Ntane'ě tù'un tsà'ǎ COVID-19
Jeremias-Griselda_Guillem_COVID.pdf210228_Mixtepec_Mixtec.pdf
Viǐ ntakachǔ ntaꞌú
(Wash your hands
Lávate bien las manos)
Kaxǎ inì kòntò ntaꞌú
(Cough in your elbow
Tose en tu codo)
Mà kèꞌú nùú-kú
(Don't touch your face
No te toques la cara)
Tsíka kú nkàǔ nùú nivǐ
(Keep your distance from other people
Mantén la distancia con otra gente)
Ki ntòo veꞌú
(Stay home
Quédate en casa)
1. Ná kú nkàà-ní nùú nìkànchiǐ á nùú yókó kà òkò ùꞌùn centigrádòs cha MÀ kaꞌní-à coronavirus (COVID-19).
2. Vásù ná kiꞌin kuèꞌè coronavirus nǐ KUĚ kúnì-à káchâ ñà ntèe nǐꞌna kú ntòꞌo-ní-ñà.
3. Tatù kúu ntaxǐta-ní tàchǐ-ní ra kúu tíín-ní-ñà tìtsi ùtsì segúndò cha kuě káyi-ní á kini ntóꞌo-ní cha KUĚ kúnì-à káchâ ñàà kuě ntóꞌo-ní kuèꞌè coronavirus.
4. Vásù ná koꞌo-ní varrénchè á cerveza cha MÀ CHǏNCHIÎ nùú coronavirus cha ìí káa ná koꞌo-ní-ñà.
5. Kuèꞌè coronavirus KÚU NTAYAꞌÌ-NǏ nùú íꞌní á nùú yókó.
6. Ñà vìtsi (tá vìtsi) á yùꞌvà KUĚ TSÁꞌNÍ-À kuèꞌè coronavirus.
7. Vásù chìkuíi íꞌní ná kuchi-ní cha MÀ CHǏNCHIÎ ñàà mà kǐꞌin coronavirus nǐ.
8. Kuèꞌè coronavirus MÀ NTǍYAꞌÌ-NǏ ratù ná kátsí tìkuaín nǐ.
9. Kàa ñà stáyaa ntaꞌá KUĚ TSÁꞌNÍ-À kuèꞌè coronavirus.
10. Ná chiꞌi-ní alcohol á cloro ikí kǔñù-ní ra MÀ CHǏNCHIÎ kaꞌní-à kuèꞌè coronavirus.
11. Iñǔ ñà kuèꞌè neumonía VǍꞌÎ nùú kuèꞌè coronavirus.
12. KOÔ tùꞌun kúu vásù chìtò chìtò ná ntakacha-ní xìchǐ-ní tsi ncháꞌìín cha mà chǐnchiî nùú kuèꞌè coronavirus.
13. Vásù ná kátsí-ní ájù cha MÀ CHǏNCHIÎ ñàà mà kǐꞌin coronavirus nǐ.
14. A kúu kaꞌní ñuꞌù ultravioleta kuèꞌè coronavirus?
Nà státá KUĚ tsíní-ñúꞌu kuàchúun-nà ñuꞌù ultravioleta tavà kaꞌní-nà kuèꞌè nùú ikí kǔñù-ní, rì ñuꞌù ultravioleta kúu kàꞌun iǐn-ní sáꞌì.
15. Kàa káꞌvi a vìtsi á yókó ikí kǔñù-ní; a ntàà ntásiáꞌì tùꞌun, a ntóꞌo-ní kuèꞌè coronavirus?
Kàa káꞌvi a vìtsi á yókó ikí kǔñù-ní kúu ntakani-à tatù kána kaꞌnǐ-ní. Tiàn mà kuû kùnì-à anà tsa ntàyàꞌa kuèꞌè coronavirus tatù nchàâ kaa kuèꞌè-ní. Nà ntàyàꞌa kuèꞌè coronavirus yée-nùú kìí ùvì á nchàà kìí ùtsì sàán sáná kitsáá kána kaꞌnǐ-nà.
16. A táni nà ntsáꞌnu kíꞌin coronavirus á sǎni kíꞌàn kue nà yúchǎ?
Á ntsáꞌnu-nà á kuǎchi-nà cha kúu kiꞌin kuèꞌè coronavirus nà.
17. Kue tàtǎ ñà tsa yéè ñà tsáꞌní kuèꞌè a vàꞌî kaꞌní-à kuèꞌè coronavirus?
Kue tàtǎ ñà tsa yéè ñà tsáꞌní kuèꞌè MÀ KU NCHIÎ KAꞌNÍ-À kuèꞌè coronavirus.
18. A yéè nchíì tàtǎ ñà kúu chincheé tavà mà kǐꞌin kuèꞌè coronavirus nǐ?
Nchàà vichi ra KOÔ tàtǎ ñà chíncheé á kaꞌní-à kuèꞌè coronavirus.
19. Anténà ñà teléfonò ñà 5G KUĚ ntásiáꞌì kuèꞌè coronavirus.
20. Ná koꞌo-ní metanol, etanol á cloro MÀ CHǏNCHIÎ ntuvàꞌa-ní tatù tsa ntóꞌo-ní kuèꞌè coronavirus cha tàtǎ xèén nchuàꞌa-ka kuì.
21. Ná chiꞌi-ní á ná koꞌo-ní cloro á nchíì-ka tàtǎ ñà tsáꞌní kuèꞌè ikí kǔñù-ní cha MÀ CHǏNCHIÎ KAꞌNÍ-À kuèꞌè coronavirus, cha xèén nchuàꞌî.
22. Kue ntikamà KUĚ NTÁSIÁꞌÌ kuèꞌè coronavirus nà.
23. Vásù tsàtù nchuàꞌa ná kátsí-ní cha MÀ CHǏNCHIÎ ntuvàꞌa-ní tá tsa ntóꞌo-ní kuèꞌè coronavirus.
24. KOÔ tàtǎ ñà yéè permísù (licencia) ñà kúu koꞌo-ní tavà ntuvàꞌa-ní ratù tsa ntóꞌo-ní kuèꞌè coronavirus.