Памяць

(З паэмы “Праводзіны”)

Поле, луг

Пачарнелі ад золкіх дажджоў,

Дні мінаюцца хмарныя, нерассвітаўшыя.

Добры друг

Ад мяне адышоў,

Не спытаўшыся,

Не развітаўшыся.

Добры друг

Усяго, што расце і жыве, -

Земляў, сонцаў і сэрцаў прастору вялікага,

Сціплы той чалавек,

Што наўкруг

Дзядзькам клікалі.

Бацькам клікалі.

Максім Лужанін

Коласаў запавет

(Урывак з паэмы “Праводзіны”)

Ці ты воін у скатцы, Ці юнак баявы,

- Палюбі сваю працу,

- І ты вечна жывы.

Беражы і ахоўвай

Залатыя правы

Нашай роднае мовы,

- І ты вечна жывы.

У бяду, ў небяспеку

Не ўгінай галавы,

Другам будзь чалавеку,

- І ты вечна жывы.

Не шкадуй для радзімы

Ні турбот, ні крыві,

Пройдуць леты і зімы,

А ты – вечна жывы.

Максім Лужанін