ETHAZI-REN BIDEZ IKASTEN

MARTIN ETXARRI

EZINA EKINAREN EKINEZ EGINA

ETekin HAndiko ZIkloak dira ETHAZI deritzon metodologiari izena eman diotenak. Ziklo horiek erronketan eta talde-lanean oinarritzen dira; ETHAZIren bidez lan egiten badugu, hortaz, ikasleek euren gaitasunak garatzea nahi dugu; hau da, edozein erronka edo arazoren aurrean soluzio eraginkorrak lortzeko gaitasunak garatzea.

Edukiak informazio soiltzat jotzen baditugu, bigarren maila batean geratzen dira metodologia honetan, inportanteena eduki horiek nola erabil ditzakegun jakitea izango baita. Izan ere, gaur egun, teknologia berriei esker, informazio mordoa erraz eskuratu dezakegu. Beraz, ikasleek informazio hori guztia kudeatzeko gai izan behar dute; IKTak erabiltzen jakin behar dute, beharrezkoa duten informazioa eskuratzeko eta manipulatzeko.

Esan bezala, talde-lana bultzatu nahi du ETHAZIk berebat. Taldeak ondo funtzionatzen duenean, bakarrean baino errazago gainditzen ditu oztopoak. Etekin handiko ziklo batek, ondorioz, kide guztien arteko kolaborazioa izango du helburu. Nahi den kolaborazio horrek ahozko komunikazio eraginkorra beharko du. Horregatik, ikasleek gai izan beharko dute taldearen aurrean euren aurrerapenak ganoraz adierazteko eta gainerako ikasleek esandakoari etekina ateratzeko.

Azken batean, ikasleak protagonista izan behar dira. Jakintza eraikitzeko unean, ikasleak ohartu behar dira eurek izan behar dutela protagonista; irakasleok ikuspegi hori sustatu behar dugu. Ikasleei lagundu behar diegu jardueretan arrakasta izan dezaten, bizi osorako baliagarriak izango dituzten gaitasunak gara ditzaten.