Pehea mai nei ʻoukou e nā haumāna a me nā ʻohana? Lana ka manaʻo, maikaʻi ʻoukou a pau! ʻOiai ʻaʻole hiki iā kākou ke hele i ke kula, e hoʻomau kākou i ke aʻo ʻana ma o ka punaewele e like hoʻi me kā ʻoukou i hana ai ma ka lumi papa me Seesaw, Google Drive, a me nā ʻenehana hou aku.
ʻO ka mea nui, paʻahana ʻoe i nā lā a pau! He paipai kēia iā ʻoukou a pau e ola, hana, noʻonoʻo a neʻe. Mai makaʻu i ka hana e makaʻu i ka moloā. Mai nō a manaʻo, ʻaʻole ʻoukou e hana nei ma muli o ka hele ʻole ʻana i ke kula. ʻO ka hana ʻoukou e hana nei i kēia manawa me kou ʻohana, he hana nō, ʻo ia hoʻi ʻo ka holoi lole ʻoe, ka hoʻomaʻemaʻe hale ʻoe, ka mālama ʻana i nā keiki ʻoe a pēlā aku.
No laila, i kēia pule aʻe, makemake wau e hālāwai me ʻoukou i hoʻokahi manawa o ka lā i nā lā pākahi ma ka hola 12. ʻO ka Pōʻalua, ka lā 31 o Malaki ka lā mua a kākou e hālāwai mua ai. E hālāwai ana ma Zoom. He ʻenehana hou. No laila, e aʻo pū ana kākou i ia ʻenehana hou. Hiki ke ʻeʻe i Zoom ma ka iPapa, lolo uila, kelepona, a me nā mea ʻenehana ʻē aʻe.
E leka uila ana wau iā ʻoukou ma kou leka @lahaina.k12.hi.us i ka loulou e ʻeʻe ai i ka hālāwai Zoom. ʻO ka mea nui ma ka Pōʻakahi, e kiʻi ʻoukou i ka lolo uila ʻoe, ka ipapa ʻoe, ka ʻenehana āu e hoʻohana ana e hālāwai pū me iaʻu ma ZOOM. E hoʻomau i nā haʻawina maʻa mau ma kou puke Kilo a me ka heluhelu puke ʻana. Ma waho o kēlā mau haʻawina maʻa mau, e hāʻawi ana wau iā ʻoukou i kekahi Papa Koho. Ma kēia Papa Koho, he mau haʻawina e koho e hana ai no kēia pule mua. Ma muli o kēia ʻano aʻo hou ʻana ma ka punaewele, E HOʻOMANAWANUI! Inā, he pilikia kou ma ka hoʻāʻo ʻana e ʻeʻe i ZOOM, e leka uila iaʻu ma kaunaoa.garcia@k12.hi.us.
Mahalo nui,
Kumu Kaunaʻoa