Embedded Files
പതിറ്റാണ്ടുകൾക്ക് ശേഷം പുതിയൊരു മലയാള ലിപി പരിഷ്കരണം രണ്ട് കൊല്ലം മുമ്പാണ് സർക്കാർ കൊണ്ടുവന്നത്. പല പത്രങ്ങളും ചാനലുകളും ഇന്ന് ആ പരിഷ്കരണം സ്വീകരിച്ചിക്കുന്നു. പഴയലിപിയും പുതിയലിപിയും ചേർന്ന ഇത്തരം സങ്കരലിപികൾ തുടർന്നും ഉരുത്തിരിഞ്ഞു വരുന്നുണ്ട് - നാമറിയാതെ. കയ്യെഴുത്ത് ക്ലാസ്റൂമിന് പുറത്ത് ഇല്ലാതാവുകയും ബോർഡെഴുത്തുകളും ചുവരെഴുത്തുകളും ഫ്ലക്സുകൾക്ക് വഴിമാറിക്കൊടുക്കുകയും ചെയ്യുന്ന കാലമാണ്. അപ്പോൾ സിനിമാ പോസ്റ്ററുകളും പുസ്തക കവറുകളും മുതൽ ഫ്ലക്സുകളും ഫോണ്ടുകളും ഡിസൈൻ ചെയ്യുന്ന ഗ്രാഫിക് ആർട്ടിസ്റ്റുകളാണ് ഈ പരിണാമത്തിൻ്റെ ചുക്കാൻ പിടിക്കുന്നവർ. അവർ നടത്തുന്നത് ലിപിയിലെ പരീക്ഷണങ്ങളാണെന്നും മലയാള ലിപി അങ്ങനെ പതുക്കെ പരിണമിക്കുകയാണെന്നും അറിഞ്ഞിട്ടൊന്നുമായിരിക്കില്ല; അവർ അവരുടെ ജോലി ചെയ്യുന്നു; ഇന്ന് അല്പമെങ്കിലും പ്രയോഗത്തിലുള്ള രീതികൾ ഡിസൈൻ ആവശ്യത്തിനനുസരിച്ച് എടുത്തുപയോഗിക്കുന്നു.
പഴയലിപിയിൽ ഓരോ അക്ഷരത്തോടും വ്യത്യസ്തരീതികളിൽ ചേരുന്ന ‘ു’ ചിഹ്നത്തിനായി സ്വീകരിച്ചിരിക്കുന്ന കുടക്കാലില്ലാത്ത രൂപമാണ് ഈ മാറ്റങ്ങളിൽ ഏറ്റവും ശ്രദ്ധേയം. 1971-ൽ പുതിയലിപി കൊണ്ടുവന്നപ്പോൾ സ്വീകരിച്ച ഏക പുതിയരൂപം ഈ കുടക്കാലാണ്. ബാക്കി പ്രവണതകളെല്ലാം മുമ്പേ ഉണ്ടായിരുന്നു. ആ ഒരു രൂപത്തേയാണ് അമ്പത് വർഷങ്ങൾക്കിപ്പുറം ആർട്ടിസ്റ്റുകൾ നിരാകരിക്കുന്നത് — രസകരമല്ലേ. ടിവി ചാനലുകളിൽ മുതൽ ഫ്ലക്സുകളിൽ വരെ ഈ ന്യൂജെൻ ‘ു’ ചിഹ്നം ദിവസേന പ്രത്യക്ഷപ്പെടുന്നുണ്ട്. അവയുടെ ഒരു ശേഖരം താഴെ കമൻ്റിൽ കാണാം. ഒരു ഫോണ്ടുപയോഗിച്ച് മലയാളം എഴുതിയ ശേഷം ഇത്തരം ‘ു’ ഉണ്ടാക്കാൻ ഒരു ഗ്രാഫിക് ആർട്ടിസ്റ്റ് മെനക്കെടണമെങ്കിൽ അത്തരമൊരു ഫോണ്ടിന് ശരിക്കും ആവശ്യക്കാരുണ്ടെന്നല്ലേ അർഥം. എന്നിരുന്നാലും അത്തരമൊന്ന് ഇതേവരെ കണ്ടിട്ടുമില്ല. ഇതങ്ങനെ വിട്ടാൽ പറ്റില്ലല്ലോ. കാക്കത്തൊള്ളായിരം മലയാളം ഫോണ്ടുകൾ ഉള്ളതിൽ ഇങ്ങനെയും വേണ്ടേ ഒന്ന്. അതാണ് സുലേഖ. ലിങ്ക് താഴെ.
രചനയുടെ ലേഖ ഫോണ്ടിനെ വെട്ടി ഒരുവിധമാക്കിയാണ് സുലേഖയുണ്ടാക്കിയത്. സാമ്പിൾസ്ക്രീൻഷോട്ട് ഒന്ന് നോക്കിക്കോളൂ. ു ചിഹ്നത്തിലെ ഈ വ്യത്യാസമല്ലാതെ വേറേയും പരീക്ഷണങ്ങൾ സുലേഖയിലുണ്ട്. ഉദാഹരണത്തിന് ‘സ്ത’ പോലെ ഒന്നിനുമീതെ ഒന്നായി എഴുതുന്ന കൂട്ടക്ഷരങ്ങൾ മിക്കതും ഒഴിവാക്കിയിരിക്കുന്നു. അതേസമയം വരിയൊപ്പിച്ച് പോകുന്ന പഴയലിപി കൂട്ടക്ഷരങ്ങൾ ഉൾപ്പെടുത്തിയിട്ടുമുണ്ട്. അതായത്, ‘സ്ത’ ഒഴിവായപ്പോൾ 'സ്ഥ’ സുലേഖയിൽ സ്ഥാനം പിടിച്ചു. കാരണമുണ്ട്. കൂട്ടക്ഷരങ്ങളുടെ താഴേയ്ക്കുള്ള വളർച്ച ബോർഡ്ഡെഴുത്തിലും ചുവരെഴുത്തിലും കൂടുതൽ വരിയകലം ആവശ്യപ്പെടും; വലിയ അക്ഷരങ്ങൾ അടുപ്പച്ചെഴുതേണ്ടി വരുന്ന ഡിസൈനിൽ അതൊരു പ്രശ്നമാണ്. ഇനി ടെക്സ്റ്റ് കൂടുതലുള്ളിടത്താവട്ടെ, അക്ഷരത്തിൻ്റെ ചെറിയ രൂപം താഴെ ഉപയോഗിക്കുന്നതുകൊണ്ട് വായനയ്ക്കും ബുദ്ധിമുട്ടുണ്ട്. ചെറിയ ഫോണ്ട് സൈസിൽ പഴയലിപി ‘സ്ക’യും ‘സ്കു’വും എങ്ങനെ വേർതിരിച്ചറിയും എന്ന് ആലോചിച്ചാൽ ഈ പ്രശ്നം മനസ്സിലാവും. ഡിസൈനർമാർ പലപ്പോഴും ഈ ഒരു പ്രശ്നത്തിന് രസകരമായ ഉപായങ്ങൾ ഉപയോഗിക്കും. ഒരു ഉദാഹരണം താഴെ കമൻ്റിൽ. അതുകൊണ്ടാണ് രൂപങ്ങൾ അധികം താഴേക്ക് വളരാത്ത രീതികൾ സുലേഖയിൽ സ്വീകരിച്ചത്.
സിസ്റ്റത്തിൽ മലയാളം വായിക്കാൻ പ്രത്യേകം ഫോണ്ട് ഇൻസ്റ്റാൾ ചെയ്യുന്ന കാലമൊക്കെ പോയി. എന്നാലും അതിന് പാങ്ങുള്ളവർ സുലേഖ പരീക്ഷിച്ച് നോക്കി അഭിപ്രായം പറയൂ. ഇത്തരം ന്യൂജെൻ ലിപി നിങ്ങൾക്ക് വായിക്കാൻ എളുപ്പമുണ്ടോ? പഴയലിപി തനിമക്കാർക്ക് എന്ന് വേണ്ട പുതിയലിപി പ്രാഗ്മാറ്റിസുകൾക്കും ഇത് ഒറ്റനോട്ടത്തിൽ ഇഷ്ടമാവില്ലെന്ന് ഉറപ്പ്. എന്നല്ല, ചെറുബാല്യക്കാരല്ലാത്തവർക്കാർക്കും ഇഷ്ടമാവില്ല — പത്തമ്പതുകൊല്ലം കണ്ടുപരിചയിച്ച രൂപങ്ങളല്ലല്ലോ ഇത്; എന്നാലും കുറച്ച് നാൾ കഴിഞ്ഞാൽ ഇതിലെ രു-ഉം തു-ഉം ഒന്നും അത്ര അഭംഗിയായി തോന്നില്ല എന്നാണ് എൻ്റെ അനുഭവം.
Page updated
Google Sites
Report abuse