ಐರಾವತ.
೧.ಮಳೆಯೊಳಗೆ ಮನೆಗೆ ಬಂದಳು.
ಮಳೆಯೊಳಗೆ ಬಂದುದೇಕೆನಲು ಮಾತಾಡಿದಳೆ ?-
ಮಿಂಚುಗಳು ದಾರಿದಾರಿಯಲಿ.
ಮತ್ತೊಮ್ಮೆ ಏಕೆಂದು ಕೇಳಿದರೆ ನುಡಿದಳೆ ?-
ದೀಪವಿತ್ತೊಂದು - ಮೂಲೆಯಲಿ.
ತಾಯಿದ್ದು ತಬ್ಬಲಿಯೆ ? ಪಾಪಿಗಳು ! ಇವರೇಕೆ
ಹಬ್ಬದಲಿ ಕಳುಹಿದರು ಹೆಣ್ಣುಮಗಳ ?
ಓಡಿಬಂದಳೊ ಕಾಣೆ ! ಹೇಳಿಬಂದಳೊ ಕಾಣೆ !
ಹೀಗೆ ಫಲಿಸಿತೆ ನನ್ನ - ಅವರ ಜಗಳ ?
ಒಂದಾಗಿ ಎರಡಾಗಿ ಮುಂಗುರುಳ ಬಲೆಯಿಂದ
ಮಳೆಯ ಹನಿ ಕೆಳಗುರುಳುತಿರಲು ;
ಕಂಡರೂ ಕಾಣದೆಯೆ ಒಂದು ಮಾತಾಡದೆಯೆ
ಒಳಗೆ ಬಂದಳು ; ಹೊರಗೆ ಸೋನೆಯಿರುಳು.
ಹತ್ತಿರವೆ ಬಂದಳು ; ಒತ್ತಿನಲೆ ಕುಳಿತಳು
ದೊಡ್ದ ಕಣ್ಗಳ ದೊಡ್ಡದಾಗಿ ತೆರೆದು ;
ಕಣ್ಣಿನಲಿ ಮಿಂಚಿನೊಲು ಬಂದ ಕಾರಣವಿರಲು
ಮಾತಾಡದೆ ಹೆಣ್ಣು ಸುಮ್ಮನಿಹಳು.
ನೂರು ಮಾತಿಗೆ ತಾನು 'ಅಹುದು' ಎಂದಳು ಚೆನ್ನೆ
ಒಡನೆಯೇ ಕೊರಲೆತ್ತಿ 'ಇಲ್ಲ' ಎಂದು ;
ದುಂಡು ಕಂಬನಿಯೊಂದನಿಳಿಸಿದಳು ಕೆನ್ನೆಯಲಿ
ತುಟಿಯ ಮೇಲೊಂದೆರಡು ಮುತ್ತನಿಡಲು.
ಮಳೆಯೊಳಗೆ ಬಂದುದೇಕೆನಲು ಮಾತಾಡಿದಳೆ ?-
ಮಿಂಚುಗಳು ದಾರಿದಾರಿಯಲಿ.
ಮತ್ತೊಮ್ಮೆ ಏಕೆಂದು ಕೇಲಿದರೆ ನುಡಿದಳೆ ?-
ಪ್ರೇಮ ಅರಳಿತ್ತು ಮೌನದಲಿ.
೨.ನೀವಲ್ಲವೆ ?
ಹತ್ತು ವರುಷದ ಹಿಂದೆ ಮುತ್ತೂರ ತೇರಿನಲಿ
ಅತ್ತಿತ್ತ ಸುಳಿದವರು ನೀವಲ್ಲವೆ ?
ಹತ್ತಿರದ ಹೆಣ್ಣೆಂದು ಮತ್ತೆ ಮುತ್ತೂರಿನಲಿ
ಒಪ್ಪಿ ಕೈಹಿಡಿದವರು ನೀವಲ್ಲವೆ ?
ಬೆಟ್ಟಗಳ ಬೆನ್ನಿನಲಿ ಬೆಟ್ಟಗಲ ದಾರಿಯಲಿ,
ಕಟ್ಟಿಕೊಂಡಲೆದವರು ನೀವಲ್ಲವೆ ?
ತಿಟ್ಟಿನಲಿ ಮುಂದಾಗಿ, ಕಣಿವೆಯಲಿ ಹಿಂದಾಗಿ,
ನಗುನಗುತ ನಡೆದವರು ನೀವಲ್ಲವೆ ?
ಬಾಗಿಲಿಗೆ ಬಂದವರು, ಬೇಗ ಬಾ ಎಂದವರು,
ಬಂದುದೇಕೆಂದವರು ನೀವಲ್ಲವೆ ?
ನೋಡು ಬಾ ಎಂದವರು, ಬೇಡ ಹೋಗೆಂದವರು,
ಎಂದಿಗೂ ಬಿಡಗಿನ ಹಡಗು ನೀವಲ್ಲವೆ ?
ಸೆರೆಗೆಳೆದು ನಿಲ್ಲಿಸಿದ, ಜಡೆಯೆಳೆದು ನೋಯಿಸಿದ,
ಬಯಲು ಸೀಮೆಯ ಜಾಣ ನೀವಲ್ಲವೆ ?
ಮೊದಲಿರುಳು ಹೊಂಗನಸ ಮುನ್ನೀರ ದಾಟಿಸಿದ
ಬೆಳಕು ಬೆಡಗಿನ ಹಡಗು ನೀವಲ್ಲವೆ?
ತೊತ್ತೆಂದು ಜರೆದವರು, ಮುತ್ತೆಂದು ಕರೆದವರು,
ಎತ್ತರದ ಮನೆಯವರು ನೀವಲ್ಲವೆ ?
ನೀನೆ ಸಾಕೆಂದವರು ನೀನೆ ಬೇಕೆಂದವರು,
ಚಿತ್ತದಲಿ ನಿಂತವರು ನೀವಲ್ಲವೆ ?
ಕೈಗೆ ಬಳೆಯೇರದೆಯೆ, ಅಯ್ಯೊ ! ನೋವೆಂದಾಗ
ಮಹಡಿಯಿಂದಿಳಿದವರು ನೀವಲ್ಲವೆ ?
ಬಳೆಗಾರ ಸೆಟ್ಟಯನು ಗದ್ದರಿಸಿಕೊಂಡವರು,
ಬತ್ತವನು ತಂದವನು ನೀವಲ್ಲವೆ ?
ಹೊನ್ನುಹೊಳೆ ನೀವೆಂದು, ಮುತ್ತುಮಳೆ ನಾನೆಂದು,
ಹಾಡುತ್ತ ಕುಣಿದವರು ನೀವಲ್ಲವೆ ?
ಮಲೆನಾಡ ಹೆಣ್ಣಿಂದು, ಒಲವಿತ್ತ ಹಣ್ಣೆಂದು
ಏನೇನೊ ಬರೆದವರು ನೀವಲ್ಲವೆ ?
ಚಂದಿರನ ಮಗಳೆಂದು, ಚಂದ್ರಮುಖಿ ನೀನೆಂದು,
ಹೊಸ ಹೆಸರನಿಟ್ಟವರು ನೀವಲ್ಲವೆ ?
ಮಲ್ಲಿಗೆಯ ದಂಡೆಯನು ತುರುಬಿನಲಿ ಗಿಡಿದವರು,
ತುಟಿಗೆ ತುಟಿಯ ತಂದವರು ನೀವಲ್ಲವೆ ?
ಬಡತನವೊ, ಸಿರಿತನವೊ, ಯಾರಿರಲಿ, ಎಲ್ಲಿರಲಿ,
ದೊರೆಯಾಗಿ ಮರೆವವರು ನೀವಲ್ಲವೆ ?
ಗಂಡನಿಗೆ ಒಪ್ಪಾಗಿ, ಕಂದನಿಗೆ ದಿಕ್ಕಾಗಿ,
ಪಯಣದಲಿ ಜೊತೆಯಾಗಿ ನಾನಿನಿಲ್ಲವೆ ?