Embedded Files
Ponte… nas Ondas! fixonos un agasallo deses que deixan pegada. Tivemos na Biblioteca unha xornada de formación que uniu música, radio e moita ilusión, da man de dous cracks: Pancho Álvarez e Damián Alonso. A actividade estivo pensada para o alumnado de Portugués de 3º e 4º da ESO e serviu para demostrar que o noso patrimonio inmaterial está máis vivo ca nunca cando se comparte, se canta e se conta entre todas e todos.
O grupo de 3º comezou no salón de actos cun encontro musical con Pancho Álvarez e coa profe Marilú. Pancho trouxo instrumentos antigos, deses que ás veces só vemos nos libros, e púxoos a soar diante de nós. Entre anécdotas e risas, fomos descubrindo cancións populares que están na memoria de todos e todas. O mellor é que non quedou en “escoitar”: cantamos, marcamos os ritmos e ata aprendemos pequenos trucos. A hora pasou voando, e saímos coa sensación de ter feito unha viaxe á raíz da nosa música.
Mentres tanto, na Biblioteca, o grupo de 4º da ESO e a profe Carmen traballaron con Damián Alonso nun obradoiro de iniciación á radio.
Primeiro practicamos a lectura expresiva: como cambia un texto cando xogamos coa entoación, as pausas e o volume.
Logo desmontamos e montamos un bo guión: apertura, presentacións, pezas, enlaces, despedida… Paso a paso, cada equipo foi escribindo o seu propio guión, utilizando libros da biblio e coidando a clareza e o ritmo para que a audiencia non se perda e quede con ganas de máis.
Na segunda hora xuntámonos todos na Biblioteca e montamos un programa de radio en directo. Os guións de 4º foron tomando vida ao micrófono, e entre sección e sección entraban as interpretacións musicais das alumnas e alumnos de 3º xunto con Pancho. Alternamos noticias culturais, pequenas entrevistas improvisadas, curiosidades científicas e temas tradicionais. O resultado foi un espazo vivo, dinámico e moi noso, no que cada quen achegou o mellor de si: voces, instrumentos, coordinación e, sobre todo, ganas de pasalo ben aprendendo.
Rematamos cun gran aplauso para Pancho e Damián, dous divulgadores que saben conectar coa xente nova e facer que o patrimonio inmaterial sexa algo que se toca, se canta e se comunica. Grazas tamén ao alumnado e as profesoras implicadas. Volvemos ás aulas con ideas frescas para seguir creando: máis música, máis radio e máis cultura compartida. Se a escola é unha ponte, hoxe cruzámola a ritmo de pandeiro e con voz de antena aberta. Até a próxima!
Page updated
Report abuse