Gwahoddwn holl ysgolion RILL i gymryd rhan mewn gwerthusiad o'r rhaglen.

Mae'r gwerthusiad yn broses strwythuredig sy’n asesu pa mor effeithiol yw’r rhaglen o ran gwella sgiliau darllen, geirfa, a darllen a deall disgyblion. Mae’n ystyried pa mor dda mae’r rhaglen yn gweithio, sut mae’n cael ei chyflwyno, a pha effaith mae’n ei chael ar ddysgwyr. Mae hyn yn cynnwys dadansoddi cynnydd mewn sgiliau llythrennedd y disgyblion. 

Nodir fod dim gorfodaeth ar unrhyw ysgol sy'n derbyn hyfforddiant ac adnoddau RILL i gymryd rhan yn y gwerthusiad.

Mae creu Grŵp B (y grŵp aros) yn hanfodol gan ei fod yn darparu grŵp cymhariaeth sydd ddim wedi derbyn ymyrraeth RILL. Bydd hyn yn caniatáu i ni gymharu effeithiolrwydd y cwricwlwm traddodiadol yn unig â’r cwricwlwm traddodiadol wedi’i gyfuno â gwersi RILL. Mae’r treial wedi’i ddylunio i brofi’n ddibynadwy a yw’r rhaglen yn gwneud gwahaniaeth gwirioneddol. Gan fod y grwpiau wedi’u dewis ar hap, gall ymchwilwyr sicrhau bod y canlyniadau’n deg ac nad ydynt wedi’u dylanwadu gan ffactorau eraill.

Byddwn yn asesu’r un ar bymtheg disgybl dair gwaith dros gyfnod y prosiect. Yn ystod yr asesiadau hyn, byddwn yn defnyddio profion llythrennedd safonol i fesur sgiliau llythrennedd y disgyblion. Gweinyddir y profion gan athro neu athrawes RILL eich plentyn.

Ar ddiwedd y flwyddyn, byddwn yn darparu adroddiad fer ar ddatblygiad yr ysgol ac disgyblion unigol (wedi'i anonomeiddio). Bydd yr adroddiad yn rhoi canlyniadau dros dri pwynt amser, ac yn cynnwys scoriau cywirdeb darllen geiriau Cymraeg a Saesneg a hefyd scoriau adnabod geirfa haen dau Cymraeg. 

Nodir na fydd y profion hyn yn cael eu defnyddio fel offerynnau i ddiagnosio anawsterau llythrennedd gan yr ymchwilwyr nac yr ysgol.