O burelés Manolo Maseda e Roberto Grandal, o noso grande acordeonista de Pielas (de cas Puentes), son o núcleo duro de Sérralhe Aí!, unha proposta de pequeno formato que rexorde cada certo tempo e sempre en ocasións sinaladas, como vai ser este 30º Festival do Río Castro. Xa estiveran na sesión vermú de 2018, a das 25 edicións, e agora regresan coa súa proposta festeira na que, de novo, volverán rodearse de amizades das que saberemos cando as vexamos ese mesmo día ao pé do toldo, serrando, petando e cantando.

O arranque da festa pola noite será cousa do grupo Vai Rañala Meu!, integrado por gaitas, acordeón, saxo, clarinete, percusión e voces de distintos puntos da comarca, aínda que a súa base operativa a teñan no centro social de Sedes, desde onde desenvolven un intenso labor de dinamización cultural.

Vai Rañala Meu! prepararon para esta edición un repertorio que en certo modo vai repasar o que deu de si o noso festival desde que nacese aló polo ano 1994. Un festival cheo de emocións que Vai Rañala nos fará vivir e revivir con pezas tradicionais ben coñecidas.

O Bravú está tamén de aniversario. De feito, un dos movementos máis importantes da música galega naceu canda nós, en 1994, tendo como principais impulsores a persoas que hoxe integran a Banda Xangai, empezando por Xurxo Souto. A Xangai é iso, unha banda de verbena/bravú... mellor dito, unha big-band galega onde os ventos adobían con potencia e elegancia pezas míticas coma o "Mesejo", o "Teknotraficante" dos Papaqueixos ou o "Papá y mamá" naquela versión inolvidable interpretada por Sito Sedes á fronte de Los Satélites.