RILL Cymraeg: Archwilio’r Prosiect a’r Broses o'i Werthuso 

Beth yw RILL Cymraeg?

Datblygwyd RILL Cymraeg yn sgil ailagor ysgolion wedi cyfnod clo COVID-19. Tarddodd y cysyniad wedi llwyddiant y rhaglen RILL Saesneg o bell, gyda’r bwriad o’i hehangu i greu fersiwn Gymraeg a fyddai'n addas i'w ddenyddio yn y dosbarth yn ogystal ac yn y cartref.

Prif amcan RILL Cymraeg oedd cefnogi disgyblion a oedd yn dangos arwyddion o lithro’n ôl o ran eu sgiliau llythrennedd Cymraeg. Nodwyd prinder sylweddol o adnoddau ymchwil-seiliedig ar gael yn y Gymraeg. O ganlyniad, ein nod oedd creu rhaglen a fyddai’n mynd i’r afael â’r bwlch hwn.

Seiliwyd y gweithgareddau hyn ar egwyddorion allweddol y Simple View of Reading, gan ganolbwyntio ar ddadgodio, deall testun, ac ehangu geirfa. Serch hynny, roeddem yn benderfynol o beidio â chyfieithu rhaglen Saesneg. Yn hytrach, ein nod oedd datblygu adnodd a oedd yn canolbwyntio ar nodweddion ieithyddol sy'n unigryw i'r Gymraeg, megis patrymau sillafu (e.e llythrennau dwbl a'r llafariaid clwm), gramadeg (e.e treigladau, dosbarthiadau geiriau a mwy), a defnyddio cystrawennau'n gywir. 

Drwy fabwysiadu dull wedi’i deilwra’n ofalus, mae RILL Cymraeg yn cynnig dull ymarferol a chadarn i hyrwyddo llythrennedd Cymraeg. Mae’r rhaglen yn cynnwys 15 wythnos o weithgareddau i ddisgyblion 7 - 9 oed, pob un yn seiliedig ar dystiolaeth ymchwil ar ddatblygiad iaith a llythrennedd effeithiol.

Cliciwch ar y adrannau isod i ddysgu mwy am brosiect RILL Cymraeg, y rhaglen grwpiau bach, trosolwg o’r rhaglen ddosbarth gyfan (sy’n cael ei datblygu ar hyn o bryd), gwersi cartref gyda chysylltiad fideo, a mwy. 

Rhagor o Wybodaeth