電池種類及建議

AAA、AA、C、D 鹼性、碳鋅電池

個人認為呢個世界上最失敗，市面上最垃圾既電池，應該係上世紀60年代開始流行既鹼性(alkaline)電池。呢類電池根本就係小型便攜電器既謀殺者，因為非常容易漏液。入左電池，無論用唔用，就算幾個月，未用過，都好容易會無端端漏液，如果一段時間唔處理，基本上件電器就玩完。或者甚至乎完全未用過既電池，包裝都未拆，就已經漏緊汁。液體會腐化電路或者鋁合金或鐵金屬。除非定時檢查同更換，否則幾乎每個人都會遇過電池漏水而令到件電器無反應。一個唔留神，支收藏左好耐既電筒就有機會玩完。

另一種碳鋅(carbon zinc) 電池，通常標有 Heavy Duty 或者 Super Heavy Duty，價錢相對便宜，電量只有鹼性電池三四成，理論上同樣會漏液，因為在使用時鋅外殼會被腐蝕而穿窿，不過我自己經驗，碳鋅電池漏液機會相對鹼性電池低些少。碳鋅電池因為內阻較大，唔太適合電筒呢種高電流產品，所以屋企鬧鐘、遙控之類就合適。鹼性電池適合高電流產品，例如電筒之類，如放鬧鐘遙控之類實會漏液，不過放電筒一樣會漏液。

AAA、AA Eneloop 低自放電池

個人認為 Sanyo 及現在 Panasonic 既 Eneloop，係有史以來最好既民用電池。基本上好難出現漏液情況，而且充電後放好多年都有電，對於電力保存，基本上有 CR123A 一次性鋰電池幾成功力。另外就係非常安全，而且日本製（市場已經出現中國製劣質 Eneloop），基本上唔會出現爆炸，放床頭放幾年都無友怕。建議將所有古董電筒都轉用 Eneloop。C、D 型電池電筒都可以使用轉接器用 AA 尺寸，或者去日本買 C、D 型 Eneloop。C、D 型 Eneloop 其實裡面係幾粒 AAA 或者 AA 型 Eneloop 組成，只有日本有賣。當然仲有 Toshiba 之類真正 C、D 型充電電池，不過係強國製造。個人認為 Eneloop 價錢便宜、安全、高質，不二之選。另外日本製造 Fujitsu，甚至係宜家家私 LADDA 電池，其實都係同一間日本 Eneloop 生產，係同樣產品。不過陸續有好多電池轉為中國製，包括 Amazonbasics AA / AAA，購買時注意，睇清楚係日本產先好買。

注意：市場上已經出現中國製造 Eneloop，購買之前一定要看清楚 Made in Japan 先好買。外國測試過中國製版本效能差很多（若干次冲電後電容量下降速度比日本版本快得多）。

http://www.ultrasmartcharger.com/phpBB3/viewtopic.php?f=5&t=81

CR123A 一次性鋰電池

一次性CR123A比較貴同埋現在比較少地方可以買到，通常可向鴨寮街比較好信譽既攤檔買，大概十二三蚊一粒。極端情況下有少量爆炸報告，不過比充電式鋰電池就安全得多。

我有幾粒1985年左右生產既古董CR123，已經超過35年歷史，居然有電而且電壓量出來好飽滿（但未做過放電測試）。此電池最少可以存放十幾年而電力不流失，可以儲存多些少準備世界末日果時用。雖然好細粒但能量密度高，電量非常大。不過就唔好買強國牌子既 CR123A，因為電量流失好快，頂唔到幾年，而且經常聽到爆炸報告。請選擇 Panasonic, Duracell, Energizer 或 Surefire 等大牌子（近年不一定係美國製，而且據聞所有呢d牌子其實都係 Panasonic 工廠生產），而且要提防強國假貨。絕對不要選擇中國牌子的CR123A，因為電力保存時期、電容量以及安全性都差得多！要特別注意市場上有號稱 3V 或者 CR123 充電電池，呢類電池都係某強國產品，大多係 Lifepo4 電池，充滿電3.4V，如果是燈泡電筒，一定會燒燈泡。

可充電鋰電池

可充電鋰電池，呢種本來係工業用電池，應當小心使用。能量密度高、電壓高、電力流失率低，唯一既問題亦係最大問題，就係會爆炸。緊記呢種電池係容易爆炸或起火，如一定要用必須買日本產或日本牌子，最少都要韓國產韓國牌子。如買某強國牌子強國產鋰電池，請順便買家居保險和人壽意外保險。唯一相對安全既鋰電池叫磷酸鐵鋰電池，相對比較難爆炸或起火，不過優質磷酸鐵鋰電池市場比較少。謹記，鋰電池會爆炸！

現今LED時代，個人認為，如果日常使用的話，簡簡單單買 AA 電池電筒，用日本製 Eneloop，絕對安全又便宜。而且而家既AA電筒，已經過千幾二千流明，並不一定要用危險性高既鋰電池。