L

Litons e Litoners

Os litoners son arbols mediterranios, que se troban por muitos puestos en o Semontano. Se conoxe que lis cuaca a morfuga d’ixas redoladas. Tienen os trallos bien zereños e puen fer-se bien grans. As fuellas tienen una polita color berda. Os suyos fruitos son os litons. Cuan son maduros tienen a piel d’a color d’o tabaco e polpa amarillenca no muito abundán arredol d’o ruello. A suya sapia ye dulza.

En l’agüerro, en empezipiar a escuela, beniban os litons. Dimpués de minchar-los-nos quedaban os ruellos, que con l’aduya d’un cañuto de caña fébanos serbir de proyeutil en as nuestras inozens guerras infantils.

Ye de siñalar que, en as redoladas d’o dominio lingüistico de l’aragonés, cuasi tota ra chen esconoxe a suya denominazión en castellano, aturando-ie nomás l’apelatibo en aragonés: litón, litonero.  Litonero, ye un árbol que o suyo chenero ye masculino contrariamén á o que gosa pasar en aragonés, que a mayor parti d’os arbols tienen chenero femenino.

Al ser fruitos chiquins, os litons se fan serbir de contimparazión ta esprisar que atras fruitas, como olibas , almendras, manzanas u o que siga… yeran chiquerrinas. Asinas, por exemplo: “al no aber plebito guaire estiaño as olibas son como litons”

Litón, promana d’o latín bulgar LOTO, -ŌNIS, deribato d’o latín clasico LOTUS, e iste d’o griego LŌTÓS

O suyo nombre zientifico ye Celtis Australis. En catalán ye lledó e lledoner, tanimientres que o castellano almez e o franzés micocoulier, asinas como l’oczitano micocolier e falabreguier promanan d’atros etimos.

Otubre de 2025, BOMBOLÓN BUXO