TRABALLANDO NO RESPECTO

A terceira ficha baséase primordialmente na introdución de conceptos relativos á identidade sexual e á orientación do desexo, co fin de analizalos e diferencialos como elementos clave dentro do proceso de sexuación. É frecuente que exista confusión entre o alumnado e non diferencien estes dous conceptos.

O proceso de sexuación, a través do cal nos configuramos como seres sexuados, leva consigo un resultado que pode resumirse nun concepto: diversidade.

A característica da diversidade toma connotacións persoais e sociais salientables ao falar de identidade, desa forma na que cada persoa se identifica como home ou como muller ou conforme a etiqueta que considere. O mesmo acontece ao falar da diversidade no mundo do desexo e nas formas nas que este se manifesta, ao resultar así un abano de orientacións posibles.

O coñecemento desa diversidade sexual e o fomento do respecto á convivencia entre os sexos vólvese fundamental para evitar situacións de violencia e discriminación.