Царства Грыбное
Здаецца, на гэтым “матэрыяле” праглядваецца штосьці празаічнае – сваеасаблівы каментар: грыбы з “харатарамі” людскімі, грыбнікі таксама?.. Нават штосьці “афарыстычнае”: “Грыбы не любяць злых, грыбы ад злых хаваюцца…” Момантам сур’ёзна, момантам весела
УЗГОРКІ ЛЕДНІКОВЫЯ
Дарога прагінаецца –
Бяжыць то ўверх, то ўніз,
То ўвіліста ўхіляецца –
Зусім як твой капрыз:
Якую ўзяць правізію
І кошыкі з сабой,
Як выйграць у дывізіі
Грыбной няроўны бой.
Ды клопат лёгкай хмаркаю
Развеяў гор абрыс –
Дарогаю швейцарскаю –
Палёт: то ўверх, то ўніз.
Матор грыбною зонаю
Наўскач ірве аброць.
–Зялёнае? –Зялёнае! –
Прыехалі, выходзь!..
О не-е – мы ў лысагорскае
Паселішча ў садах,
Дзе дождж у кронах порскае,
Цвікамі б’ецца ў дах…
А нам, дальбог, вось гэтае
І налюбкі якраз:
З грыбамі так адлетаваць,
Каб быў зіме запас.
Вязьмо баравіковае
І ў слоіках грузды…
Узгоркі ледніковыя,
Вы ў памяці, як дым…
Было… Грыбныя нерушы,
Цяпельца ля ракі,
Дзе нас, ужо цяперашніх,
Гукаюць грыбнікі.
Туды, туды ў былое,
Да нетраў баравых…
А тыя, тыя двое
Зусім не чуюць іх…
“ГРЫБНОЕ”
Бог лясны на карту ўзяў
Царства – і абнове
Ён па-царску назву даў:
“Царскае Грыбное”.
А вось дзе яна стаіць
Цуда-кропка тая,
Бог наважыў утаіць:
“Кожны Сам шукае!..”
Грыбніку – бестэрмінова:
ад першага грыба – і назаўжды…
КАЛІ ЗАШЭПЧУЦЦА ПАЛЕТКІ…
Калі зашэпчуцца палеткі,
Кашы рыхтуйце, грыбнікі:
Удачай рэдкай на разведку
Выходзяць каласавікі.
Сам генерал грыбнога войска
Яшчэ сядзіць у бліндажы,
А ім: выходзь – і па-геройску
Сваё геройства дакажы.
Вылазь на сонечныя ўзлескі,
Што праглядаюцца наскрозь,
І ў штаб грыбны грыбныя звесткі
Штодня разведай і данось:
Якія ў грыбнікоў намеры?
Ці летнія дажджы ідуць?
І баявы загад: яшчэ раз –
Уласнай галавой праверыць:
Якія там грыбы ядуць…
ЧАКАННЕ
Усё знямела: грыбнікоў
Ні гоману, ні галасу:
Схапілі каласавікоў –
І сцежкі пагубляліся;
І салавей асалавеў;
І сойка стала сонькаю;
І дзік – хоць заганяй у хлеў:
Рахманіцца пад сонейкам;
Рыхтуе ўпотай пчолам збор
Палянка верасовая;
Чырвоны лыч свой мухамор
На людзі не высоўвае;
Мурашнік, нібы вар, кіпіць
І талакуе стоена;
І кнігаўка не просіць піць –
Маўчыць сухмень застольная;
Крумкач, хоць пры карцах радня,
Глякі не адкаркоўвае, –
Такая ў лесе цішыня
Перадбаравіковая…
ЯК ЗНАХОДЗЯЦЬ ГРЫБЫ
Сінявой дыміцца
Буйства верасовае.
Баравік ігліцу
Галавой рассоўвае.
Аж сапе зацята,
Плечукамі торгае:
Чым такая хата —
Лепш па свеце з торбаю!
Ні дзвярэй, ні вокан,
Нават з бітай шыбаю...—
Высядае бокам
Грыбалюбства грыбава.
А па лесе — зыкі,
А па лесе — гойканне.
- Вось бы стаць вялікім
Ды зірнуць з пагорка мне!..
Самая нагода
Пахадзіць па вуліцы:
I чаго народу
Столькі там пяклуецца?
Паднатужыў сілы,
Цягнецца на дыбачкі...
Тут і падкасіла:
- Ах ты, мая рыбачка!
Ах, які мурлацік! —
I пад корань ножыкам...
Шыбаваў па свяце
Баравік у кошыку.
НІБЫ Ў ХОВАНКІ ГУЛЯЕМ…
А здзіўляцца вам не раю:
І грыбы, і грыбнікі
Па сабе ўсё выбіраюць –
Хто дубняк, хто саснякі.
Так і ў нас: хаджу, таўкуся –
І ў абход, і напрасткі, –
Дзе ж грыбы мае? – злуюся,
Дзе вы, дзе, баравікі?!
Можна ж так і лес з прылессем,
Вас шукючы, прайсці.
А наўкол – як цуд, як песня –
Столькі зваблівых мясцін!
Ну, няўжо не даспадобы
Гэты верас вам і мох?
Ці ў вас густ які асобы,
Пра які я ўзнаць не змог?
Нібы ў хованкі гуляем:
Знойдзе хто ці ашукае?..
Толькі хто каго шукае?
Хто каго і дзе чакае?..
Ці на жарт крывое люстра
Нам падсунуў лесавік,
Каб дзе густа, а дзе пуста,
Зрок адводзіў баравік?..
Ну скажыце, дзе маглі б вы
Месца лепшае знайсці?
Хоць вазьмі ды замест грыба
Сам садзіся і расці!..
Як пачуў пра кут лацвейшы
І што я займу яго,
Раптам крыкнуў Цар Святлейшы –
Баравік: –Не дам свайго!
І адкуль ён толькі ўзяўся?
І са схованкі якой
На мяне паход узняўся
Ўсёй грыбною талакой?
От і дзякуй, абаронцы!
Падыходзь! На ўлік бяром!..
Меў мой кош пустое донца –
Зараз – поўны, з каптуром!..
МАГНАТЫ ПУШЧАНСКІХ ЗАМКАЎ…
Магнаты пушчанскіх замкаў,
Магніты блуканняў маіх,
Гукальных, шукальных ранкаў
Па нетрах, дзе неруш прыціх…
Згінаюцца спіны, як дугі:
Да вас з паклонам любы, –
Мы вашы лясныя слугі,
Мы вашы рабы, грыбы!..
Мы вас на руках носім –
Каму яшчэ гонар такі?!–
Сядайце ў кошыкі –
Просім! –
Магнаты-баравікі!..
ПРА ЎДАЧУ
Грыбы шукаць, як і вершы складаць:
Не знаеш, дзе ўдача прыхіліцца…
І ўсё ж удача з удач, відаць,
Чакае, калі гукальшчыкаў раць
Не дыхае ў твар і ў патыліцу…
ЯШЧЭ І ЯШЧЭ РАЗ –
“ЦАРСТВА ГРЫБНОЕ”
Калі дажджы, нібы шаўкі,
Зашэпчуць, навясныя,
Схоў пакідаюць маслякі,
Разведчыкі лясныя.
Выходзяць, прыглядаюцца,
Па ўзгорках пракрадаюцца…
А ўслед за імі – штрафнікі,
Казлы ахвяры, казлякі.
Хоць на прарыў кідаюцца,
Ды ўжо ў адсутных маюцца…
А грыб рагаты, грыб “баран”
Ім б’е натхняльна ў барабан…
А там – за ротай рота –
Грыбная йдзе пяхота:
І падасінавік, і грузд,
І з рыжыкам зрыжэлым
Валуй, нібы на лобе гуз,
На ўзлобку затравелым,
І падбярозавікаў строй,
І махавік плячысты,
І гурт лісічак – хто сястрой,
Хто баявой радысткай…
Калі ж адбухаюць грамы,
Развеецца куродым,
Тут самы час – “А от і мы!”–
Дзяліць узнагароды:
Тылавікі-баравікі,
Паголеныя, сытыя,
І мухаморы-штабнікі,
Нікчэмна-знакамітыя…
Выходзяць моўчкі з бліндажоў,
Каму за прадзеда Яжоў,
Каб выставіць адзнаку,
Хто як трымаў атаку:
Ці пад агонь ірваўся,
Ці бег і азіраўся…
Службіст! Ды стан ягоны
Не выдаюць пагоны:
То ён казляк, то шампіньён,
То выйдзе за апеньку ён…
Але салдат вучоны:
Пазнае й без пагонаў!..
Ды гэта потым. А пакуль
Вунь і адгэтуль і адтуль
Ідзе, ідзе грыбная раць, –
Камусьці ж трэба паміраць…
Стаю на беразе вайны,
І ў тым няма маёй віны,
Што армію ўсю тую
Нічым я не ўратую…
АСЕННЯЯ ГРУБКА
Весела вуркоча грубка:
Цяга ў неба – быццам змей.
Па імшарах ходзіць з лубкай
Дождж асенні – грыбасей.
Будзе ноч, і грубцы будзе
Сніцца летні санцапёк.
Гэты сон яна і людзям
Пакладзе пад цёплы бок.
Спіце, людцы… Ну а тыя –
Залачаць пачне ледзь-ледзь –
Паўцякаюць, залатыя
Сны пакінуўшы калець…
Пабягуць – хто да імшары,
Хто да ўзлеску нацянькі.
І гамоніць грубка з хмарай:
“Ці ж то людзі? – грыбнікі…”
х х х
Калі думы немач грызе
І на сэрца апала скруха,
Кош, што вырас калісьці ў лазе,
Я ў руку – і да лесу трухам.
У бярэзніку сцішу крок,
Азірнуся: ці даганяюць? –
Тыя скруха з грызнёй, – і замок
На вароты лясныя чапляю.
Буду доўга – і вольна – блукаць, –
Хай сабе не патраплю на неруш –
Буду добрае слова шукаць,
Што ўзляціць, нібы дрозд-аперыш.
Як жар-птушка ўваччу мільгане
Той падлётак, яшчэ й прашчабеча
І на дзень абнадзеіць мяне –
Нібы горб які скінуць плечы!..
Адмыкаю лясны заслон:
Гэй, зламыснікі, не іржыце!..
Лесу дзякуй, грыбам паклон! –
Я жывы, я жыву – і жыцьму!..
Заімглёны туманам сум
Пераходжу ўброд па пакошы
І, стамлёны, з лесу нясу
Не грыбоў, а бадзёрасці кошык.
ГРОМ ВЕРАСНЁЎСКІ…
Тры адгалоскі
Аб страчаным свеце:
Гром вераснёўскі
Ў бабіным леце.
Тройчы ў Зялёным
Грымнуў нясмела –
Буркнуў здзіўлёна:
–А так зелянела!..
–“Так зелянела” –
І спрэс пажоўкла, –
Гуў загрыбелы
“Экспрэс—Крыжоўка”.
–“Так зелянела”… –
Ды я не плакаў:
З вядзерцам белых
У такт падтакваў
Мой бор блаславёны,
Баравіковы,
Мой бор – зялёнай
Звінеў падковай.
І што нам восень
За гаспадыня?!
Хоць і не просім,
У зеляніне,
Як павялося,
Навек пакіне!
Вечназялёны –
Ці гром, ці замець…
Кашы ў вагонах –
Грыбы вазамі.
Ці то ў Зялёным,
Ці то ў Крыжоўцы
Ты сеў стамлёны, –
Раскажаш жонцы.
Каго ж пабачыў
На тым паўстанку –
Няхай адзначыць
Душа-баравянка:
Якая лісічка,
А ці сыраежка
Да электрычкі
Паблытала сцежкі…
А гром вераснёўскі
Ў бабіным леце –
Як тры адгалоскі
Аб страчаным свеце…
САКРЭТ
Сакрэты ў грыбнікоў
Бываюць адмысловыя:
Як вызнаць хітры схоў
І звычкі верасовыя;
Як вызначыць маршрут:
Ці нетрамі, ці ўзлескамі;
Як адшукаць той кут,
Дзе ўдачу неруш пестуе;
І як вайстрыць свой зрок
І ўвагу выштукоўваць… –
Ды ёсць галоўны ўрок
Сям’і баравіковай.
Хоць і ў сляпога кош
Напоўніцца да вечара,–
Але – сакрэт усё ж
Грыбны той рассакрэчваю.
Зважай на зрок, на слых –
Ды сутнасць не мяняецца:
Грыбы не любяць злых,
Грыбы ад злых хаваюцца.
РЫЖЫКІ
Рыжыкі, рыжыкі:
І без чаркі – дрыжыкі!
А калі за чаркаю –
Чарка лёгкай хмаркаю
Летуценна сцелецца
Над бяседнай спеліцай.
Рыжыкі салёныя,
Лесам блаславёныя,
Каб каляднай поўняю
Пра яго мы ўспомнілі.
Помнім! Прычашчаемся,
З дабаўкай не спрачаемся.
Не марнеў ніколі
Рыжык у застоллі:
З чаркай ці без чаркі ён –
Частаванне царскае.
Роўніцы не знае
Смаката лясная.
Рыжык рыжачубы,
Рыжык ганаровы,
Рыжык – туз бубновы
Царства грыбнога:
Рыжык ломіць зубы,
Рыжык зводзіць бровы!..–
Ах!.. –
Лес мой, дружа любы,
Будзь жа здаровы!
ххх
У кожнае сасны баравікоў,
Як прад вайной сыноў у мацярок,
I памяць – звон маланкавых падкоў,
I цішыня – узведзены курок.
Нясу па баравінах, па імшках
I радасць, i трывогу за сяйво:
Сядзяць прыгажуны – на паўгаршка! –
Надозімкам, як быццам у жніво.
О шчодрасць неабдумная, няўжо
Вяшчуеш ты бясплённасці бяду?..
...Глядзіць сумненне хітранькім вужом,
A ўсцяж – падлескі молада гудуць.
ххх
Помніце, як птушкі грыбнікам высвіствалі
І пра неруш песні на прамень нанізвалі?..
А як пруцца – бачылі – напралом з транзістарам,
А калі пры сіле – нават з тэлевізарам?..
Ці музычны момант? Ці музычны молат?
Ці то землятрусы музыкі бушуюць?
Хто тут разбярэцца, як займае мову...
А пачнеш гукацца – сам сябе не чуеш...
Вось дзе ў лесе радасці – і звярам, і птушкам!
Гнуцца лозы долу, і сасну хістае.
Дуб, хоць глухаваты, а прасіў заглушкі
Дзятла на ўсе вушы да зімы паставіць.
Аб грыбным сезоне ў прыгараднай зоне
Завываюць трубы і трамбоны гаўкаюць...
З гаю выбягаюць: «Дзе схавацца сёння?!»
Нават мухаморы з бледнымі паганкамі.
Д'ябальскай арцеллю ВІА вар'яцее,
Аб камлі магутныя б'ецца какафонія,
У травінкі кожнай – дрыжыкі па целе,
Гоніць зайца ў вёску дзікая агонія.
Можа, тут прытуліцца,
Можа, тут схаваецца,–
Пасядзіць на вуліцы
З дзедам на завалінцы?..
АРГУМЕНТ
Да спрэчкі аб тым, дзе шукаць “Цэнтр Еўропы”
–І куды я залез?! –
Пытаецца бот мой атопак: –
Гэта ж не лес,
А натоўпы!
–І куды я зайшоў? –
Бота свайго
Паўтараю. –
Дзесяць кашоў
Аднаго
Грыба
Збіраюць!..
Там, дзе быў неруш,
Спрэс
Машыны патопам.
Цяпер і паверыш:
Наш лес –
Цэнтр Еўропы!
ВЕТЭРАНЫ
Кругаля і нацянькі
Ў згодзе з кіламетрамі
Грыбнікі, як чаўнакі,
Ходзяць-шныраць нетрамі.
І між слынных знатакоў
Нерушаў і порушаў
Там і тут адстаўнікоў
Свецяцца аколышы:
З тэхнароў — як баравік,
З пяхоты — падасінавік,—
На грыбны ідуць улік
Сцежкамі ласінымі.
Тут папружку паднатуж,
Чэсць аддай па правілах,—
I грыбы пад капялюш
Цягнуць рукі правыя.
Хто цывільны ці з жанок —
Дзве ўзнімаюць спраўненька:
Як пяцёрачнікі ўрок
Адказаць настаўніку.
Напаўняюцца кашы,
Ногі падбіваюцца —
Ёсць НЗ, і для душы,
Пэўна, трошкі маецца...
Як згукнуцца ўтрох ці ўдвух —
Абжывуць паляначку,
I запусціцца на круг
Франтавая шкляначка.
Праўда, смак зусім не той,
Бо не з гільзы-конаўкі,
А з фігулькі залатой
Дзеляць па наркомаўскай.
Ды не ў гэтым сэнс і лад —
Ліць на дно ці з поверхам...
Сэнс у тым, што дужа, брат,
Зноўку пахне порахам...
I мужуюць грыбнікі,
Як на знатным форуме,
Грыбнікі-адстаўнікі
З неразлучнай формаю.
Пасівелыя — аднак
З мужнымі абрысамі:
Не ў адной фуражцы знак —
Лёсам гарт прапісаны...
Прыдрамнуць — як ваяры,
Што зламалі рыцараў.
Плечы лёгка — без пярын —
Дыхаюць ігліцаю.
Чуюць: дзесьці ў цішыні
Зернейка прабілася,
А зямля за карані
Роспачна ўхапілася...
НА ДЗЕНЬ АД’ЕЗДУ
Я ў лес на развітанне не пайшоў:
Хор адгавораў ледзьве не ахрып,
Дый сам надоены пытаўся ў мурашоў:
«Чаму пад шыгаллем там засядзеўся грыб?..»
Я но пайшоў... А ўчора дожджык быў,
Няхай сабе і кволенькі зусім,—
Мабыць, на дзень ад'езду мне грыбы
Па родных баравінах церусіў...
Я не пайшоў. А з раніцы ўваччу:
Чырвона падасінавік гарыць,
Як светафор — спыніцца і адчуць:
«Куды ты едзеш, дурань, без пары...»
Вунь з-пад лісця лісічак ланцужок
Гатовы напярэймы сігануць,
А ў верасовы глянеш беражок —
Таўстушкі там — на зайздрасць сагану.
З імхоў вылазяць на паўгалавы,
Ільсняцца, нібы тыя кумпякі,
Правэнджаныя духам баравым,
Чарнявыя, як смоль, баравікі...
Я ў лес на развітанне не найшоў —
З надзеяй, што ўзрасце ён у цане:
Няхай сваёй удачы не знайшоў —
Грыбная казка застанецца мне.
ДУБУ Ў ТРЫ АБХВАТЫ
Вянец лясной раскошы
І вечны вартавы –
Мне сам, хоць я не ўпрошваў,
На дружбу даў правы.
Мне сам насустрач выйшаў:
З пушчанскай глыбіні
Ўзнялі – за неба вышай –
Зямныя карані.
Пад кронай вузлаватай
Я ў захапленні стаў,
Знаёмства ў тры абхваты
Абдымкам змацаваў.
З таго і пачалося:
Упоруч нас вялі
Грыбныя лета й восень.
І ў лад грамы гулі.
І дождж – грамоў страсеннік –
Праходзіў басанож
І нерушы падсейваў
Нам шчодрыя.
Ды ўсё ж…
Усё ж – прасі-выпрошвай:
Не ўгледзелі, калі
Да нерушаў апошніх
Нас сцежкі прывялі…
Адно цяпер – гукнуся
З ім пад грыбныя сны:
–Жыві і раскашуйся,
Мой пабрацім лясны!..
Не верачы ў вяртанні,
Хацеў бы толькі ўзнаць:
Калі мяне не стане,
З кім будзеш сябраваць?..
КАТАРАКТА
Пра грыбную згубу –
у дзень аперацыі 29.09.22.
Лес і пералескі
Зналі без абвесткі,
Як спяшаў я з хаты
На грыбное свята.
Неруш з бору й пушчы
Мне ішоў насустрач.
Ну а хто намерыўся
Затаіцца ў верасе,
Я для гэткіх докаў
Меў грыбное вока.
Дык жа нейкі грыб паганы
Прычыніў на вока рану:
Заманіў мяне ў гушчар
І галінкай шлёгнуў твар…
Хоць укол нязначны быў,
Ды крышталік не забыў
І з гадамі – а не раптам –
Пераймаўся ў катаракту.
А замест сябе навучна
Воку ўвёў крышталік штучны.
Дзякуй медыкам! – Але
Папярэдзілі мяне,
Каб за цяжкі груз не браўся,
Каб у працы не схіляўся
Дужа нізка галавою…
Ну а як тады “Грыбное”?!.
Як пад лапнік зазірнуць,
Як падмошнік разгарнуць,
Ды, дзе неруш весяліцца,
Як грыбам мне пакланіцца,
І цару “Грыбнога”
Як упасці ў ногі?..
Пра грыбную згубу
Вестку дам я дубу:
“Дубе-браце, выручай:
У мяне грыбны адчай!..”
Можа дуб мой “ў тры абхваты”
Спыніць медыкаў дэбаты:
“Кош бяры – і ў лес гайда:
Сам грыбы табе аддам!..”