Embedded Files
Hoxe, 30 de outubro de 2024, celebramos no noso instituto unha nova edición do Samaín, unha das datas máis agardadas do outono.
Como xa é tradición, o alumnado de 1º e 2º da ESO encheu as aulas de creatividade e misterio coa súa decoración temática, creando auténticas obras de arte terroríficas que nos fixeron sentir que o mundo dos vivos e o dos mortos estaban máis preto ca nunca.
Houbo os xa tradicionais xogos populares, asamos castañas e tamén música.
Pero este ano, ademais, vivimos momentos moi especiais que fan desta edición algo inesquecible. Na biblioteca tivo lugar un desfile único, organizado polo Club de Fíos, onde se presentaron prendas feitas a man polas propias alumnas. Cada peza contaba unha historia, unha inspiración, unha emoción... Foi un verdadeiro espectáculo de orixinalidade e talento.
Tamén se celebrou o concurso de Microrrelatos de medo, organizado polo equipo da Biblioteca en colaboración co equipo de Dinamización da Lingua Galega.
O microrrelato, cunha extensión máxima de 250 palabras, tiña que ter como protagonista un ou máis seres míticos galegos.
O relato tiña que escribirse de maneira presencial na biblioteca así que ás 9 da mañá comezaron a chegar os escritores e escritoras, que tiñan ata as 10:25 para entregar o seu relato.
A imaxinación e o misterio mesturáronse en pequenas historias que puxeron os pelos de punta a máis dun.
Foi un día cheo de emocións, participación e moita ilusión. Todo o que vivimos este Samaín, cada decoración, cada palabra escrita, cada deseño e cada risa, quedará para sempre na memoria de toda a comunidade educativa. Porque, ao final, estes momentos compartidos son os que fan escola e deixan pegada.
Page updated
Report abuse