O máis importante do día 12 de agosto será asegurarnos de que protexemos os nosos ollos de maneira adecuada durante a observación do eclipse. E é que mirar a eclipse sen protección, incluso cerca da totalidade, pode causar danos irreparables na vista. Por iso...:

✔ Utiliza exclusivamente lentes homologadas para observar eclipses, certificadas segundo a norma EN ISO 12312-2 e que conten co marcado de fabricación CE. Se usas lentes graduadas, coloca por riba delas as lentes da eclipse, termando delas coas mans para que se cingan ben aos cristais e o nariz se fose necesario.

✔ Comproba que as lentes homologadas estean en bo estado. Se presentan riscaduras, roturas ou calquera deterioración, non as empregues.

✔ Coloca sempre as lentes antes de mirar ao Sol e non as retires mentres exista algunha parte do disco solar visible. A forma correcta e baixar a cabeza, poñer as lentes e despois mirar ao ceo. Iso si, ten en conta que as lentes só son necesarias para mirar directamente ao Sol.

✔ Non perdas de vista ás nenas e nenos, xa que os seus ollos son máis sensibles á radiación solar e ademais seguramente non sexan conscientes do perigo que corren por mirar ao Sol sen protección. Tampouco perdas de vista  ás persoas maiores. Asegúrate de que levan ben colocadas as lentes homologadas. 

X Nunca mires directamente ao Sol sen protección. E incluso coas lentes postas, fai observacións breves, de non máis de 30 segundos cada vez, descansando entre unha e outra.

X Non empregues nunca métodos caseiros como lentes de sol, pantallas ou cristais de soldar, cristais afumados, radiografías, CDs ou DVDs, negativos fotográficos nin calquera outro método sen homologación.

X Non apuntes cámaras, teléfonos móbiles, prismáticos ou telescopios cara ao Sol sen filtros solares específicos. A luz solar pode estragar internamente os aparellos e algúns deles poden provocarche lesións moi graves nos ollos.

X Por seguridade, non uses prismáticos, telescopios e teleobxectivos se non posúes coñecementos avanzados sobre medidas de protección na observación deste tipo de fenómenos astronómicos e, en calquera caso, o filtro solar debe colocarse sempre diante do obxectivo, nunca no ocular.

✔ As lentes homologadas só se poderán retirar durante o breve momento da totalidade da eclipse, que se producirá na nosa zona entre as 20:27:07 e as 20:28:42h. En canto reapareza o primeiro raio de Sol, volve poñer inmediatamente as lentes antes de mirar de novo ao ceo. Mentres o Sol estea totalmente oculto -lembrade só minuto ese minuto e medio- a escuridade será case como a da noite, de modo que para admirar ese momento culminante -e emocionante- teredes que quitar as lentes ou non veredes absolutamente nada. Insistimos de novo: só entre as 20:27:07 e as 20:28:42, un minuto e trinta e cinco segundos.

✔ Escolle con antelación un bo lugar de observación, cun horizonte despexado cara ao solpor -o Oeste- e sen edificios, montes nin árbores que dificulten a visión. Aproveita estes días para buscar, aconsellámosche utilizar o visor móbil do IGN para comprobar que posición terá o Sol no momento central da eclipse. Non fai falla instalar a aplicación, só hai que darlle permiso á web para utilizar a cámara e a nosa situación para calcular a posición.

✔ Ah, e mentres agardas pola eclipse, bota crema solar, pon gorra, hidrátate ben e se estás no monte, bota tamén repelente de insectos indicado para as carrachas!.

A eclipse total de Sol do 12 de agosto de 2026 será un fenómeno astronómico excepcional, visible como eclipse total en San Sadurniño e noutras zonas de Galicia. Agárdase a chegada de miles de persoas para vivir este evento único, polo que se recomenda planificar os desprazamentos e consultar a información oficial e meteorolóxica nos días previos. 

No seguinte vídeo, que recolle a charla ofrecida polo profesor da USC Jorge Mira Pérez na Casa da Cultura, explícase en que consistirá o fenómeno e que precaucións hai que tomar para desfrutar del con total seguridade.