sicrhau bod gan ymarferwyr ddealltwriaeth ddofn a manwl o'r egwyddorion addysgegol a'r ymchwil sy'n sail iddyn nhw. Mae addysgeg effeithiol yn dibynnu ar ddealltwriaeth fanwl o ddatblygiad plant a phobl ifanc. Mae'n cynnwys archwilio a myfyrio ar y strategaethau addysgu a fydd yn cefnogi'r dysgu orau mewn cyd-destun penodol, ac ymchwilio i effaith hyn ar ddysgwyr.

Rydym yn ystyried, yn rhannu ac yn datblygu ein dulliau addysgu’n barhaus, a hynny’n seiliedig ar ein dealltwriaeth o’r 12 egwyddor addysgegol a nodir yn Fframwaith y Cwricwlwm ac ar y dulliau yr ydym ni’n eu canfod yn llwyddiannus yn yr ysgol hon.

HYDER

Defnyddiwn y system HYDER er mwyn cynllunio gan ystyried bob tro y pethau canlynol:

• A oes her ddigonol yn y gwaith?

• A fydd y disgyblion yn ymrwymo i’r gwaith, a yw’r gwaith yn ennyn diddordeb?

• A oes cyfleon i ddisgyblion ddyfnhau meddwl, a yw’r gwaith yn cynnig digon o her? A yw’r athro yn hwyluso’r dyfnder?

• Beth yw effaith y dysgu? Beth yw deilliant y wers?

• A oes cyfle i ad-alw gwybodaeth, rôl fodelu a mireinio sgiliau adolygu at arholiad er mwyn dysgu a gwreiddio’r wybodaeth a’r sgiliau?