ENTREVISTA

1. Cando naceu o teu interese polas ciencias?

"Cando era pequena era moi curiosa, e co paso dos anos tiven claro que era unha persoa máis de ciencias ca de letras. Gustábanme moito as matemáticas, a física…"

2. Que te motivou a adicarte a iso posteriormente?

"No momento de escoller carreira, tiña claro que me gustaría estudar unha enxeñaría, xa que me decantara por un bacharelato centífico-tecnolóxico, e sabía que as enxeñarías tiñan bastantes saídas profesionais."

3. Por que campo STEM decidiches decantarte?

"Nun primeiro momento empecei Enxeñaría de Telecomunicacións na Universidade de Vigo. Como non me convencía de todo, ao acabar o primeiro ano cambieime a Enxeñaría Informática na Universidade da Coruña (UDC)."

4. En que traballas actualmente?

"Actualmente traballo como docente na Facultade de Informática da UDC e investigo no campo da Intelixencia Artificial."

5. Que é o que máis te enche do teu traballo?

"O mundo da investigación gústame moito, é un traballo no que nunca te aburres. En particular, investigar en Intelixencia Artificial é moi satisfactorio xa que é unha materia multidisciplinar e transversal, que permite abordar unha gran variedade de problemas. Creei algoritmos para axudar a detectar enfermidades (retinoparía do prematuro, apnea do sono, insuficiencia cardíaca); para detectar vertidos no océano; para detectar ataques en redes de computadores ou incluso para poder ser aplicados en dispositivos intelixentes do tamaño dun anel."

6. Notaches diferenzas no trato entre os dous sexos e nas oportunidades que se lle brindan a cada un?

"Eu persoalmente non notei diferenzas, aínda que si coñezo casos de compañeiras que foron a congresos e pensaban que estaban alí acompañando o seu marido. No meu caso particular, en informática só o 13% do alumnado son mulleres. Porén, eu nunca notei diferenzas durante a carreira, e nunca me sentín menos capaz que os meus compañeiros homes de facer o meu traballo.

7. Cres que isto foi cambiando co paso dos anos? Se pensas que si, grazas a que cres que isto foi posible? Se pensas que non, que consellos nos darías para enfrentármonos a unha vida chea de estereotipos?

"Eu creo que si que se notou un cambio xa que afortunadamente hoxe en día hai moitas iniciativas para fomentar o papel da nena na ciencia e nas carreiras tecnolóxicas. O Día da muller e a nena na ciencia, o Día Internacional das nenas nas TIC, Wisibilízaas, Inspira STEAM… Espero e desexo que, con todas estas iniciativas, as nenas de hoxe poidan escoller libremente o seu futuro, sen deixarse levar polos estereotipos. Non é cuestión de que todas as nenas se dediquen á ciencia, senón que é cuestión de que cada nena sexa o que realmente queira ser. Tamén é moi importante, por suposto, a parte de visibilización. Eu dígoo sempre, as mulleres científicas e as tecnolóxicas temos unha dobre responsabilidade, xa que ademais de facer ben o noso traballo, tamén debemos visibilizarnos para que as nenas saiban que existen mulleres nestas profesións, e que non somos “bichos raros”."

8. Á hora de traballar, algunha vez fuches menosprezada por ser muller?

"Eu, particularmente, estou integrada nun grupo de investigación coordinado por unha muller, e no que a metade somos mulleres, polo que é como unha burbulla. No meu día a día non son consciente de que teño unha profesión na que só o 13% somos mulleres. Fun moi afortunada e nunca me sentín menosprezada polo feito de ser muller, pero son consciente de que é un problema que existe, e é serio."

9. Como tomou a túa familia a elección da túa carreira, ciclo, etc.? Apoiáronte ou tamén se viron influenciados polos estereotipos?

"A miña familia sempre me apoiou para ser o que eu quixese ser, e en ningún momento cuestionaron a elección da miña profesión nin se viron influenciados polos estereotipos."