Proiektu hau ez da unitate didaktiko bat, baizik eta ikasturtean zehar Euskara eta Literatura irakasgaian jorratutako lana. Saio guztien hasieran ikasle bakoitzak bere ahozko aurkezpena egingo du taldekideen aurrean, eta jarduera horri "hitzaldia" deitzen diogu. Hitzaldiaren gaia desberdina izango da ebaluazio bakoitzean, eta ikasturtean zehar hauexek landuko ditugu:

1. Gai librea
2. Liburua
3. Youtuberra

Atal bakoitzaren informazio ikusteko, egin klik izenburuaren gainean. Dena den, gai librea izeneko atalean ikasleek ikasturte osoko lanaren azalpena izango dute; hortaz, komeni da atal horretan sartzea, jorratuko dugun atala hori ez bada ere.

Gai guztietan prozedura bera erabiliko dugu: hizlariak bere aurkezpena egiten duen bitartean, beste ikaskide batek Ipadekin grabazioa egingo dio. Grabazio horrek hainbat informazioa emango dio ikasleari: alde batetik, bere lanaren balorazioa, eta, bestetik, egindakoaren alde onei eta alde txarrei buruzko hausnarketa. Ikaskideen hitzaldiak lagungarriak badira ere, norberak egindako lanak berrikustea ezinbestekoa da hobetzeko, eta hori argi ikusten dugu komunikazio atalean.

Jarraian, ahozko aurkezpena egiteko zenbait gomendio:

• Kontuan izan pantailan proiektatzen dena ahozko azalpenaren eskema dela eta ez esan nahi den guztia.
• Antolatu aurkezpenaren edukia gidoi moduan.
• Ez sartu informazio gehiegi diapositiba bakoitzean.
• Islatu aurkezpenaren elementu guztien osotasuna.
• Nabarmendu izenburuak eta interesguneak diapositiba guztietan, hitzaldiari hobeto jarraitzeko.
• Erabili hizkuntza argia eta zehatza, ulermena errazteko.
• Ez erabili 25 diapositiba baino gehiago, zeren aurkezpena oso luzea bada, entzuleak arreta galduko baitu.
• Erabili koloreak, grafikoak, marrak eta taulak aurkezpena aberasteko, baina neurrian.
• Diseinuak erakargarri egin behar du mezua, baina ez du mezua ezkutatu behar; kontuz, beraz, arreta galaraz dezaketen elementuekin.
• Erabili letra handi samarra , baina maiuskula neurrian, irakurketa zailtzen baitu. Letra-tipoa finkatu.
• Erabaki musika jarri ala ez.
• Hautatu diapositiben efektu eta trantsizio egokiak, baina erabili neurrian.
• Aurkezpena prest dagoenean, ikusi eta egin zuzenketak.
• Zehaztu, eta entseatu diapositiba bakoitzarekin batera esan beharrekoa .
• Taldeka egiteko aurkezpena bada, irakurri elkarrekin aholkuak, eta adostu erabakiak.

TEORIA

Hizkuntza ikasteko, irakasteko eta erabiltzeko gunea esteka honetan topatuko duzu. Horretan, komunikazioa lantzeko behar beste informazioa daukazu, baita ahozko hizkuntza lantzeko teoria ugari ere.

https://sites.google.com/a/educacion.navarra.es/ahozko-hizkuntza-irakastea/oinarriak/ahozkoaren-corpusa