ასპინძის გეოგრაფია და კლიმატი

ასპინძის მუნიციპალიტეტი სამცხე-ჯავახეთის მხარეში მდებარეობს, ახალციხის ქვაბულის აღმოსავლეთ ნაწილში. მისი ადმინისტრაციული ცენტრია დაბა ასპინძა. მუნიციპალიტეტი 12 ადმინისტრაციული ერთეულისგან შედგება, ესენია: დაბა ასპინძა, აწყვიტა, დამალა, თოკი, იდუმალა, ორგორა, ოთა, რუსთავი, ტოლოში, ძველი, ნაქალაქევი, ხიზაბავრა. ასპინძის მუნიციპალიტეტს აღმოსავლეთით ახალქალაქი ესაზღვრება, დასავლეთით – ახალციხე, ჩრდილოეთით – ბორჯომი, სამხრეთით კი – თურქეთის რესპუბლიკა.
რაიონისთვის დამახასიათებელია ძლიერ დანაწევრებული რელიეფი. მუნიციპალიტეტის ტერიტორიაზე რელიეფის სიმაღლე ზღვის დონიდან 1200–1800 მეტრის ფარგლებში იცვლება და ვაკისებრი ტერასებით, გორაკ– ბორცვებითა და ვულკანური წარმოშობის მთებითაა წარმოდგენილი.
ასპინძის მთავარი მდინარეა მტკვარი, მისი შენაკადებია: ფარავანი, ოთა, ოშორა და სხვა. რაიონში მდებარეობს წუნდის ტბა. მუნიციპალიტეტი მდიდარია სასარგებლო წიაღისეულით, როგორიცაა: ბაზალტი, მარმარილო, ტუფი, ვულკანური წიდა, თერმული და რადიოაქტიური წყლები და სხვა.
ასპინძის მუნიციპალიტეტში მთის სტეპის ჰავაა. დაბალ ზონაში საშუალო წლიური ტემპერატურა 9°C-ია, იანვრის საშუალო ტემპერატურაა – -2°C, აგვისტოსი კი – 20°C. ზედა ზონაში ჰავა უფრო მკაცრია. წყარო: georgiantravelguide.com

ასპინძას გაუმარჯოს!
ასპინძელებს სალამი!