5

MARRAZTU (Dibujar) eta ALDATU (Modificar) menuak menperatzen badituzu, esan daiteke dagoeneko edozein irudi sortzeko gai zarela. Printzipioz, ez duzu besterik behar zure irudiei behar duten itxura emateko. Zertarako aztertu, orduan, BEHARTU (Forzar) izena duen menu honetan agertzen diren aukera berriak? Aukera berri hauen baliagarritasunaz jabetzeko, adibide bi ipiniko dizkizut:

• • LERROA (Linea) komandoa, behin eta berriro erabiliz, poligono bat sortu nahi baduzu, hori egiteko modurik zehatzena zuzenkiak mugatzen dituzten muturren koordenatuak komando lerroan idaztea izango litzateke. Baina, irudiak zuzenki asko baldin baditu, banan-bana puntu guztiak koordenatu bitartez idatzi behar izatea lan astuna bihur daiteke. Zalantzarik gabe, askoz ere errazagoa eta azkaragoa izango litzateke, zuzenki horien muturrak klik eginez lan-eremuaren gainean txertatzen joatea. Modu honek, ordea, arazo txiki bat dauka. Kurtsorea pantailaren gainean mugitzen dugunean, honen posizioa etengabe aldatzen ari da eta, orokorrean, bere balioa zenbaki osoen bitartez lortzea (balio hamartarrik gabe) nahiko zaila da. Lerro bat erabat horizontala marraztu nahiko bagenu horrela, oso zaila izan daiteke zuzenkia osatzen duten ezker eta eskuin muturrak Y koordenatu berdinarekin marraztea.

  • ALDATU (Modificar) komandora askotan joan behar izaten dugu irudiaren ezaugarriak aldatzeko. Jo dezagun zirkulu bat, bere diametroaren gainetik zeharkatzen duen lerro baten bitartez ebaki nahi dugula. Behin zirkulua marraztu ondoren, bere gainean lerro bat marraztu beharko genuke, zirkuluaren zentrotik igarotzen dena. Nola ziurtatu, ordea, marraztuko dugun lerro berria zehazki zirkuluaren zentrotik igarotzen dela? Kurtsorea libreki mugitzeko aukera badu, oso konplikatua da zentroaren gainetik zehazki (gutxi gorabehera ez du balio; horrela bada, ezin dugu ziurtatu diametroarekin bat egiten duenik gure zuenak) igarotzen den zuzenki bat irudikatzea.

Adibide bi horietan bezala, askotan topatuko gara, aukeratuko ditugun komandoak zehaztasunez erabiltzeko, kurtsorea guri interesatzen zaizkigun leku edo posizio zehatz batzuetatik pasatzea behartzea. Hori egiteko aukera desberdinak aurkituko ditugu BEHARTU (Forzar) menuan. Horiekin guztiekin, kurtsorea guk nahi dugun toki edo posizioetara joatea lortuko dugu. Menu honetako aukerak, beraz, oso praktikoak dira marraztu nahi ditugun edo aldatu nahi ditugun elementuak zehaztasunez egiteko.

1. ATALA Kurtsorearen mugimendua pantailan zehar behartu

Kurtsorea pantailan zehar mugitzeko aukerak funtsean hiru dira:

• • ASKEA (Libre): kurtsorea aske mugitzen da pantaila osoan zehar.

  • SARETA (Rejilla): erreferentziazko saretaren gaineko puntuetatik soilik mugituko da kurtsorea.

  • MURRIZKETA ORTOGONALA (Restricción Ortogonal): kurtsorearen mugimendua elkarzutak diren bi norabideetara bakarrik mugatuta dago: horizontala (ezker-eskubira, alegia) eta bertikala (gora-behera). Beste mugimendu guztiak ezinezkoak dira.

  • MURRIZKETA HORIZONTALA (Restricción Horizontal): kurtsorea ezker-eskubi bakarrik mugituko da, marra horizontalean.

  • MURRIZKETA BERTIKALA (Restricción Vertical): kurtsorea gora-behera besterik ez da mugituko, marra bertikalean.

  • MURRIZKETARIK GABE (Sin Restricciones): guztiz indargabetzen ditu kurtsorearen mugimenduak izan ditzakeen goiko murrizketa guztiak.

2. ATALA Kurtsorearen mugimendua objektuen erreferentziazko puntuetara behartu

Irudi bat osatzen duten objektu edo elementu guztiek leku edo posizio jakin batzuetan dauden puntu karakteristiko batzuk dituzte. Kurtsorea objektu horien ondotik pasatzerakoan, puntu hauek modu automatikoan detektatu eta hautatzeko aukera izatea, abantaila handia da, izan ere, eskuz egitea ia ezinezkoa izango litzateke (arku baten aurkitzea edo bi zuzenkien arteko ebakipuntua, horren lekuko bi adibide dira)