No mes de febreiro, co gallo da celebración do Día da Candeloria, nas clases de Galego coas profesoras Vanessa García e Yolanda Mosquera, o alumnado traballou na ficha 4- O Modelo de Amor romántico en relación coas Cantigas e o Amor platónico. 

Alumnos e alumnas elaboraron memes en grupos reducidos.

Resultou unha actividade de moito agrado e alta participación do alumnado, xerando ideas moi interesantes.

Que é o amor? Que é o namoramento? Que se sente nese estado? O amor como emoción ou sentimento é diverso, non hai un modelo nin unha forma de expresalo que sexa única; é plural e diverso como o son as persoas e as relacións afectivas que se poden establecer entre elas. Porén, existe un modelo social dominante que impera na nosa cultura e que xera un sistema de mensaxes sobre as características que debe ter o amor verdadeiro. Estamos a referirnos ao modelo de amor romántico.

a) Existe a media laranxa.

b) Se hai amor é para toda a vida.

c) As parellas que funcionan non teñen desacordos, non teñen conflitos.

d) A parella debe ser sempre a prioridade fronte a outras persoas.

e) Nas parella non debe haber segredos.

f) Hai que ter parella, se non tes parella é que tes un problema.

g) A parella ten que saber en cada momento o que precisas.

Esta serie de tópicos e mitos asociados ao amor romántico crean unha serie de expectativas sobre como deben ser as relacións afectivas e tamén un estándar no comportamento da mocidade. É unha idealización do amor que provoca en moitos casos o establecemento de relacións tóxicas, de desigualdade e que inciden directamente na seguridade e autoestima das persoas.

Neste senso, vólvese fundamental dotar a mocidade de ferramentas que axuden a facerlles fronte a estas presións externas, recoñecer que existe diversidade á hora de construír as relacións de parella e que poidan construír as relacións afectivas igualitarias e respectuosas.