Val á bókinni

Flökkusaga er hjartnæm saga um fjölbreytileikann, fordóma, söknuð og vináttu, skrifuð af Láru Garðarsdóttur. Bókin er ein af þessum frábæru barnabókum sem hægt er að vinna með á ótal vegu og því varð hún fyrir valinu í seinni þemavinnu vetrarins.

Flökkusaga fjallar um ísbirnina Ísold og mömmu hennar sem neyðast til að flýja heimkynni sín og leita á nýjar slóðir. Í bókinni eru margir áhugaverðir þræðir sem hægt er að vinna með og vekja áhuga barna á mörkum leik- og grunnskóla, einn þeirra er vinátta ísbjarnar og skógarbjarnar sem eru á svo margan hátt líkir en líka ólíkir. Læsisvinnu út frá bókinni má auðveldlega samþætta með bæði náttúru- og samfélagsgreinum, auðvelt er að tengja söguna reynsluheimi barnanna og nærumhverfi barnanna en á Húsavík er hægt að skoða ísbjörninn sem gekk á land í Grímsey 1969 í Safnahúsinu.

Að tengja nám við raunverulegan atburð, eins og komu ísbjarnarins til Grímseyjar, eykur forvitni og dýpkar skilning barnanna á viðfangsefninu.

Skiptiheimsóknir

Þemavinnan var unnin í skiptiheimsóknum þar sem að börnin á elstu deild leikskólans og börnin í fyrsta bekk heimsóttu hvert annað og Safnahúsið og unnu saman fjölbreytt og skapandi verkefni sem öll miðuðu að því að efla tengsl, læra um náttúru og samfélag og vinna með læsi í víðum skilningi.

Markmið

Að nemendur:

geti sagt frá helstu einkennum ísbjarna, heimkynnum þeirra og lifnaðarhátta
rannsakað uppruna ísbjarnarins á Safnahúsinu á Húsavík og tengt uppruna hans við nærumhverfi sitt
skrifað bréf til að afla upplýsinga
þekki og geti nefnt stafina Ee, Ii og Ei
geti klappað og talið atkvæði í orðum
geti notað forritið Osmo words til að æfa sig í umskráningu

Ísbjörninn úr Grímsey

Í Byrjendalæsi er unnið með fjölbreytta texta og þar á meðal gamlar fréttir af vef.

Frétt úr Degi

Frétt úr Morgunblaðinu

Í Byrjendalæsi er lagt upp með að viðfangsefni barnanna í læsisnámi séu áhugaverð og að nemendur geti á einhvern hátt tengt við þau því fannst kennurum upplagt að fara á Safnahúsið og skoða ísbjörninn sem þar er og rannsaka sögu hans. Í ljós kom að ísbjörninn var skotinn í Grímsey í janúar 1969. Saga ísbjarnarins er áhugaverð en það var ungur drengur sem var að reka kindur á beit sem fyrstur varð var við ísbjörninn á eyjunni. Hann taldi sig vera horfa á hest sem var á þessum tíma í eynni og var frekar ljós á litinn. Við nánari sýn sá hann að svo var ekki og flýtti sér heim og lét pabba sinn vita. Pabbi hans hélt til að byrja með að þetta hlyti að vera hesturinn en drengurinn gaf sig ekki og heimamenn lögðu af stað vopnaðir og felldu dýrið. Ísbjörninn var fluttur til Húsavíkur og stoppaður upp og er hann á Safnahúsinu á Húsavík.

Umsjónaraðilar verkefnisins höfðu samband við drenginn sem fann ísbjörninn á sínum tíma sem í dag er að sjálfsögðu orðinn fullorðinn maður og fengu leyfi hans til að senda bréf með spurningum varðandi þetta ævintýri. Með aðstoð kennaranna skrifuðu þau bréf með mörgum góðum spurningum sem Óli, ísbjarnardrengurinn svaraði skýrt og hnitmiðað. Börnunum fannst svolítið skrýtið að hann væri orðinn fullorðinn og ætti börn og barnabörn. Það vakti jafn mikla hrifningu hjá bæði ungum sem fullorðnum að fá tækifæri til að heyra um þessa lífsreynslu frá fyrstu hendi.

Hér má sjá bréfaskriftir á milli barnanna og Óla, virkilega flottar spurningar hjá börnunum sem varpa ljósi á hvað gerðist þegar ísbjörninn gekk á land.

Bréf til Óla.pdf

Bréf frá Óla.pdf

Verkefni

Hjálpaðu Ísold heim er málörvunarborðspil. Börnin kasta teningi og segja frá hvað er á myndinni sem þau lenda á og á hvaða staf viðkomandi mynd byrjar á.

Samstæðuspil með bókstöfum og myndum úr bókinni.

Í Osmo Words var útbúinn leikur með myndum úr bókinni. Til að byrja með eiga börnin að finna fyrsta staf í orðinu en borðin í leiknum eru fjögur og verða flóknari. Til að mynda eiga þau að skrifa allt orðið í endaborðinu.

Í síðustu skiptiheimsókninni tók safnvörður á móti hópunum í Safnahúsinu á Húsavík og sýndi þeim ísbjörninn og fræddi börnin um sögu hans.

Page updated

Report abuse