da WhatsApp ...

LI FESTI DI DICEMBRI

A lu quattru Barbaredda,

a lu sei Niculedda,

all’ottu Maria,

a lu tridici Lucia,

a lu vintunu San Tummasu,

a lu vinticincu Nascita Santa,

a lu vintottu Stragi d'Innuccenti,

a lu trentunu San Silvestro Papa,

finisci lu misi e trasi l’annata.

A lu sei la ‘Pifania, tutti li festi manna via.

Arrispunni la Cannilora: “Ci sugnu iò ancora!”.

‘Mmaculata.

O Madonna ‘Mmaculata

a San Franciscu vinirata,

la tò chiesa è china china

a la nuvena la matina.

Veni l’Angilu e ti dici

cà sta’ p’essiri felici,

lu Bamminu sta’ aspittannu

cu amuri e tantu affannu.

La tò statua è tutta d’oru,

ma lu tò cori è lu tesoru,

sempri a tia ni rivulgiemmu

e cunsigliu ti chidiemmu.

Siemmu tutti bisugnusi,

duna aiutu a li carusi,

siemmu tutti preoccupati,

vuennu crisciri sbandati.

Duna a tutti la saluti,

a li malati duna aiuti,

duna sempri la pacienza

e videmma la spiranza.

Matri di misericordia,

leva tutta ‘sta discordia

e a la genti di ‘sta terra

lu pinsieru di la guerra.

Granni Matri miraculusa,

ni Tia sugnu fiduciusa,

Matri Santa Cunsulatrici,v

tutti li nuesci casi binidici.

E veni Maria 'Mmaculata

Si presenta a la me porta,

si presenta 'n cumpagnia;

è Gesù cu la Madonna,

è Gesuzzu cu Maria.

< Beddamatri cca chi fai?

La me casa è scunzulata,

senza paci e senza amuri,

chi cci fai cu' to Signuri? >

< Senza patria e senza regnu,

cercu chiddi comu a tìa,

dammi locu, dammi focu,

ca ti fazzu cumpagnia.>

< Matri Santa Addulurata,

io ti dassi lu me cori

ma è vacanti e senza amuri,

trovi sulu lu duluri.>

< Figghia mia, nun dispirari,

vinni cca pi cunzulari,

lu tò amuri nun è mortu,

nta li vrazza io ti lu portu;

puru Iddu fu tradutu,

misu 'n cruci ed ammazzatu

ma a tri jorna Iddu è risortu

e nte vrazza io ti lu portu.>

< Oh Maria Cunzulatrici

di l'afflitti e d'infelici,

dammi la to cumpagnia,

veni cca, trasi Maria!>

Poesia dialettale siciliana.

LU MIRACULU RI SANTA LUCIA

Mi rissi me nanna, quann'era nica:

"Ora ti cuntu 'na storia antica".

'Ncapu li ammi mi fici assittari

e araciu araciu si misi a cuntari:

"Ci fu 'na vota, a Siracusa

'na caristìa troppu dannusa.

Pani 'un cinn'era e tanti famigghi

'unn'arriniscìanu a sfamari li figghi.

Ma puru 'mmenzu a la disperazioni

nun ci mancava mai la devozioni

e addumannavanu a Santa Lucia

chi li sarvassi di la caristìa.

Un beddu jornu arrivà di luntanu

rintra lu portu siracusanu

'na navi carrica di furmentu

a liberalli ri 'ddu tormentu.

Pi li cristiani la gioia fu tanta

chi tutti griravanu "viva la Santa!"

Picchì fu grazii a la so 'ntercessioni

ch'avìa arrivatu 'dda binirizioni.

Tutti accurrìanu a la marina,

ma era furmentu, 'unn'era farina

e cu un pitittu ch'un facìa abbintari

'un c'era tempu di iri a macinari.

Pi mettisi subitu 'n'sarvamentu

avìanu a cociri lu stessu furmentu

e pi la forma "a coccia" ch'avìa

accuminciaru a chiamalla "cuccìa".

La bona nova arrivà luntana

e pi sta màrtiri siracusana

fu accussì granni la venerazioni

chi fici nasciri 'na tradizioni.

Passà lu tempu di la caristìa

e arristà l'usanza, pi Santa Lucia,

di 'un fari pani, di 'un cociri pasta,

e di manciari la cuccìa e basta.

Ma lu sapemu, ci voli picca

e l'usanza di scarsa addiventa ricca.

A ognunu ci vinni la bedda pinzata

di priparalla chiù elaborata.

Cu ci mittìa lu biancumanciari

e cu vinu cottu ci vosi 'mmiscari.

Cu ci vulìa lu meli ri ficu

e tanti atri cosi chi mancu ti ricu.

Ma je vulissi sapiri, a la fini,

di runni spuntaru li beddi arancini?

E m'addumànnu di quali manu

nasceru panelli e risattianu".

E amentri chi me nanna si sfirniciàva,

a mia lu stommacu mi murmuriava

e mi ricordu chi ci avissi rittu:

"nonnò, zittemuni ch'haiu pitittu!"

Google Sites

Report abuse