Ebaluazio-irizpideak

Aljebra (edukiak)

Heziberri: oinarrizko hezkuntzaren kurrikulum aberastuta

• Hizkuntza aljebraikoa: Letren esanahia eta erabilera, magnitude ezezagunak adierazteko.
• Ezezagun bateko lehen mailako ekuazioak.
• Jarraibideak ohiko hizkuntzako adierazpenak hizkuntza aljebraikoan adierazteko eta alderantziz.
• Zenbakizko sekuentzietan propietateak, erlazioak eta erregulartasunak bilatzea eta adieraztea.
• Formula errazetan zenbakizko balioak kalkulatzea.

Aljebra (ebaluazio-irizpideak)

Zenbakizko multzoen erregulartasunak, jarraibideak eta erlazioak deskribatzea, letrak erabiliz kantitateak adierazteko, eta, hartara, zenbakizko sekuentziak adierazpenen bidez laburtzeko, eta formula errazen zenbakizko balioa lortzeko.

• Erregulartasunak modu informalean identifikatzen ditu, zenbakizko sekuentziak abiapuntu hartuta.
• Formula baten zenbakizko balioa lortzen du.
• Argudio logiko zuzenak erabiltzen ditu, ondorioak ateratzeko.
• Lortutako emaitzak antolatzen eta ordenatzen ditu.
• Zenbaki multzo batean egon daitezkeen erregulartasunak aurkitzen ditu.
• Hautemandako erregulartasuna ahozko formula baten edo formula aljebraiko erraz baten bidez adierazten du.

Problemak ebaztea modelo heuristiko bat erabiliz: enuntziatua aztertuz, estrategia egokiak aukeratuz (saiakuntza-errorea, problema errazago bat ebaztea, problema problema txikiagotan banatzea, eskema bat marraztea, etab.) beharrezko kalkuluak eginez, lortutako emaitza egiaztatuz, eta, norberaren mailarako egokia den hizkuntza matematikoa erabiliz, ebazpenean zer prozesuri jarraitu zaion adieraziz.

• Problema irakurtzen eta ulertzen du, eta proposatutako problemen datuak eta ezezagunak identifikatzen ditu.
• Problemak ebazteko aukera ematen duten modelo matematiko sinpleak erabiltzen eta egiten ditu.
• Zenbait estrategia heuristiko dakizki eta aplikatzen ditu, problema ebazteko. Problema ebazteko zenbait alternatiba aztertzen ditu, eta prozesuan zehar aldatzeko aukera izaten du. Soluzioa egiaztatzen du, jarraitutako prozesuari buruz hausnartzen du eta beste problema batzuk ebazteko baliagarriak diren ondorioak ateratzen ditu. Lortutako emaitzak jakinarazten ditu, garatutako ideiak eta prozesuak hizkuntza argi batez azaltzen ditu, eta txosten edo dokumentu digitalak egiten ditu, beharrezkoa bada.

Jarduera matematikoarekin lotutako jarrerak sistematikoki balioestea eta erabiltzea; esate baterako, jakin-mina, pertseberantzia eta norberaren ahalmenetan konfiantza izatea, ordena eta berrikuspen sistematikoa. Halaber, lan-taldean integratzea, besteen iritziak ikasketa-iturri gisa errespetatuz eta balioetsiz, eta helburu komun bat lortzeko lankidetzan aritzea.

• Badaki Matematikako eragiketak eta prozedurak menderatzea garrantzitsua dela, eguneroko bizitzako eta eskolako problemak ebazten laguntzen duen tresna delako.
• Lanean interesa agertzen du eta etengabe saiatzen da. Emaitzak ordenan, argi eta garbi, eta txukun aurkezten ditu.
• Prozesuak eta emaitzak bere mailari dagokion zorroztasunez arrazoitzen eta azaltzen ditu.
• Talde-lanerako zereginak banatzen laguntzen du eta hartutako konpromisoak betetzen ditu.
• Alternatibak planteatzen ditu eta taldeko eztabaida-prozesua eta iritzi-trukea balioesten du, hobetzeko aukera bat den aldetik.
• Benetako munduko eta matematikako munduko problemen artean loturak ezartzen ditu.