1. Cando naceu o teu interese polas ciencias?

"Realmente o meu interese polas ciencias foi moi inesperado xa que estou na universidade por casualidade. O meu obxectivo cando empecei a facer a carreira non era estar na universidade nin moito menos, pero si é verdade que cando tiña 16 anos fun á Ruta Quetzal. Era unha expedición á selva en Panamá e Costa Rica con Miguel de la Quadra Salcedo. Faciamos varios cursos e íamos a clases con xente da Universidade Complutense de Madrid, e dentro desa expedición eu fixen un traballo e seleccionáronme. Aquí foi onde me din conta do que quería facer porque me marcou o interese por outras cousas. Pero non foi directamente pensar: “vou ser científica”."

2. Que te motivou a dedicarte a iso posteriormente?

"Fixen prácticas na universidade e despois na central térmica das Pontes, primeiro estiven na térmica e despois no ciclo. Nese ano que estiven no ciclo ao mesmo tempo estaba a facer o doutoramento. Logo tiven a sorte de que saíron moitas prazas e presenteime a varias delas, e foi aí cando empecei a adicarme ao meu traballo."

3. Por que campo STEM decidiches decantarte?

"Actualmente a miña liña de investigación son as enerxías renovables mariñas. Eu son enxeñeira industrial, pero dou clase en enxeñería naval, entón digamos que a enerxía eólica mariña é como unir as dúas enxeñerías: a naval e a industrial."

4. Que é o que máis te enche do teu traballo?

"A min o que máis me gusta é que é variado, é dicir, un día dás clase, outro día vas a unha conferencia, outro día vén unha persoa moi interesante e vas vela, outro día estás co alumnado axudándolle, etc. Por exemplo, hoxe tivemos un tribunal de rapazada á que lle dirixín o STEMbach. Como vedes, cada día é unha cousa diferente e para min é moi importante, ou sexa, ao mellor estar nunha oficina facendo sempre o mesmo non me gustaría."

"Ademais, o trato co alumnado éncheme moito, eu son investigadora pero gústame moito dar clase, de feito este ano foi un pouco complicado polo tema das clases online, pero si que é verdade que o trato coa xente e coñecer cada ano persoas novas paréceme moi interesante."

5. Notaches diferenzas no trato entre os dous sexos?

"A ver, eu estudei enxeñería industrial e cando estudei a carreira xa había mulleres, pero si que é verdade que no meu departamento, por exemplo, non hai ningunha catedrática nin rectoras mulleres (hai dúas en toda España), é dicir, creo que nos queda moito por acadar. Estamos en camiño a ver se o conseguimos. Cabe dicir que no grupo no que estou somos todas mulleres."

"Eu agora dirixo dous proxectos de investigación e é raro que mulleres no ámbito da enxeñería dirixan proxectos."

6. Cres que isto cambiou co paso dos anos?

"Creo que si. Eu dou clase de enxeñería naval e hai moi poucas mulleres, a excepción da industrial, pero si que creo que hai máis que anos atrás. Si que é verdade que creo que segue habendo unha brecha. Por exemplo, teño dous fillos: un neno pequeno e unha nena, e vas comprarlles un xoguete e é imposible non comprarlle algo rosa á nena, e coa roupa igual. Estas cousas si que creo que seguen existindo. Pero no meu contorno todo o mundo fai o que quere, nunca tiven problemas con iso."

7. Que consello nos darías para enfrontármonos a unha vida adulta chea de estereotipos?

"O meu consello é que vos esforcedes por conseguir o que queirades, porque eu creo que se o facedes, chegaredes a conseguilo, é dicir, é difícil en xeral estar en investigación, é difícil estar en investigación sendo muller, e logo ter fillos moito máis. Pero eu creo que se un se esforza, conségueo. Ao final a sociedade quizais está avanzando cada vez máis e máis rápido, polo que é algo que se pode conseguir."

8. Á hora de traballar, algunha vez fuches menosprezada por ser muller?

"Houbo unha persoa con algún comentario, pero díxomo dúas veces, non máis, pero é verdade que de momento só foi ese caso particular. Eu tamén creo que hai xente cunha mentalidade de hai anos."

9. Como tomou a túa familia a elección da túa carreira, ciclo, etc.? Apoiáronte ou tamén se viron influenciados polos estereotipos?

"A miña familia sempre me apoiou. Miña nai traballaba nun banco e meu pai traballaba nun aparcamento; ningún relacionado coas ciencias nin coa enxeñería industrial. Sempre me deixaron facer o que eu quixera e apoiáronme económica e persoalmente. Nunca tiven problemas."