San Sadurniño é un lugar cunha xeoloxía singular. No sur do concello poden observarse fenómenos como os bolos, os taffoni ou cacholas, as pías e os castelos, ademais de apreciarse claramente o punto onde conflúe o bloque granítico do Forgoselo coas terras ultrabásicas do Complexo do Cabo Ortegal ao norte do río Castro, encaixado nese punto na antiga falla que vai desde As Pontes até a praia de Campelo, en Valdoviño. 

De feito, a área do Castro e do Forgoselo é un dos lugares de interese xeolóxico e científico do Xeoparque do Cabo Ortegal, recoñecido pola UNESCO en maio de 2023 como parte do seu programa das Ciencias e Xeoparques, do que só forman parte arredor de 200 territorios de todo o mundo.

A área abrangue case 800 Km² de superficie terrestre e marítima dos municipios de Cariño, Cedeira, Cerdido, Moeche, Ortigueira, San Sadurniño e Valdoviño, onde se localizan ata 52 lugares de interese xeolóxico e 6 sitios de relevancia internacional por atoparse neles formacións únicas ou case imposibles de ver en ningún outro lugar do mundo: a praia de area negra de Teixidelo, a única no planeta -que se saiba- de orixe non volcánica, afloramentos de lava, restos glaciais, e rochas que habitualmente están a máis de 70 kilómetros de profundidade e que aquí poden observarse a simple vista.

Porén, un xeoparque non é só xeoloxía, senón que esa herdanza natural debe estar vinculada -e así o esixe a propia UNESCO- con outros aspectos, como o desenvolvemento económico sostible, a cultura e o patrimonio.  Neste sentido, os xeoparques buscan ser motor para un turismo de calidade e con certo poder adquisitivo e para outras iniciativas de promoción local  que poidan beneficiarse deste recoñecemento internacional ao mesmo nivel que un Patrimonio da Humanidade que debe revalidarse cada catro anos.