4.3.- Lonxitude

En mostraxes baseadas en arrastres, percorridos a pé o en mergullo, o trazado das franxas utilizadas como unidades de mostraxe pode non ser rectilíneo. Os datos obtidos con estas técnicas poden ser asimilados, con certas reservas, a datos cuantitativos, realizando unha estimación da superficie total do fondo mariño que foi “barrido” en cada unidade de mostraxe. Xeralmente o ancho da franxa incluída na unidade de mostraxe permanece fixo. Sen embargo, a lonxitude dos percorridos ou transectos resulta máis complicada de calcular cando estes non son rectilíneos.

Por outra banda, á hora de representar xeograficamente os datos relativos a un transecto soen asignarse a un dos puntos do extremo do transecto ou ó punto medio do mesmo. Cando os transectos non son rectilíneos, coñercer o punto medio do percorrido non é tan inmediato como no caso de percorridos rectilíneos e require coñecer unha serie de puntos ó longo do transecto, ademais do inicial e final.

A ferramenta “Transectos” da aplicación ARouSA permite calcular stocks de bancos marisqueiros a partir de datos de mostraxes realizadas con transectos. Cando os transectos son rectilíneos a ferramenta calcula, durante a rutina de procesado, o punto medio dos transectos. Sen embargo, no caso de transectos non rectilíneos ou arrastres, esta información debe ser achegada polo usuario nas planillas de datos de frecuencias ou de tamaños individuais (“Datos_planilla_frec_a.xls” e “Datos_planilla_ind_a.xls”) confeccionadas especificamente para este tipo de mostraxes non rectilíneos.

A ferramenta “Lonxitude” permite calcular a lonxitude de transectos non rectilíneos así como as coordenadas do punto medio do transecto a partir das coordenadas dunha serie de puntos pertencentes ó transecto. Os resultados obtidos poden ser exportados no formato axeitado para a representación gráfica do punto medio e para a importación ás planillas de datos empregados pola aplicación ARouSA para o cálculo de stocks por medio de unidades de mostraxe en transectos non rectilíneos.