Markmið með vorskólanum er skapa öryggi og jákvæðar væntingar til skólabyrjunar. Í vorskólanum taka elstu börnin í leikskólanum þátt í starfi grunnskólans. Þau fá tækifæri til að kynnast umhverfinu í grunnskólanum bæði innan og utan og taka þátt í ýmsum kennslustundum. Lögð er áhersla á að börnin fái að taka þátt í öllum stundum dagsins, þau fara í matsalinn, skammta sér sjálf og borða með yngsta stigi, fara í íþróttahúsið, leika sér úti í frímínútum og kynnast bæði skólalóðinni og nemendum á yngsta stigi. 

Börnin taka einnig þátt í kennslustundum þar sem kennt er eftir Byrjendalæsi. Í vorskólanum 2025 var unnið með bókina Skrímsli í heimsókn. Skrímslabækur Áslaugar Jónsdóttur eru stuttar, skemmtilegar, vel myndskreyttar og ná vel til barnanna. Lykilorðið var heimsókn þar sem að börnin komu í fjórar heimsóknir í grunnskólann á síðasta skólaári. 

Vorskólinn er haldinn í maí á hverju ári og er þrír dagar frá kl. 10:00-13:30.  Þar hitta börnin umsjónarkennara sína sem munu kenna þeim í fyrsta bekk.  Þau fá að vera í stofunni sem þau verða í komandi haust og á meðan er núverandi fyrsti bekkur með öðrum bekk, þar sem þau verða saman í teymi á næsta skólaári.  Leikskólakennarar fylgja börnunum og eru með þeim í sitthvorri stofunni á meðan vorskólanum stendur.

Foreldrar fá upplýsingar um Vorskólann að hausti og aftur í maí áður en skólinn byrjar. 

Kennarar beggja skólastiga eru í samráði fyrir Vorskólann um hvernig honum er háttað hvert sinn.

Eftir Vorskólann hittast kennarar aftur á skilafundi þar sem upplýsingar um börnin skila sér milli skólastiga.

Byrjendalæsi byggist á markvissri og stigvaxandi lestrarkennslu þar sem lestur, ritun, hlustun og tal þróast samhliða. Kennslunni er skipt í þrjú þrep sem styðja við málþroska, læsi og skapandi tjáningu barna. 

Á fyrsta þrepi er gæðatexti lesinn fyrir nemendur, í þessu tilfelli varð bókin Skrímsli í heimsókn fyrir valinu. Kennari byrjar á að sýna börnunum textann og vekja athygli á efni hans og hvetur þau til spurninga og vangaveltna. Síðan er textinn lesinn fyrir eða með börnunum og innihald hans rætt á ýmsa vegu. Börnin skoða valin orð og merkingu þeirra, ræða ýmis álitamál og dýpka skilning sinn á efninu. 

Lagt er upp með að textinn sem notaður er í Byrjendalæsi sé fjölbreyttur, s.s. barnabækur, fræðitextar, myndefni og ljóð og að fjölbreytni sé í aðferðum við lestur, ritun og aðra miðlun. Kennarar velja textana út frá markmiðum hverju sinni og gæta þess að þeir höfði til nemenda. Við val á texta hafa kennarar í huga  félags- og menningarlegan fjölbreytileika nemendahópsins. 

Bókin sem varð fyrir valinu fjallar um Stóra skrímslið og Litla skrímslið. Skrímslin tvö eru vön að fara saman í veiðiferð á laugardögum. Einn daginn kemur babb í bátinn, Litla skrímslið er upptekið því að Loðna skrímslið er komið í heimsókn.  Í bókinni er fjallað um vináttu og hvernig hægt er að leyfa öllum að vera með og þannig tengist bókin markmiðum vorskólans. 

Á öðru þrepi Byrjendalæsis er unnið með tæknilega þætti læsis svo sem samband stafs og hljóðs, umskráningu, réttritun og endurþekkingu orða. Efniviður í þá vinnu er sóttur í textann sem búið er að lesa og ræða á fyrsta þrepi. Úr textanum er jafnframt valið lykilorð sem er stökkpallur í þá tæknilegu vinnu sem fyrir liggur.

Lykilorðið var heimsókn. 

Lykilorðavinna á töflu. Stafurinn var skoðaður og börnin spreyttu sig á að finna orð sem byrja á Hh eða hafa Hh í sér. Einnig léku þau sér að því með kennaranum að klippa orðið í sundur heim - sókn.

Stafainnlögn H og h, hljóð, stafadráttur og orð sem byrja á Hh. 

Á þriðja þrepinu byggja nemendur upp heildstæðan texta. Þeir eru hvattir til að tjá eigin þekkingu og skoðanir á fjölbreyttan hátt og nota til þess aðferðir sem þeim hafa verið kenndar. Þeir semja nýja texta, s.s. sögur og ljóð, útbúa hugtakakort eða teikna og skrifa á þann hátt sem hentar markmiðum og lesendum hverju sinni. Þriðja þrepið er oft samþætt með list- og verkgreinavinnu, þar sem börnin endurskapa eitthvað sem tengist textanum í gegnum sjónlistir, tónlist eða leiklist. 

Hægt er að útfæra þriðja þrepið á ótal skapandi vegu, þar sem dagskráin var þétt í vorskólanum var ákveðið að á þriðja þrepinu fengju börnin að skapa sitt eigið skrímsli með leir.