Kutuxa gaueko animalia bakartia da, eta lurraldeari oso lotuta dago. Orokorrean, emea arreske dagoenean bakarrik agertzen da bere espezieko beste animaliekin. Zuhaitzetara erraz igotzen den basoko animalia da, baina, harriak egotea gustatzen zaio. Horrela, harrien artean jar dezake habia. Habia hori belarra, orbela, goroldio eta lumekin egiten du, udaberri aldera. Entzumena da bere zentzumen garrantzitsuena, nahiz eta ikusmena eta usaimena oso onak izan. Ez du lurrean zulorik egiten.

    Lepazuria baserri inguruan, lastategietan eta baserrietatik gertu bizi da, batez ere neguan. Euskal Herrian hirietan azaltzen ez bada ere, erdialdeko Europan hirietako parkeetan bizi da.

    Uruak denetatik jaten du urtaroaren arabera, batez ere, ugaztun txikiak, intsektuak, txoriak, basoko fruituak... eta batzuetan narrastiak, untxiak, erbiak...; baita orkatz-kumeak ere. Baserritarren artean, oso ospe txarra dauka oilategietan triskantza ederrak egiten dituelako.

    Gaueko ibileretan ibilbide berberak erabiltzen ditu, eta, harrapakinak ohartzerako, harrapatu egiten ditu. Untxien zuloetan ere sartzen da. Habietako arrautzak apurtu gabe garraiatzen ditu, eta jaten dituenean zulo bakar bat egiten die. Basoko arboletako enborretan, markak uzten ditu azkazalekin.

    Ekain-abuztu bitarteko hamabost egunetan, arreske dagoenean, berezko duen zuhurtzia galtzen du, eta egunez ere ikus daiteke. Arren artean borroketan hasten dira, katuen moduko soinuak sortzen dituztela. Behin emea estalita, berriz itzultzen da arra bere bakardadera.

    Emearen barruan, espermatozoideek urtarrila arte irauten dute bizirik eta orduan hasten da 56 bat eguneko kumaldia. Martxo aldera 30 g-ko 2-3 kume itsu jaiotzen dira ile barik. Amarekin egongo dira 2-2,5 hilean, independizatu arte. Denbora horretan, bizi ahal izateko beharrezkoa duten guztia ikasiko dute amarengandik. Normalean, bigarren urtera arreske egoten dira eta hamar bat urte bizi dira.