B

BETIELLO/A 

Ye a cría d’a baca dica que tiene un año u dos, que allora se clama bimardo/a. D’o latín VĬTĔLLUS, VĬTĔLLA, achiquidors de VĬTŬLUS, VĬTŬLA. 

En aragonés se troba tamién as barians betiecho, betieto en redoladas an que se fazió  l’apicopalatalizazión d’a cheminata latina -LL-. En aragonés ribagorzano ye bediello, con sonorizazión d’a oclusiba xorda interbocalica t > d. Tamién bediell, con a mesma sonorizazión e cayedura d’a o zaguera, mantenendo perén a diftongazión Ĕ > ie.

En catalán ye vedell, en oczitano vedèl u vedèth, no fén-do-se a diftongazión en istas

luengas. En franzés: veau. 

O bocable castellano becerro, a RAE e Corominas lo fan deribar de ibex, -ĭcis 'cabra  montés' y -rro; cf. bicerra. O que risulta, ta yo lo menos, una miqueta estranio. S’emplega  vitela ta fer referenzia á ra piel d’ixe animal que se feba serbir ta manuscritos u miniaturas  en as puendas meyebals.  

En o Semontano se conserba a esprisión “gordo como un betiello”. En a Coronica de San  Chuán d’a Peña se fa referenzia á “bacas betelleras”, ye dizir, paritas u con betiello. 

Chulio de 2025, BOMBOLÓN BUXO

BIRACA/BIRAGA

A biraca u biraga ye una planda, una mena de luello que o suyo nombre zientifico ye: Lolium

Temulentum

Se cría espontaniamén en os sembraus mezclata con o trigo, por o que mingua o suyo

rendimiento. Minchata ye berenosa, debito a o suyo contenito en alcaloides (temulina) e a

fongos que infestan a ormino as suyas simiens. Tot o debandito esplanica que s’emplegue en

contimparazions u azeuzions asabelo de negatibas.

Ista planda amanixe zitata ya en o Ebanchelio de san Mateu, en a parabola “d’o trigo e d’a

biraga”.

En aragonés se fa serbir en a esprisión “ye más malo/a que a biraga”

MOSTOLAY reculle asinasmesmo una azeuzión fegurata d’o bocable: “muller con poders

machicos daus por o diaple, bruixa. Muller malota, gripia”

L’ARAGONARIO igualmén, antiparti d’a descrizión propia d’a planda, rechistra: “Cosa que fa

daño a unatra, maleando-la u chitando-la a perder”.

Biraca/biraga ye un bocable aragonés que de traza bien platera amuestra afinidá con l’euskera

Iraka, con os oczitanos Iraga, Abriaga, e con o franzés Ivraie : que, seguntes o CNRTL (Centre

National de Ressources Textuelles et Lexicales), ye deribata d’o latín bulgar EBRIACA HERBA,

asinas clamata por a suya capazidá de producir bella mena de zorrera debita a ra suya

tocsizidá.  

Tanimientres o castellano Zizaña, e o catalán Zitzània tienen esferén orichen e promanan d’o

latín ZIZANĬA. Me parixe intresán iste brinco lecsicolochico con afinidá etimolochica entre o

castellano e o catalán, dixando en meyo l’aria de l’aragonés, l’oczitano, l’euskera e o franzés.

Curiosidaz d’a cheografía lingüística…

Agosto de 2026

BOMBOLÓN BUXO.