ಎದೆ ತುಂಬ ನಕ್ಷತ್ರ.

೧.ಅಸ್ತವ್ಯಸ್ತ.

ನೀನು ಅರಳಿದ ಮೊಗ್ಗು, ಹಕ್ಕಿ ಹಾಡಿನ ಇಂಪು

ನಕ್ಷತ್ರಗಳ ಚೆಲ್ಲಿ ಹೋದ ಕವಿತೆ ;

ನಿದ್ದೆಯೂ ನೀನೆ, ಕನಸೂ ನೀನೆ ಇರುಳಿನಲಿ

ಅರ್ಥವಾಗದು ನನಗೆ ನಿನ್ನ ಪ್ರಶ್ನೆ.

ಹಸಿದ ಮಕ್ಕಳ ಕಣ್ಣನೀರು ನಿನ್ನಯ ಕವಿತೆ,

ಉಸಿರು ಕಟ್ಟುವೆ ಏಕೆ ಅದನು ಕೇಳಿ;

'ನೀರ ಬೆರಸದೆ ಹಾಲು ಮಾರುವುದೆ'? ಎನ್ನುವೆಯ,

ಅಂಥವರು ನಿನಗೆಲ್ಲಿ ಸಿಕ್ಕಬಹುದು ?

ನೀರು ಬೆರೆಸಿದ ಹಾಲು ಕುಡಿದು ಬೆಳೆದಿದೆ ಕಂದ,

ನೀರು ಬೆರಸದ ಹಾಲು ನಿನ್ನ ಕವಿತೆ ;

ಟೀಕೆ ಟಿಪ್ಪಣಿಗಳಿಗೆ ಬಲಿದೂರ ನೆಲಸಿಹುದು,

ತಂಬೆಲರ ನುಡಿಯಲ್ಲು ಅರ್ಥವಿರಬಹುದು.

ಬರಿಮೈಯ ಹೆಣ್ಣು ಪೀತಾಂಬರದ ಗೀತವನು

ಹಾಡುತ್ತ ಬರುತಿಹಳು ಬೀದಿಯಲ್ಲಿ ;

ಬದುಕು ಅಸ್ತವ್ಯಸ್ತ ; ಗುರಿ ದಾರಿಗಳ ನಡುವೆ

ಕಂದಕಗಳಿರುವುದನು ನಾನು ಬಲ್ಲೆ.

ನಿನ್ನ ತೂಕಡಿಕೆಯನು ನಾನೀಗ ಕಂಡಿಹೆನು,

ನಿನ್ನ ಕೋಣೆಗೆ ಹೋಗಿ ಮಲಗು ನಲ್ಲೆ!